Ang Pagtamod sang Biblia

Yari Na si Cristo!

“MAKARI si Mandela! Makari si Mandela!” amba sang kabataan sang Soweto, Bagatnan nga Aprika. Ang pagguwa ni Nelson Mandela gikan sa bilangguan sang Pebrero 11, 1990, ginpaabot sing daku subong pamuno sang pagbag-o sa Bagatnan nga Aprika. Apang, sa sulod sang madamo nga tuig sa wala pa sia makaguwa, ang iya presensia nabatyagan. Samtang bilanggo pa sia, aktibo sia nga nakigbahin sa “walay untat nga krusada sa pagbungkag sang pagpainay sang puti kag itom.” Subong sang ginsiling sang isa ka internasyonal nga magasin sang balita, ang 27 ka tuig nga pagkabilanggo wala “makabuhin sa iya presensia​—ukon sang iya pagpakig-away.” Ang iya pagguwa sa bilangguan nagakaigo nga nagailustrar sang kinatuhayan sang pagkari kag sang presensia.

Sing kaanggid, tuhoy sa pagbaton ni Jesucristo sang iya gahom subong hari, ginpatuhay sang mga manunulat sang Biblia sang unang siglo ang iya pagkari kag ang iya presensia. Ang presensia ni Cristo Jesus subong hari mabatyagan kag makilala sa madamo nga tinuig sa wala pa ang iya “pagkari sa mga panganod sang langit nga may gahom kag dakung himaya.” (Mateo 24:30) Ang dikitaon nga presensia (Griego, pa·rou·siʹa) ni Cristo magauna sa sining pagkari (Griego, erʹkho·mai) sa paghukom batok sa isa ka rebelyuso kag malaut nga kaliwatan.

Pa·rou·siʹa —Ano ang Buot Silingon Sini?

Ang Griegong tinaga nga pa·rou·siʹa literal nga nagakahulugan sa “tupad sang” kag “nangin amo ang opisyal nga termino para sa pagduaw sang isa ka tawo nga may mataas nga ranggo, la[bi] na sang mga hari kag mga emperador nga nagaduaw sa isa ka probinsia.” Ang Theological Dictionary of the New Testament nagasiling: “Ang [parousia] nagakahulugan la[bi] na sing aktibo nga presensia.” Kag tuhoy sa presensia ni Cristo Jesus, ang libro nga The Parousia nagasiling: “Ang Kasulatan wala gid nagahambal tuhoy sa ‘ikaduha nga Parousia.’ Kon ano man ang paagi sini, isa ini ka butang nga pinasahi gid, nga wala pa gid matabo sang una, kag indi na liwat mahanabo. Mangin isa ini ka presensia nga tuhay kag labaw sa tanan nga iban pa nga pagpadayag sang iya kaugalingon sa mga tawo.”

Sa pagkomento sa matagnaon nga mga pulong ni Jesus bilang sabat sa mga pakiana nga ginpamangkot sang mga apostoles sa Bukid sang Olivo, si Propesor A. T. Robertson sa Word Pictures in the New Testament nagsulat nga si Jesus “naggamit sang kalaglagan sang templo kag sang Jerusalem nga natabo sa sadtong kaliwatan sang A.D. 70, subong simbulo man sang iya mismo ikaduha nga pagkari kag sang katapusan sang kalibutan . . . ukon katapusan sang dag-on.” Ano ining mga pamangkot, kag paano nagsabat si Jesus?

Ang Tanda sang Presensia ni Cristo

Subong narekord sa Mateo 24:​3, ang mga apostoles namangkot: “Isugid sa amon, San-o bala mahanabo ini, kag ano bala ang tanda sang imo pagkari kag sang katapusan sang sistema sang mga butang?” Sa iya sabat, ginhatagan ni Jesus ang mga disipulo sing tanda nga mangin kitaon nga pamatuod sang iya dikitaon nga presensia sa paggahom sa Ginharian. Ang kompleto nga tanda naglakip sang walay tupong nga mga inaway, lapnag nga kakulang sing mga pagkaon, makahalapay nga mga linog, mga pamiste, kag pagdugang sang krimen kag kahadlok. Ang presensia ni Cristo mangin isa ka tion sang bug-os globo nga kagamo kag kabalaka. Ang tawhanon nga mga gobierno kag mga lider sang kalibutan indi makasarang sa paglandas sing madinalag-on sang nagakalusod nga sistema.​—Mateo 24:​7, 12; Lucas 21:11.

Nagapalig-on sang pagkamaminatud-on sang matagnaon nga mga pulong ni Jesus, ang propesor sang pagtuon sa politika, si John Meisel, nagsiling: “Ang isa ka daku nga dag-on nagahingapos, agod buslan sang isa nga ang mga balayan sini wala pa mahangpi sing bug-os.” Sa tapos magkomento tuhoy sa pagkapatay sang Komunismo, sang kapaslawan sang Sosyalismo, kag sang pagkadisangkol sang kapitalismo, si Propesor Meisel nagpadayon: “Madamo nga problema sang tawo ang indi masarangan sang siensia tuhoy sa katilingban kag dapat lubaron paagi sa iban nga mga lalang.” Kag ano ang buot silingon sina? “Ang ideolohiko nga sadsaran sang karon nga kalibutan nagakalusod kag dapat islan.”

Ang Aktibo nga Presensia ni Cristo

Walay sapayan sang mabudlay nga mga kahimtangan sang nagalain nga kalibutan, ang presensia ni Jesus nga may gahom subong hari nagsugod sang nagligad nga 75 ka tuig kag nabatyagan sa isa ka indi masaypan kag positibo nga paagi.a Walay sapayan sang kagulub-an nga gintuga sang duha ka inaway kalibutanon, ang nagalingkod sa trono nga Hari, nga si Cristo Jesus, aktibo nga nagapakigbahin sa pagporma sing isa ka bag-o nga pungsod sang katawhan​—isa ka katawhan para sa ngalan ni Jehova “gikan sa tanan nga kapungsuran kag mga tribo kag katawhan kag mga hambal.” Ang aktibo nga presensia ni Cristo nagpabaskog sang bug-os kalibutan nga programa sa pagbantala kag pagpanudlo nga nagtandog sa tagipusuon sang minilyon sang mahuyugon sa pagkamatarong nga mga indibiduwal. Napahulag sila sa pagtindog sa kiliran sang Ginharian ni Jehova sa mga kamot ni Cristo Jesus.​—Bugna 7:​9, 10.

Sa atubangan sang nagadugang nga ebidensia sa adlaw-adlaw nga ang madamo sing bahin nga tanda sang presensia ni Cristo nagakatuman, maathag nga dapat paalistuhon ang mga Cristiano nga nagaatubang kita sa katapusan sang isa ka dag-on. Karon na ang tion sa “pagpakita sing kapin sa kinaandan nga igtalupangod” sa nagalingkod sa trono nga Hari, nga si Cristo Jesus. (Hebreo 2:1) Sia nagalaygay sa aton: “Magbantay kamo, nian, sa tagsa ka dag-on nga nagaampo nga makasarang kamo sa pagpalagyo sa sining tanan nga butang nga mahanabo, kag sa pagtindog sa atubangan sang Anak sang tawo.”​—Lucas 21:36.

[Mga footnote]