Death Metal​—Ano ang Mensahe?

ANG isa ka pamatan-on nga lalaki nga mabaris ang mata kag malaba ang buhok nagatindog sa atubangan sang nagahinugyaw kag nagaginahod nga mga humalangad. Nagkuha sia sing isa ka balde sang dugo kag mga kasudlan sang sapat kag ginbasya ini sa una nga mga raya. Ang mga humalangad nagkinadlaw, ginpahid ini sa ila kaugalingon, kag naghabuyanay. Ining danyag, suno sa St. Petersburg Times sang Florida, natabo sa isa ka rock concert sang isa ka banda nga ginatawag Deicide, nga nagakahulugan sing ‘pagpatay sa isa ka dios.’ Ini nga sahi sang musika ginatawag nga death metal, ginapatihan nga amo ang pinakamagaris nga sahi sang heavy-metal rock. Sining ulihi nga tinuig nagbantog pa ini sa Florida kag sa iban nga mga pungsod, kutob sang magmadinalag-on ang album nga natig-uluhan Scream Bloody Gore, sang isa ka banda nga ginatawag Death.

Ang banda nga Deicide ginapangunahan sang isa ka nagabaton nga Satanista nga nagasiling nga naugot sia sa Dios kutob sang ang isa ka aksidente sa salakyan nagbilin sa iya sing korte-J nga pinalian, nga napat-od niya nga nagarepresentar kay Jesus ukon kay Jehova. Nagasiling sia nga nakabati sia sing mga tingog nga nagahaylo sa iya nga patyon niya ang iya kaugalingon, kag ginsunog niya ang isa ka sataniko nga simbulo sa iya gid agtang.

Bisan gani ang mas popular nga heavy-metal nga mga grupo nagapaalinton sing malaw-ay man nga mga mensahe. Ang Time nga magasin nagbalita nga ang duha ka album nga plaka sang heavy-metal nga grupo nga Guns N’ Roses nakabaligya sing kapin sa 1.5 milyones ka kopya sa tatlo ka adlaw. Apang, ining mga album nagaunod gihapon sing ginatawag sang Time nga “walay untat nga pagpakalain [sang banda] sa mga babayi kag mabaris nga mga liriko” kag sang “ila paglakip sa pagkaugot sa mga dumuluong, rasismo kag pagkalipay sa pagsakit sa kaugalingon kag sa iban.” Nagalakip man ini sing tema subong sang oral sex, pagpatay sa isigkatawo, kag madamo nga mga pasipala. Ang pila sang madamo sing sanga nga mga balaligyaan nangindi sa pagbaligya sining mga plaka.

Ang heavy-metal rock, subong man ang iban nga rap nga musika, ginmulay sining karon lang​—kag indi lamang gikan sa relihiosong mga pundamentalista kag sobra ka konserbatibo nga politikal nga mga grupo; ang American Medical Association (AMA) kag ang American Academy of Pediatrics nagpamulong man batok sa mga katalagman sang mga liriko sining duha ka istilo sang musika. Suno sa American Health nga magasin, ang AMA nagsiling: “Ang mga mensahe nga ginalaragway sang pila ka sahi sang musika nga rock mahimo mangin makatalagam gid sa lawas kag emosyon labi na sa madali maimpluwensiahan nga mga kabataan kag mga nagahinupang.”

Makatalagam gid bala ini nga sahi sang musika? Ti, binagbinaga ang anum ka kinaandan nga tema sang rap kag heavy-metal nga ginakabig sang AMA nga mahimo makatalagam: abuso sa droga kag alkohol, paghikog, kasingki, sataniko nga pagsimba, seksuwal nga paghingalit, kag rasismo. Makapalig-on bala ina nga mga tema?​—Ipaanggid ang Hulubaton 6:​27, 28; Filipos 4:8.