Padayon nga Maglakat Paagi sa Pagtuo

1. Ngaa nakasiling si apostol Pablo nga kontento sia sa iya kabuhi?

KABALO si apostol Pablo nga lapit na lang sia patyon, pero kontento gid sia sa iya kabuhi. Parte sa iya kabuhi, nagsiling sia: “Natapos ko ang dalaganon, kag natuman ko na ang pagtuo.” (2 Tim. 4:​6-8) Maayo gid ang desisyon ni Pablo nga gamiton ang iya kabuhi para alagaron si Jehova, kag sigurado sia nga nalipay gid si Jehova sa iya. Gusto man naton nga maghimo sang maayo nga mga desisyon kag malipay si Jehova sa aton. Paano naton ini mahimo?

2. Ano ang buot silingon sang paglakat paagi sa pagtuo?

² Nagsiling si Pablo parte sa iya kaugalingon kag sa iban pa nga matutom nga mga Cristiano: “Nagalakat kita paagi sa pagtuo, indi paagi sa panulok.” (2 Cor. 5:7) Ano ang buot silingon ni Pablo? Sa Biblia, ang tinaga nga “nagalakat” nagapatuhoy kon kaisa sa paagi sang pagkabuhi sang isa ka tawo. Kon ang isa ka tawo nagalakat paagi sa panulok, nagadesisyon sia base lang sa iya makita, mabatian, kag mabatyagan. Pero kon ang isa nagalakat paagi sa pagtuo, nagadesisyon sia base sa iya pagsalig kay Jehova nga Dios. Makita sa iya ginahimo nga kumbinsido sia nga padyaan sia sang Dios, kag para sa iya kaayuhan ang pagsunod sa mga laygay ni Jehova nga makita sa Iya Pulong.​—Sal. 119:66; Heb. 11:6.

3. Ano ang mga pagpakamaayo kon nagalakat kita paagi sa pagtuo? (2 Corinto 4:18)

³ Kon kaisa, kinahanglan naton magdesisyon base sa kon ano ang aton makita, mabatian, kag mabatyagan. Pero kon amo lang sini ang aton basihan kon maghimo kita sang importante nga mga desisyon, posible gid ini magresulta sa mga problema. Ngaa? Bangod posible may mga tion nga madaya kita sang aton makita kag mabatian. Kon maglakat kita paagi lang sa panulok, posible makahimo kita sang butang nga wala nanamian ni Jehova. (Man. 11:9; Mat. 24:​37-39) Pero kon maglakat kita paagi sa pagtuo, makahimo kita sang mga desisyon nga “kalahamut-an sa Ginuo.” (Efe. 5:10) Kon sundon naton ang laygay sang Dios, mangin malinong ang aton hunahuna kag mangin malipayon gid kita. (Sal. 16:​8, 9; Isa. 48:​17, 18) Kag kon padayon kita nga maglakat paagi sa pagtuo, mabuhi kita sing wala sing katapusan.​—Basaha ang 2 Corinto 4:18.

4. Paano mabal-an sang isa ka tawo kon bala nagalakat sia paagi sa pagtuo ukon paagi sa panulok?

⁴ Paano naton mabal-an kon bala nagalakat kita paagi sa pagtuo ukon paagi sa panulok? Dapat naton pamangkuton ang aton kaugalingon: Sa diin ko ginabase ang akon mga desisyon? Ginabase ko lang bala ini sa akon makita? Ukon ginabase ko ini sa mga laygay ni Jehova? Binagbinagon naton kon paano kita padayon nga makalakat paagi sa pagtuo sa sining tatlo ka importante nga sitwasyon: kon nagapili sang obra, kon nagapili sang pangasaw-on ukon pamanahon, kag kon makabaton kita sang instruksion halin sa organisasyon. Sa kada sitwasyon, hibaluon naton kon ano ang dapat naton binagbinagon para makahimo kita sang maayo nga mga desisyon.

KON NAGAPILI SANG OBRA

5. Kon nagapili kita sang obra, ano ang dapat naton binagbinagon?

⁵ Gusto gid naton nga maamanan naton ang aton kaugalingon kag ang aton pamilya. (Man. 7:12; 1 Tim. 5:8) May mga obra nga daku ang sueldo. Kon amo sini ang aton obra, maamanan naton ang aton pamilya kag makatipon kita sang kuarta nga magamit naton sa palaabuton. May iban naman nga obra nga insaktuhan lang ang sueldo para sa pagkaon, ilistaran, kag mga bayo sang aton pamilya. Kon nagapili kita sang obra, normal lang nga binagbinagon naton kon pila ang sueldo nga aton mabaton. Pero kon amo lang sini ang aton binagbinagon, nagalakat kita paagi sa panulok.

6. Kon nagapili sang obra, paano naton mapakita nga nagalakat kita paagi sa pagtuo? (Hebreo 13:5)

⁶ Kon nagalakat kita paagi sa pagtuo, binagbinagon man naton kon paano maapektuhan sang aton obra ang aton kaangtanan kay Jehova. Pamangkuta ang imo kaugalingon: ‘May ipahimo bala sa akon sa sini nga obra nga ginadumtan ni Jehova?’ (Hulu. 6:​16-19) ‘Maapektuhan bala sini ang akon pag-alagad, kag mapahilayo bala ako sa akon pamilya sa malawig nga tion?’ (Fil. 1:10) Kon huo ang imo sabat sa sini nga mga pamangkot, maalamon kon indi mo pagbatunon ini nga obra bisan pa mabudlay mangita sing obra. Kon nagalakat kita paagi sa pagtuo, makita sa aton mga desisyon nga nagasalig kita nga iaman ni Jehova ang aton mga kinahanglanon.​—Mat. 6:33; basaha ang Hebreo 13:5.

7-8. Paano ginpakita ni Javier nga nagalakat sia paagi sa pagtuo? (Tan-awa man ang piktyur.)

⁷ Natun-an sang isa ka brother sa South America nga si Javiera nga importante gid nga maglakat kita paagi sa pagtuo. Nagsiling sia: “Nag-aplay ako sa mas mataas nga posisyon sa akon ginaubrahan. Doble ang sueldo sini kag gusto ko gid ini nga obra.” Pero gusto gid ni Javier nga magpayunir. Nagsiling pa sia: “Gin-iskedyul ako nga interbyuhon sa sini nga obra. Antes sang interbyu, nangamuyo ako sing bulig kay Jehova kay sigurado ako nga kabalo sia kon ano ang pinakamaayo para sa akon. Gusto ko nga magtaas ang akon posisyon sa obra kag magdaku ang akon sueldo. Pero indi ko gusto nga makaupang ini sa akon handum nga dugangan pa gid ang akon pag-alagad kay Jehova.”

⁸ Nagsiling si Javier: “Sa tion sang interbyu, ginhambalan ako sang manedyer nga kinahanglan ko pirme mag-obertaym. Mainayuhon ko nga ginpaathag sa iya nga indi ko ina mahimo bangod sang akon iskedyul sa pagbantala sa mga tawo.” Gani nagdesisyon si Javier nga indi pagbatunon ang obra. Pagligad sang duha ka semana, nagpayunir sia. Sang ulihi sadto nga tuig, nakakita sia sang part-time nga obra. Nagsiling sia: “Ginpamatian ni Jehova ang akon pangamuyo, kag ginhatagan niya ako sang obra nga indi makasablag sa akon pagpayunir. Nalipay gid ako sa akon obra kay madamo ako sing tion sa pag-alagad kay Jehova kag sa mga kauturan.”

9. Ano ang natun-an mo sa eksperiensia ni Trésor?

⁹ Ano ang himuon naton kon marealisar naton nga wala kita nagalakat paagi sa pagtuo bangod sang aton obra subong? Binagbinaga ang eksperiensia ni Trésor nga taga-Congo. Nagsiling sia: “Gusto ko gid ang akon bag-o nga obra subong. Triple ang akon sueldo kon ikumparar sa akon daan nga obra kag ginarespeto gid ako sang mga tawo.” Pero bangod pirme nagaobertaym si Trésor, talagsa na lang sia makatambong sa mga miting. Gina-pressure man sia sang iya mga upod sa obra nga magbutig para indi mabal-an ang kamalamalahan nga ginahimo sang ila kompanya. Gusto na gid ni Trésor maghalin, pero nahadlok sia nga madulaan sing obra. Ano ang nakabulig sa iya? Nagsiling sia: “Ang Habacuc 3:​17-19 nagbulig sa akon nga maintiendihan nga kon maghalin ako sa obra, indi ako pagpabay-an ni Jehova. Gani nag-resign ako.” Nagsiling sia: “Madamo nga boss ang nagahunahuna nga kon hatagan mo ang isa ka tawo sang obra nga daku ang sueldo, isakripisyo niya ang tanan lakip na ang iya tion para sa iya pamilya kag pagsimba sa Dios. Nalipay gid ako kay ginpabaloran ko ang akon kaangtanan kay Jehova. Pagligad sang isa ka tuig, ginbuligan ako ni Jehova nga makakita sang obra nga may bastante nga sueldo para sa akon mga kinahanglanon. Nadugangan man ang akon tion sa pag-alagad kay Jehova. Kon unahon naton si Jehova, mahimo may mga tion nga kulangon kita sa kuarta. Pero buligan kita ni Jehova.” Kon magsalig kita sa mga laygay kag promisa ni Jehova, padayon kita nga makalakat paagi sa pagtuo kag pakamaayuhon gid niya kita.

KON NAGAPILI SANG PANGASAW-ON UKON PAMANAHON

10. Kon nagapili sang pangasaw-on ukon pamanahon, paano naton masiling nga nagalakat kita paagi sa panulok?

¹⁰ Ang pag-asawahay regalo halin kay Jehova, gani normal lang nga gusto naton mangasawa ukon mamana. Kon ginabinagbinag sang isa ka sister kon bala pamanahon niya ang isa ka brother, mahimo ginatan-aw niya ang batasan sang brother, ang iya hitsura, kag reputasyon. Mahimo ginatan-aw man niya kon paano mag-uyat sang kuarta ang brother, ang iya mga responsibilidad sa pamilya, kag kon bala nalipay sia kon kaupod niya ang brother.b Importante nga binagbinagon ini nga mga butang. Pero kon amo lang ini nga mga butang ang binagbinagon sang sister, nagalakat sia paagi sa panulok.

11. Kon nagapili sang pangasaw-on ukon pamanahon, paano naton mapakita nga nagalakat kita paagi sa pagtuo? (1 Corinto 7:39)

¹¹ Nalipay gid si Jehova kon ginasunod sang mga sister kag sang mga brother ang iya laygay kon nagapili sila sang pangasaw-on ukon pamanahon. Halimbawa, ginasunod nila ang laygay nga masugod lang sila sa pagpakig-date “kon indi na [sila] tuman kabata.” (1 Cor. 7:36) Ang ginatan-aw gid nila sa ila gusto pangasaw-on ukon pamanahon amo ang mga kinaiya nga ginasiling ni Jehova nga dapat makita sa isa ka maayo nga bana ukon asawa. (Hulu. 31:​10-13, 26-28; Efe. 5:33; 1 Tim. 5:8) Ginasunod nila ang laygay sang 1 Corinto 7:39 nga magpangasawa ukon magpamana “sa sumulunod lamang sang Ginuo.” (Basaha.) Padayon sila nga nagalakat paagi sa pagtuo kay nagasalig sila nga mas mahatag ni Jehova ang ila emosyonal nga kinahanglanon.​—Sal. 55:22.

12. Ano ang natun-an mo sa halimbawa ni Rosa?

¹² Binagbinaga ang eksperiensia ni Rosa nga isa ka payunir sa Colombia. Nakilala niya sa iya obra ang isa ka lalaki nga indi Saksi nga nangaluyag sa iya, kag naluyag man sia sa lalaki. Nagsiling sia: “Daw kabuot man sa iya. Mabinuligon gid sia sa ila lugar kag wala sia sang bisyo. Ginarespeto gid niya ako. Ara gid sa iya ang mga kinaiya nga gusto ko sa isa ka bana. Ang problema lang gid kay indi sia Saksi.” Nagsiling pa sia: “Nabudlayan ako magsiling sa iya nga indi ako puede magpakig-date sa iya kay nahulog na ang buot ko sa iya. Sadto nga tion, nasubuan ako kag gusto ko na gid mamana, pero wala ako sing naluyagan nga brother.” Ano ang ginhimo ni Rosa? Wala sia nagpokus sa kon ano lang ang iya makita. Ginhunahuna niya kon ano ang mangin epekto sang iya desisyon sa iya kaangtanan kay Jehova. Gani, gin-untatan niya ang pagkomunikar sa lalaki kag nangin masako sia sa iya pag-alagad kay Jehova. Wala madugay pagkatapos sadto, gin-agda sia nga mag-eskwela sa School for Kingdom Evangelizers, kag nagaalagad sia subong bilang espesyal payunir. Nagsiling si Rosa: “Ginpakamaayo gid ako ni Jehova kag nangin malipayon gid ako.” Indi mahapos maglakat paagi sa pagtuo ilabi na kon nadalahig ang aton balatyagon. Pero kon magpagiya kita kay Jehova, para gid ini pirme sa aton kaayuhan.

KON MAKABATON KITA SANG INSTRUKSION HALIN SA ORGANISASYON

13. Kon makabaton kita sang mga instruksion halin sa organisasyon, ano ang posible nga rason nga maglakat kita paagi sa panulok?

¹³ Pirme kita makabaton sang mga instruksion halin sa organisasyon paagi sa mga gulang, circuit overseer, branch office, kag sa Nagadumala nga Hubon nga makabulig sa aton pag-alagad kay Jehova. Pero ano abi kon indi naton mahangpan kon ngaa ginhatag nila ini nga instruksion? Posible maghunahuna kita nga mabudlay ini tumanon. Mahimo pa gani kita magpokus sa indi maayo nga mga kinaiya sang mga brother nga naghatag sang instruksion.

14. Kon makabaton kita sang mga instruksion halin sa organisasyon, paano naton mapakita nga nagalakat kita paagi sa pagtuo? (Hebreo 13:17)

¹⁴ Kon nagalakat kita paagi sa pagtuo, nagasalig kita nga ginagiyahan ni Jehova ang iya organisasyon kag kabalo sia sang aton sitwasyon. Gani, nalipay kita nga magtuman dayon. (Basaha ang Hebreo 13:17.) Kabalo kita nga kon sundon naton ang mga instruksion, makabulig kita nga mahiusa ang kongregasyon. (Efe. 4:​2, 3) Nagasalig kita nga bisan pa indi perpekto ang mga nagapanguna sa aton, pakamaayuhon kita ni Jehova kon mangin matinumanon kita. (1 Sam. 15:22) Nagasalig kita nga kon may kinahanglan gid man bag-uhon sa mga instruksion, may himuon gid si Jehova para bag-uhon ini.​—Miq. 7:7.

15-16. Ano ang nakabulig sa isa ka brother nga maglakat paagi sa pagtuo bisan pa nagaduhaduha sia sa mga instruksion nga iya nabaton? (Tan-awa man ang piktyur.)

¹⁵ Binagbinaga ang eksperiensia nga nagapakita sang mga pagpakamaayo nga mabaton naton kon nagalakat kita paagi sa pagtuo. Sa Peru, nagahambal sang Spanish ang kalabanan nga tawo. Pero madamo man sila sang tumandok nga mga lenguahe. Kag ang isa sa sini amo ang Quechua. Sa sulod sang madamo nga tinuig, ginapangita sang mga utod nga nagahambal sang Quechua ang mga tawo sa ila teritoryo nga nagahambal sini nga lenguahe. Pero, bilang pagtuman sa mga kasuguan sang gobierno, nakabaton sila sang bag-o nga instruksion kon paano pangitaon ang mga tawo nga nagahambal sang Quechua. (Roma 13:1) Bangod sini, naghunahuna ang pila sa ila nga mabudlay ini himuon. Pero bangod gintuman nila ang bag-o nga instruksion, ginpakamaayo sila ni Jehova kay madamo sila sang nakita nga nagahambal sang Quechua.

¹⁶ Si Kevin nga isa ka gulang sa Quechua nga kongregasyon nagsiling: “Nahunahuna ko, ‘Mabudlayan na gid kami sini pangita sang mga nagahambal sang Quechua.’” Ano ang ginhimo ni Kevin? Nagsiling sia: “Ginpamalandungan ko ang Hulubaton 3:5 kag ang halimbawa ni Moises. Ginsugo sia nga pangunahan ang mga Israelinhon pagua sa Egipto pakadto sa Pula nga Dagat. Daw indi praktikal ini nga instruksion kay posible sila maabtan sang mga Egiptohanon. Pero nagtuman si Moises, kag ginpakamaayo sia ni Jehova sa dalayawon nga paagi.” (Ex. 14:​1, 2, 9-11, 21, 22) Ginsunod ni Kevin ang bag-o nga instruksion. Ano ang nangin resulta? Nagsiling sia: “Nagdayaw gid ’ko sa kon paano kami ginpakamaayo ni Jehova. Sang una, laban lang kami lakat. Kon kaisa gani, isa ukon duha lang ka tawo nga nagahambal sang Quechua ang amon makita. Subong, nagapokus kami sa mga teritoryo nga madamo ang nagahambal sang Quechua. Gani, madamo kami sing naistorya, sing nabalikan, kag sing na-Bible study. Kag nagdamo man ang nagtambong sa amon mga miting.” Kon nagalakat kita paagi sa pagtuo, pirme gid kita pakamaayuhon ni Jehova.

17. Ano ang natun-an mo sa sini nga artikulo?

¹⁷ Ginbinagbinag naton kon paano kita padayon nga makalakat paagi sa pagtuo sa tatlo ka sitwasyon. Pero, dapat padayon kita nga maglakat paagi sa pagtuo sa tanan nga bahin sang aton kabuhi, pareho sang pagpili sang kalingawan, edukasyon, ukon kon paano naton padakuon ang aton bata. Ano man nga desisyon ang aton himuon, dapat wala lang ini nabase sa kon ano ang aton makita, kundi sa aton man kaangtanan kay Jehova, sa iya laygay, kag sa iya promisa nga atipanon niya kita. Kon himuon naton ini, “magalakat kita sa ngalan ni Jehova nga aton Dios sa wala sing katubtuban.”​—Miq. 4:5.