Mabasa Bala sa Biblia ang Purgatoryo?

Ang sabat sang Biblia

Indi. Wala sing mabasa sa Biblia nga tinaga nga “purgatoryo,” kag wala man sini ginatudlo nga ang kalag sang mga napatay ginatinluan sa purgatoryo.a Binagbinaga ang ginatudlo sang Biblia parte sa sala kag kamatayon kag kon paano sini ginabali ang doktrina nga purgatoryo.

• Ang pagtuo sa dugo ni Jesus, indi ang pagtener sa ginatawag nga purgatoryo, ang makatinlo sa sala sang isa ka tawo. Ang Biblia nagasiling nga “ang dugo ni Jesus nga Anak sang Dios nagatinlo sa aton sa tanan ta nga mga sala” kag “paagi sa iya [ni Jesus] dugo ginluwas kita sa aton mga sala.” (1 Juan 1:7; Bugna 1:5, Ang Pulong sang Dios, APD) Ginhatag ni Jesus ang iya kabuhi “agod matubos ang madamo nga mga tawo.”​—Mateo 20:28, APD.

• Ang mga patay wala sing nahibaluan. “Ang mga buhi nakahibalo nga mapatay sila, apang ang mga patay wala gid sing nahibaluan.” (Manugwali 9:5) Ang mga patay indi makabatyag sang bisan ano, gani indi sila matinluan sang kalayo sang purgatoryo.

• Wala sing silot sa sala pagkatapos sang kamatayon. Ang Biblia nagasiling nga “ang bayad sa sala amo ang kamatayon” kag “kon ang tawo patay na, hilway na siya sa gahom sang sala.” (Roma 6:​7, 23, APD) Ang kamatayon amo na ang silot sa sala.