Ang Inosente nga mga Biktima sang Pag-abuso sa Bata

“MALAPIT na ako sa 40 anyos karon,” siling ni Eilene.a “Kag bisan pa 30 ka tuig na nga nagligad ang problema ko, ginatublag ako sa gihapon sini. Kag bangod sini nagapabilin gihapon sa akon ang kaakig, ang pagtublag sang konsiensia, nga naghatag sing problema sa akon pagpamana! Luyag ako buligan sang iban, apang wala sila sing mahimo.” Ano ang problema ni Eilene? Sia isa ka biktima sang seksuwal nga pag-abuso sa bata, kag para sa iya ang mga epekto tuman ka dugay.

Ginabaton namon nga mabudlay hunahunaon nga inang kangil-aran nagakatabo sa madamo gid sang daw respetado nga mga panimalay. Apang bisan sa panahon sang Biblia, ang mga kabataaan ginagamit para sa “hingalit nga pagpaayaw . . . sang kailigbon sa sekso.” (The International Critical Commentary; ipaanggid ang Joel 3:3.) Ang Biblia nagtagna: “Hibalua ini, nga sa ulihi nga mga adlaw magaabot ang makahalanguyos nga tion. Kay ang mga tawo magamahigugmaon sa kaugalingon . . . wala sing kinaugali nga gugma . . . wala sing pagpugong sa kaugalingon, mabangis, wala sang gugma sa kaayuhan.” Gani, indi makapakibot sa aton nga ang pag-abuso sa bata nagakatabo karon sa daku nga kasangkaron.​—2 Timoteo 3:​1, 3, 13.

Ang pag-abuso sa bata mahimo nga indi magbilin sing pisikal nga mga agi. Kag indi tanan sang mga adulto nga nabiktima anay sang bata pa sila kitaon nga nagaantos. Apang subong sang ginsiling sang dumaan nga hulubaton: “Bisan sa kinadlaw ang tagipusuon mahimo nga masinulub-on.” (Hulubaton 14:13) Huo, madamo nga mga biktima ang may madalom nga emosyonal nga pilas​—natago nga pilas nga nagangutngot sa sulod. Apang, ngaa nian, nga ang pag-abuso sa bata nagatuga sing subong sini ka daku nga halit sa iban? Ngaa ang pagligad lamang sang tion wala pirme nagapaayo sang mga pilas nga tuga sini? Ang kasangkaron sining makapasubo nga problema nagapangayo nga talupangdon naton ini. Matuod, ang pila sang masunod nga mga problema mahimo nga indi makalilipay nga basahon​—ilabi na kon ikaw nangin biktima sang pag-abuso sa bata. Apang saligi nga may yara ikaw paglaum, nga makapasag-uli ka.

[Mga footnote]

Indi nagaisahanon si Eilene. Ginapakita sang mga surbe nga makahaladlok nga kadamuon sang mga babayi​—kag mga lalaki—​ang gin-abusuhan sa sekso. Gani, sa baylo nga isa ka tumalagsahon kag indi normal nga buhat, ang pag-abuso sa bata tuman ka lapnag kag nakasulod sa tanan nga sosyal, ekonomiko, relihioso, kag kaliwatan nga bahin.

Bangod wala nagapalareho ang kahulugan nga ginahatag sa seksuwal nga pag-abuso kag sa metodo sang pag-surbe, imposible nga matigayon ang husto nga estadistika sini.

Makalilipay nga ang kalabanan sang mga lalaki kag mga babayi wala gid nagahunahuna nga himuon ang subong sini sa ila kabataan. Apang ang pila ka may diperensia sa hunahuna kag emosyon, may amo sina nga huyog. Kag kabaliskaran sa kinaandan, ang pila nga nagaabuso sa kabataan mga tawo nga indi normal kag may huyog sa pagpatay nga nagapanago sa mga parke nga halampangan. Ang kalabanan sa ila mga tawo nga normal gid kon tulukon. Ginabusog nila ang ila tiko nga kailigbon paagi sa pagtumod sa mga inosente, madali magsalig, wala sing mahimo nga mga kabataan​—kag sa masami amo ang ila kaugalingon nga mga anak nga babayi. Kon sa publiko, malolo sila kag mahigugmaon sa ila. Apang sa tago, ginapahog nila, ginapintasan nila, kag ginahimo ang makahuluya kag malaw-ay nga porma sang pag-abuso sa sekso sa ila kabataan.

Kalabanan sining mga biktima ginaabusuhan sang kaugalingon nila nga amay ukon sang ikaduha nga bana sang ila iloy. Kon kaisa ginaabusuhan man sila sang ila magulang nga mga utod, sang ila mga tiyo, sang ila mga lolo, sang adulto nga mga kakilala, kag mga indi kilala. Sanglit kalabanan sang mga biktima mga babayi, ginapatuhuyan namon sila sa kabilugan subong mga babayi. Apang, sa kabilugan, ang mga impormasyon nga ginapakita diri naaplikar sa babayi kag sa lalaki man.