Wala Puluy-an nga Kabataan—May Solusyon Bala?
ANG mga tawo nga nagaulikid gid sa ila isigkatawo indi luyag mag-ampo nga subong bala wala na sing mahimo para sa wala puluy-an nga kabataan. Narealisar nila nga indi lamang atop sa ibabaw sang ila ulo ang kinahanglanon sang kabataan sa kalye. Ang kabataan nagauswag kon may yara sila malinong nga hunahuna, makalilipay nga trabaho, mapagros nga panglawas, kag pagsalig sa kaugalingon. Ang mabinuligon nga mga lalaki kag mga babayi kinabubut-on nga nagatanyag sang ila kaugalingon para sa kaayuhan sang mga wala sing puluy-an, kag dalayawon ina. Apang walay sapayan sang ila mga panikasog, ang problema tuhoy sa kabataan sa kalye nagapadayon.
Ang rason amo nga ang sistema karon nga nagapadayon sang mga kahimtangan nga nagapatubas sing wala puluy-an nga kabataan indi maremedyohan. Kaangay ini sang guba nga awto nga indi na makay-o. Sing realistiko, indi bala naton dapat kilalahon nga ang pagkamaabilidad lamang sang tawo indi makapahanabo sing isa ka matarong nga katilingban sang tawo?
Apang, sing makalilipay, posible ang pagbag-o—apang indi paagi sa mga kamot sang tawo. Ang Labing Gamhanan nga Dios lamang ang may ikasarang kag kaalam sa pagdula sing bug-os sang nagahalit sa duta. Ang iya Pulong, ang Biblia, nagasugid sa aton nahanungod sa pagdumalahan sang iya langitnon nga Ginharian kag kon paano tumanon sini ang handum sang tawo para sa matarong nga mga kahimtangan diri gid sa duta.—Daniel 2:44.
Ang Dios Nagaulikid
Sa banta mo ayhan posible nga madula sang Dios ang karon nga sistema kag ibulos ang bag-o nga dalanon sang pagkabuhi? Kon amo, dumduma nga indi lamang kaluwasan sang tawo kundi, labaw sa tanan, ang ngalan ni Jehova nga Dios ang nadalahig. Subong Manunuga, ang superlatibo nga huwaran sa pagkahim-ong kag pagkasibu sa tion, ginapasalig niya kita nga magahikot sia sa iya sibu nga tion kag paagi, kag paagi ini sa iya Ginharian. Ang matuod, ina nga Ginharian indi butang nga wala sing kapat-uran kag malubog kundi isa ka langitnon nga pangulohan, nga may ikasarang sa pag-aman sing pagdumalahan kag progresibo nga instruksion sa pag-atubang sa mga kinahanglanon sang tawo.—Isaias 48:17, 18.
Ang wala puluy-an nga bata makasalig sa ginsiling ni David sa Salmo 27:10: “Kon magbiya sa akon ang akon amay kag akon iloy, nian si Jehova magasapupo sa akon.” Makapalig-on man mahibaluan nga ang manubo nga kahimtangan sa kalibutan indi sablag sa pagtuon sang kabubut-on sang Dios. Ang Hulubaton 22:2 nagasiling: “Ang manggaranon kag ang imol nagakitaay. Si Jehova amo ang Manughimo nila tanan.” Huo, ang mga makaluluoy, kon sinsero sila, makapat-od nga si Jehova nga Dios handa sa pagbulig sa ila.—Salmo 10:14, 17.
Interesado si Jehova sa aton kaayuhan kag makahibalo magtuman sang aton matarong nga mga handum. Isa ka bes ginpamangkot niya anay ang mga Israelinhon paagi kay manalagna Isaias: “Indi bala amo ini ang puasa nga ginpili ko? . . . Indi bala ini ang pagpaambit sang imo kalan-on sa nagutom, kag nga dalhon mo sa imo balay ang mga makaluluoy nga wala sing puluy-an? Nga, kon makita mo ang hubo, panaptan mo sia?” (Isaias 58:6, 7) Amo ini ang pag-alangay kag hustisya nga pahanabuon sang Dios paagi sa iya Ginharian nga pangulohan. Wala sing bisan sin-o nga sikwayon ukon trataron nga subong bala wala sia nagaluntad. Sa amo, ang Salmo 145:19 nagapahibalo sa aton: “Tumanon niya ang handum sang mga nagakahadlok sa iya, kag pamatian niya ang ila pagtuaw, luwason sila.” Ang gugma sa Dios kag sa isigkatawo mangin amo ang daku nga kusog nga magahiusa sa tawhanon nga pamilya. Subong resulta, ang problema sang wala puluy-an nga kabataan malubad. Wala sing isa nga pabay-an!
Ang Pagkadihimpit Bala sang Tawo Magaupang sa Katuyuan sang Dios?
Indi, ang malain nga mga huyog sang tawo indi pagtugutan sa pag-upang sa katuyuan ni Jehova nga himuon ang duta nga isa ka makalilipay nga paraiso. Ang makabaton sing pribilehiyo nga magpuyo sa bag-ong kalibutan sang Dios, bangod naluwas sila sa inaway sang Armagedon, subong ginlaragway sa Biblia, ukon bangod ginbanhaw sila gikan sa minatay agod magpuyo liwat sa duta, mapalig-on sa paghimo sang ila labing masarangan.—Juan 5:28, 29; Bugna 16:14, 16.
Ang bisan sin-o nga magabaton sini indi mapaslawan sa iya binuhatan. Ang iya binuhatan pagapadyaan sing nagakahisuno. Talupangda, palihog, ang saad sang Dios: “Indi sila magpatindog kag iban ang magapuyo; indi sila magtanom kag iban ang magakaon. Kay subong sang mga adlaw sang kahoy mangin amo ang mga adlaw sang akon katawhan; kag ang akon mga pinili magakalipay sing malawig sa binuhatan sang ila mga kamot. Indi sila magpangabudlay sa wala sing pulos ukon magpanganak nga sa kalalat-an; kay sila kaliwat sang pinakamaayo ni Jehova, kag ang ila anak upod sa ila.” (Isaias 65:22, 23) Indi bala luyag mo kag sang imo pamilya nga makita ang katumanan sadtong mga pulong? Kag daw ano ka makalilipay mahibaluan nga sa amo nga tion indi na ikaw makakita sing tiggulutom, kaimulon, wala sing trabaho, ukon wala puluy-an nga kabataan!
Wala sing duhaduha, ang mga nagaantos karon sing kinawad-on, subong sang wala puluy-an nga kabataan, magapabili sing kapin pa sa mga pagpakamaayo sang isa ka makalilipay nga pamilya kag komportable nga puluy-an. Subong mabasa naton sa Isaias 65:17: “Ang una nga mga butang indi na pagdumdumon.” Masapwan sang mga tawo nga makabaton sing pribilehiyo nga magkabuhi sa amo nga tion nga ang malain nga mga kahimtangan nadula na sing dayon kag nga ang katawhan sang tanan nga pungsod, hambal, kag rasa magapangabudlay sing tingob subong isa ka mahigugmaon nga mag-ulutod. Ang mga pamilya nga makalampuwas sa amo nga tion wala sing duhaduha nga magpadayon sa paghatag sing himaya sa Dios. Ang Salmo 37:11 nagasiling tuhoy sa dutan-on nga Paraiso: “Ang mga mahagop magapanubli sang duta, kag magakalipay sila sa kabuganaan sang paghidait.”
Paano Mo Mahanda ang Imo Kaugalingon Para sa Palaabuton?
Bisan sa karon, posible nga matigayon ang nagahatag sing kabuhi nga ihibalo kag palambuon ang maayong mga kinaiya, subong sang gugma kag pagkamaluluy-on. Sa anong paagi? Ginahigugma ni Jehova ang tawhanon nga pamilya, kag paagi sa iya Anak, si Jesucristo, ‘ginabuyok [Niya] ang katawhan kay Cristo’ paagi sa Iya Pulong kag sa Iya katawhan. (Juan 6:44) May yara man sia organisasyon sa duta nga may programa sa pagtudlo nga makabulig sa imo sa paghimo sang kabubut-on sang Dios agod nga malauman mo ang isa ka makalilipay kag may katuyuan nga kabuhi sing dayon. Sa amo, ang maayong balita sang Ginharian sang Dios ginabantala sa mga nagakinahanglan sini. (Mateo 24:14) Ang Pulong sang Dios nagasiling: “Ang nagatamay sang iya isigkatawo nagapakasala, apang ang nagakaawa sa imol malipayon sia.” (Hulubaton 14:21) Makalilipay mahibaluan nga bisan ang mga imol makapalapit sa Dios kon ang ila motibo husto. Ang salmista nagsulat: “Apang ako imol kag nawad-an. Dalidali sa akon, O Dios. Ikaw ang akon kabulig kag ang akon Manugluwas. O Jehova, dili ka magpalantang.”—Salmo 70:5.
Huo, ang Pulong sang Dios makahatag sa imo sing matuod nga paglaum sa palaabuton. Apang, ang kinaandan nga paggamit sa tinaga nga “paglaum” wala pirme nagapahangop sing kapat-uran. Sa Brazil pirme mabatian sang isa ang ekspresyon nga: “A esperança é a última que morre” (kaanggid sa Ingles nga “Hope springs eternal” ukon sa Hiligaynon “Ang paglaum wala sing katapusan”). Ang ideya amo nga magpabilin nga malaumon bisan pa daw wala ini sing sadsaran. Sa kabaliskaran, ang Kasulatan nagahatag sing malig-on nga mga rason sa paghupot sing malig-on nga pagtuo sa Dios kag maglaum sa iya mga saad. Aton mabasa sa Roma 10:11: “Wala sing bisan sin-o nga nagatuo sa iya ang malugaw-an.” Inang napasad sa Biblia nga paglaum indi magadul-ong sa kapaslawan. Subong nga ang mga kalatingalahan sang aton duta matuod, nga nagapamatuod sa kaalam kag gugma ni Jehova, ang katumanan sang mga saad sang Biblia nagatugot man sa imo nga maghupot sing positibo nga pagtamod, isa ka matuod nga paglaum sa palaabuton.—Roma 15:13.
Ang Ginharian sang Dios amo ang matuod nga solusyon para sa wala puluy-an nga kabataan, huo, para sa tanan nga nagahigugma sang matarong. Ang pagtigayon karon sing sibu nga ihibalo sa Biblia magabulig sa imo sa pag-agom sing kalipay kag kabuhi nga wala sing katapusan sa bag-ong kalibutan sang Dios. Ang pagpaabot sining mga saad indi bunga sang pantasya. Subong ginasiling sang Hulubaton 11:19: “Ang malig-on sa pagkamatarong mabuhi.”
[Kahon sa pahina 11]
Temporaryo nga Solusyon?
Ang nahumlad nga kamot sang isa ka nagapakiluoy nga bata nga wala sing puluy-an makatandog sang tagipusuon. Apang indi mahibal-an sang nagaulikid nga mga indibiduwal kon ano ang himuon sa pagbulig sa wala puluy-an nga bata. Agod indi tanto matublag, ang iban nga tawo nagahulog sing pila ka sensilyo sa palad sang bata kag dalidali nga nagalakat. Apang, mahimo gid nga ang ginlimos indi magakadto sa pagkaon ukon sa puluy-an. Sa baylo, mahimo nga gamiton ini sa pagbakal sing droga ukon alkohol. Busa, ang pila sang mabinuligon sa mga banwahanon nga mga adulto nagahatag sang ila igtalupangod kag kuwarta sa mga programa nga ginasakdag sang pangulohan nga ginapatihan nila magabulig sa wala puluy-an nga kabataan. Ang iban nga tawo nagapati nga ang kapin ka praktikal nga paagi amo nga dalhon ang wala puluy-an nga bata sa nagakaigo nga ahensya agod mabuligan sia. Sa sining paagi, ginabatyag sang nagaulikid nga mga banwahanon nga ginahimo nila ang ila komunidad nga kapin ka maluluy-on.
[Laragway sa pahina 9]
“Indi sila magtanom kag iban ang magakaon.”—Isaias 65:22
[Ginkuhaan]
Retrato sang FAO
[Laragway sa pahina 10]
“Kay subong sang mga adlaw sang kahoy mangin amo ang mga adlaw sang akon katawhan.”—Isaias 65:22