Ngaa Nabahinbahin ang Akon Relihion?

ANG pagbinahinbahin sa sulod sang Katoliko nga Iglesia kitaon gid amo kon ngaa madamo sang sinsero nga mga Katoliko ang nagabatyag kasubong ni apostol Pablo, nga nagsulat sa nabahinbahin nga mga Cristiano sa Corinto: “Maathag nga may yara serioso nga mga pagpinuyasay sa tunga ninyo. . . . Nabahinbahin bala si Cristo?”—1 Corinto 1:11, 13, The New Jerusalem Bible.

Madamo sang mapanilagon nga mga Katoliko ang nakarealisar sing bug-os nga ang Cristianismo indi dapat ‘nabahinbahin.’ Ang mga Katoliko, kon ipaanggid sa kalabanan sang iban pa nga nagapangangkon nga mga Cristiano, nagakabalaka sa pagkaisa sang matuod nga Cristianong relihion. Nagahunahuna sila nga sila isa ka nahiusa nga relihion sa Iglesia Katolika. Ginakabig nila ang Protestantismo nga isa ka magamo nga pagsimpon sang nagasumpakilay nga mga relihion. Para sa ila, ang Katoliko nga Iglesia nagarepresentar sa pagkalig-on kag, labaw sa tanan, sa paghiusa. Karon nagumon sila.

Ngaa Nabahinbahin?

Ang Katoliko nga Iglesia nabahinbahin sa ulot sang mga progresibo, mga tradisyonalista, kag sa kadak-an nga Batikano II. Madamo sang liberal nga mga Katoliko sa grupo sang mga progresibo ang nagabantala sing nanuhaytuhay nga teolohiya sang kahilwayan nga nagapakamatarong sa politikal nga rebolusyon. Ang iban malapit na sa pag-adoptar sa tikang sang mga Marxista kag nagapakamatarong pa gani sa naarmasan nga pag-alsa. Apang, ang Manunukod sang Cristianismo nagsugo sa iya mga disipulo: “Indi kamo iya sang kalibutan, bangod ginpili ko kamo gikan sa kalibutan. . . . Ang akon ginharian wala sa sini nga kalibutan.”—Juan 15:19; 18:36, NJB.

Ginadepensahan sang mga tradisyonalista ang hinimo sang tawo nga mga tradisyon kag Latin nga liturhiya nga wala maghalin sa panahon sang Biblia, kay ang hambal sang primitibo nga Cristianismo Griego, indi Latin. Dugang pa, paagi sa ila pagkapanatiko kag pagkaagresibo, wala bala nila ginahimutig ang ila pangangkon nga mga Cristiano sila? Si Henri Fes­quet, kolumnista anay sa relihion sa Pranses nga pamantalaan nga Le Monde, nagsulat: “Ang pagyubitay kag pag-away sang mga Cristiano [mga Katoliko] bangod sa mga duog sang pagsimba isa ka saksi nga magabalandra lamang sa ila. Ano ang pulos sang pagbantala sa kapawa sa ngalan sang Ebanghelyo kon ang mga buhat sang isa nagahimutig sang iya mga pulong?”

Ginsilingan ni Jesus ang mga Fariseo: “Bangod sang inyo tradisyon ginpakawalay pulos ninyo ang pulong sang Dios.” (Mateo 15:6, The New American Bible) Madamo sang sinsero nga mga Katoliko ang nagabatyag sing subong man sini tuhoy sa modernong-adlaw nga mga tradisyonalista.

Ang mga progresibo kag ang mga tradisyonalista (bangod sa magkatuhay nga mga rason) nagapati nga ang konsilyo sang Batikano II nagpatubas sing maluya nga mga Katoliko. Gin-interbyu sang mga awtor nga sanday Puyo kag Van Eersel ang Pranses nga Katolikong pilosopo nga si Jean Guit­ton, katapo sang Pranses nga Acad­e­my. Ginbilog nila ang iya mga ginabatyag subong ang masunod: “Ang Katoliko nga Kredo, ang sadsaran sang Iglesia, naputaputa, ang mga labing makugi sa tunga sang mga matutom nagahugod sang ila kaugalingon sing eksklusibo sa politika, ang pamatan-on nga mga Cristiano [mga Katoliko] kalma nga nagahuliray sa wala pa ang kasal, wala sing bisan sin-o nga nakahibalo kon paano iaplikar sing husto ang Konsilyo [sang Batikano], kag ang katawhan sang Dios yara tanan sa dagat.”

Sing halangpunon, ang sinsero nga mga Katoliko nagapamangkot, ‘Ngaa nabahinbahin ang akon relihion?’ Ang sabat amo: Bangod wala sing isa sa nanuhaytuhay nga bahin sini ang nagabaton sa Biblia subong amo ang isa ka masaligan nga awtoridad sa pagpaathag sang tindog sang matuod nga mga Cristiano sa tanan nga butang. Busa, ginabahinbahin sila sang nanuhaytuhay nga mga teolohiya kag mga interpretasyon sa mga tradisyon.

Ano ang Mahimo sang Sinsero nga mga Katoliko?

Sang isa ka okasyon sang 1981, gin-utod sang tradisyonalista nga mga Katoliko ang ekumeniko nga serbisyo nga ginhiwat sa isa ka Katoliko nga simbahan sa Paris. Sa tapos sadtong pagtublag, ginsiling ni Arsobispo (karon Kardinal) Lustiger sang Paris ang mga nagpabilin sa simbahan: “Nagkari kita diri sa pagpangabay sang mga regalo sang Espiritu nga nagahiusa sa nag-aplaag nga mga anak. Sa baylo, nakita naton ang salaming sang mga pagbahinbahin sa tunga sang mga Cristiano, ang agi sang Babel.”

Ang Babel amo ang duog nga sa diin gingumon sang Dios ang hambal sang mga nagabuhat sing dimatuod nga pagsimba. (Genesis 11:1-9) Sang ulihi, amo ini ang nangin duog sang siudad sang Babilonia, ang ginhalinan sang madamo nga dios kag mga diosa nga makagulumon. Sa Biblia nangin simbulo ini sang bug-os kalibutan nga relihioso nga sistema sang nagumon nga relihion. Ang Theological Word­book of the Old Testament nagasiling: “Sang unang siglo A.D. pa, ginpatuhuyan ni [apostol] Juan ang relihioso nga sistema, ang Babilonia, subong ang ‘Iloy sang mga bigaon kag sang mga kangil-aran sang duta’ (Bug. 17:5).”

Nagapatuhoy sa sining simbuliko nga Babilonia, ukon bug-os kalibutan nga emperyo sang dimatuod nga relihion, ginaagda sang Biblia ang tanan sinsero nga mga tawo nga maghikot sa gilayon, nga nagasiling: “Guwa ka sa iya, katawhan ko, kay basi makasala ka upod sa iya kag makaambit sa mga kalalat-an batok sa iya!”—Bugna 18:4, NAB.

Madamo sang sinsero nga mga tawo ang nagabiya sa organisado nga mga relihion sang Cristiandad. Halimbawa, ang isa ka sirado nga Katoliko anay nga nagapuyo sa French Alps sang Pranses nagsulat sang masunod sa sanga talatapan sang mga Saksi ni Jehova sa Pransya: “Nahisuno sa 1,000-anyos nga tradisyon sang Iglesia Katolika, ginbunyagan ako kutob sa pagkabun-ag sa Katoliko nga pagtuluohan. Isa ako ka aktibo nga Katoliko sa sulod sang mga 50 ka tuig. Sang mga 1980, nakombinse ako nga ang Iglesia Katolika sayop. Nagtalangtalang ako kag nabalaka sing daku. Madamo nga beses nga nakigsuay ako sa mga pari nga wala nagatahod sa ila mga panumpa. Sa pila ka tuig na nabatian ko ang nahanungod sa mga Saksi ni Jehova, ang kalabanan indi maayo. Sa tapos sang madugay nga pagbinagbinag, ginbuksan ko ang akon ganhaan sa ila. Ginbuligan nila ako nga makita nga ang Biblia nagaunod sing mga sabat sa aton mga pamangkot. Narealisar ko man nga pagligad sang 50 ka tuig sang aktibo nga pag-alagad sa sulod sang Iglesia Katolika, wala ako sing nahibaluan sa Biblia, bisan pa may yara ako. Ang mga Saksi ang nagbulig sa akon sa ‘pagtukib’ sa Biblia.”

Si Ginette, nga nagapuyo malapit sa Paris, isa man ka mabakod nga Katoliko. Sa kamatuoran, sang ang iya bana nagsugod sa pagtuon sing Biblia upod sa mga Saksi ni Jehova, ginhimo niya ang iya masarangan sa pagpugong sa iya, kag padayon sia nga nagpamatok sa pila ka tuig. Ano ang nagpabalhin sa iya? Sia nagsulat: “Nadulaan ako sing kompiyansa. Wala na ako sing mabenepisyo sa iglesia. Sa pag-umpisa sini, ginhimos ko nga mag-atubangay ang akon pari kag ang mga Saksi. Apang wala magdugay nakita ko nga ang pari indi makasabat sang ila mga pamangkot.” Ginbaton ni Gi­nette ang pagtuon sa Biblia upod sa mga Saksi. Karon sia kag ang iya bana malipayon nga nagaalagad sa Dios sa sulod sang nahiusa nga internasyonal nga pamilya sang mga Saksi ni Jehova.

Kon nagumon ka kag nasit-an bangod sang mga pagbinahinbahin sa sulod sang imo iglesia, ginaagda namon ikaw nga magkuha sing dugang pa nga impormasyon gikan sa mga Saksi nga nagahatag sa imo sining magasin ukon magsulat sa mga editor. Ang mga Saksi ni Jehova malipay sa pagbulig sa imo nga makita ang mahigugmaon nga internasyonal nga pamilya sang mga Cristiano nga nahiusa gid sa ila pagsimba sa Dios.

[Kapsion sa pahina 11]

“Ano ang pulos sang pagbantala sa kapawa sang ngalan sang Ebanghelyo kon ang aksion sang isa nagahimutig sang iya mga pulong?”—Pranses nga pamantalaan nga “Le Monde”

[Kapsion sa pahina 12]

“Nakita naton ang salaming sang mga pagbinahinbahin sa tunga sang mga Cristiano, ang agi sang Babel.”—Kardinal Lustiger sang Paris