Ang Presensia sang Mesias kag ang Iya Paggahom

“Ining Jesus nga ginbayaw pa langit gikan sa inyo magabalik sa amo nga bagay subong nga nakita ninyo sia nga nagapalangit.”—BINUHATAN 1:11.

1, 2. (a) Paano ginlugpayan sang duha ka anghel ang mga apostol ni Jesus sang nagkayab sia sa langit? (b) Anong mga pamangkot ang ginpautwas sang palaabuton nga pagbalik ni Cristo?

NAPULOG-ISA ka tawo ang nagatindog sa nasidlangan nga dulhugon sang Bukid sang Olibo, nga nagatangla sa langit. Mga pila pa lamang ka tion ang nagligad si Jesus nagkayab gikan sa tunga nila, ang iya dagway amat-amat nga nadula tubtob nga gintabunan ini sang panganod. Sa mga tinuig nga kaupod nila sia, nakita sining mga tawo si Jesus nga naghatag sing bugana nga pamatuod nga sia amo ang Mesias; naagihan pa gani nila ang kasubo tungod sang iya pagkapatay kag ang daku nga kalipay sang iya pagkabanhaw. Karon wala na sia.

² Hinali nga nagpakita ang duha ka anghel kag nagpamulong sining makapalugpay nga mga pulong: “Mga tawo sa Galilea, ngaa bala nagatindog kamo nga nagatulok sa langit? Ining Jesus nga ginbayaw pa langit gikan sa inyo magabalik sa amo nga bagay subong nga nakita ninyo sia nga nagapalangit.” (Binuhatan 1:11) Daw ano ka makapasalig—ang pagkayab ni Jesus sa langit wala magkahulugan nga wala na sia nagaulikid sa duta kag sa katawhan! Sa kabaliskaran, si Jesus magabalik. Walay duhaduha nga ining mga pulong naghatag sa mga apostoles sing paglaum. Minilyon ka tawo sa karon ang nagahatag man sing daku nga importansia sa saad tuhoy sa pagbalik ni Cristo. Ginapatuhuyan ini sang iban subong ang “Ikaduhang Pagkari” ukon “Pag-abot.” Apang, ang kalabanan daw nagapalibog kon ano gid ang kahulugan sang pagbalik ni Cristo. Sa anong paagi magabalik si Cristo? San-o? Kag paano ini nagaapektar sang aton mga kabuhi sa karon?

Ang Paagi sang Pagbalik ni Cristo

3. Ano ang ginapatihan sang madamong mga tawo nahanungod sa pagbalik ni Cristo?

³ Suno sa libro nga An Evangelical Christology, “ang ikaduhang pagkari ukon pagbalik ni Cristo (parousia) nagatukod sang ginharian sang Dios, sa katapusan, sa hayag, kag tubtob sa walay katapusan.” Ginapatihan sing lapnag nga ang pagbalik ni Cristo hayag nga kitaon, literal nga makita sang tagsatagsa sa planeta. Sa pagsupurtar sini nga pagpati, ginatudlo sang madamo ang Bugna 1:7, nga mabasa: “Yari karon! Nagakari sia kaupod sang mga panganod, kag ang tagsa ka mata makakita sa iya, kag ang mga naghandus sa iya.” Apang dapat bala hangpon sing literal ini nga bersikulo?

4, 5. (a) Paano naton nahibaluan nga ang Bugna 1:7 wala nagakahulugan sing literal? (b) Paano ang kaugalingon nga mga pulong ni Jesus nagakompirmar sa sining paghangop?

⁴ Dumduma, ang tulun-an sang Bugna ginhatag sa “mga tanda.” (Bugna 1:1) Ining teksto, kon amo, dapat nga simbuliko; kay ti, paano makita sang “mga naghandus sa iya” ang pagbalik ni Cristo? Halos 20 ka siglo na sila nga patay! Dugang pa, ang mga anghel nagsiling nga si Cristo magabalik “sa amo nga bagay” subong sang pagtaliwan niya. Ti, paano sia nagtaliwan? Nga may minilyon bala nga nagatan-aw? Indi, pila lamang ka mga matutom ang nakakita sa hitabo. Kag sang ang mga anghel nagpamulong sa ila, literal bala nga nakita sang mga apostoles ang paglakbay ni Cristo tubtob sa langit? Wala, isa ka panganod ang nagtabon agod indi makita si Jesus. Mga pila ka tion pagkatapos sadto, mahimo nga nagsulod sia sa espirituhanon nga mga langit subong espiritu nga persona, nga dikitaon sa tawhanon nga mga mata. (1 Corinto 15:50) Gani, nakita lamang sang mga apostoles ang pamuno sang paglakbay ni Jesus; wala nila makita ang katapusan sini, ang iya pagbalik sa langitnon nga presensia sang iya Amay, si Jehova. Nahantop lamang nila ini paagi sa ila mga mata sang pagtuo.—Juan 20:17.

⁵ Ang Biblia nagatudlo nga si Jesus magabalik sa amo man nga paagi. Si Jesus mismo nagsiling wala madugay antes sang iya kamatayon: “Sa diutay pa nga tion kag ang kalibutan indi na makakita sa akon.” (Juan 14:19) Nagsiling man sia nga “ang ginharian sang Dios wala nagaabot nga may mga tanda nga panilagan.” (Lucas 17:20) Sa anong kahulugan, nian, “ang tagsa ka mata makakita sa iya”? Sa pagsabat, kinahanglan naton anay ang maathag nga paghangop sa tinaga nga gingamit ni Jesus kag sang iya mga sumulunod may kaangtanan sa iya pagbalik.

6. (a) Ngaa ang mga tinaga subong sang “pagbalik,” “pag-abot,” kag “pagkari” indi nagakaigo nga mga badbad sang Griegong tinaga nga pa·rou·siʹa? (b) Ano ang nagapakita nga ang pa·rou·siʹa, ukon “presensia,” mas malawig sang sa bisan anong umalagi lamang nga hitabo?

⁶ Ang kamatuoran amo, labi pa sa “pagbalik” lamang ang ginhimo ni Cristo. Inang tinaga, kaangay sang “pagkari,” ukon “pag-abot,” nagapatuhoy sa isa ka hitabo sa malip-ot nga higayon sang tion. Apang ang Griegong tinaga nga gingamit ni Jesus kag sang iya mga sumulunod nagakahulugan sing labi pa. Ang tinaga nga pa·rou·siʹa, literal nga nagakahulugan sing “subong magkaupod” ukon “presensia.” Ang kalabanan nga mga iskolar nagaugyon nga ining tinaga nagalakip indi lamang sang pag-abot kundi sang nagsunod man nga presensia—subong sang isa ka opisyal nga pagduaw gikan sa isa ka harianon nga tawo. Ining presensia indi isa ka umalagi lamang nga hitabo; isa ini ka pinasahi nga dag-on, isa ka natandaan nga panag-on sang tion. Sa Mateo 24:37-39, si Jesus nagsiling nga “ang presensia [pa·rou·siʹa] sang Anak sang tawo” mangin kaangay sang “mga adlaw ni Noe” nga natapos sa Anaw. Si Noe nagtukod sang arka kag nagpaandam sa mga malauton sing mga dekada sa wala pa mag-abot ang Anaw kag nagpapas sa sadtong malauton nga sistema sang kalibutan. Nian, sa kaanggid man, ang dikitaon nga presensia ni Cristo magalawig sa isa ka panag-on sang mga pila ka dekada antes ini man magatapos sa isa ka daku nga kalaglagan.

7. (a) Ano ang nagapamatuod nga ang pa·rou·siʹa indi makita sang tawhanon nga mga mata? (b) Paano kag san-o matuman ang mga kasulatan nga nagalaragway sang pagbalik ni Cristo subong kitaon sa “tagsa ka mata”?

⁷ Sa walay duhaduha, ang pa·rou·siʹa indi literal nga kitaon sa tawhanon nga mga mata. Kay kon amo, ngaa naghinguyang si Jesus sing tuman kadamo nga tion, subong sang makita naton, sa paghatag sa iya mga sumulunod sing tanda sa pagbulig sa ila nga mahantop ang iya presensia?⁠a Walay sapayan, kon si Cristo magakari sa paglaglag sa bug-os kalibutan nga sistema ni Satanas, ang kamatuoran sang iya presensia madayag gid sa tanan. Amo ini nian nga “ang tagsa ka mata makakita sa iya.” Bisan ang mga kaaway ni Jesus makahantop, sa kahadlok nila, nga ang paggahom ni Cristo matuod.—Tan-awa ang Mateo 24:30; 2 Tesalonica 2:8; Bugna 1:5, 6.

Kasan-o Ini Nagsugod?

8. Anong hitabo ang nagatanda sang pamuno sang presensia ni Cristo, kag diin ini natabo?

⁸ Ang presensia sang Mesias nagasugod paagi sa isa ka hitabo nga nagatuman sang sulit-sulit nga tema sang Mesianikong mga tagna. Ginpurungpurungan sia subong Hari sa langit. (2 Samuel 7:12-16; Isaias 9:6, 7; Ezequiel 21:26, 27) Ginpakita mismo ni Jesus nga ang iya presensia igaangot sa iya pagkahari. Sa pila ka mga ilustrasyon, ginpaanggid niya ang iya kaugalingon sa agalon nga nagbiya sang iya panimalay kag mga ulipon, naglakbay sa malawig nga tion sa “malayong duta” sa pagbaton “sing harianon nga gahom.” Ginhatag niya ang isa sinang ilustrasyon subong bahin sang iya sabat sa pamangkot sang iya mga apostoles nahanungod sa kon san-o magasugod ang iya pa·rou·siʹa; naghatag sia sing isa pa bangod “naghunahuna sila nga ang ginharian sang Dios magapahayag sa gilayon.” (Lucas 19:11, 12, 15; Mateo 24:3; 25:14, 19) Gani sadtong yari sia sa duta subong tawo, ang iya koronasyon madugay pa katama, nga mahanabo sa “malayong duta” sang langit. San-o ini mahanabo?

9, 10. Ano ang pamatuod nga si Cristo nagagahom karon sa langit, kag kasan-o sia nagsugod sa iya paggahom?

⁹ Sang ang mga disipulo ni Jesus namangkot sa iya: “Ano bala ang tanda sang imo presensia kag sang konklusion sang sistema sang mga butang?” si Jesus nagsabat paagi sa paghatag sa ila sing detalyado nga laragway sinang palaabuton nga tion. (Mateo, kapitulo 24; Marcos, kapitulo 13; Lucas, kapitulo 21; tan-awa man ang 2 Timoteo 3:1-5; Bugna, kapitulo 6.) Ining tanda katumbas sa isa ka detalyado nga laragway sang isa ka magamo nga dag-on. Isa ini ka tion nga ginatandaan sang internasyonal nga mga inaway, nagalala nga krimen, nagausmod nga pagkabuhi sang pamilya, mga epidemia nga balatian, mga tiggulutom, kag mga linog​—⁠indi subong lokal nga mga problema kundi subong bug-os globo nga krisis. Pamilyar bala ini? Ang kada nagaligad nga adlaw nagapalig-on nga ang ika-20 nga siglo nagakaigo sing bug-os sa paglaragway ni Jesus.

¹⁰ Ang mga istoryador nagaugyon nga ang 1914 amo ang importante nga punto sa tawhanon nga maragtas, ang importante nga tuig diin madamo sining mga problema ang nagsugod nga indi matapna, nagdugang sa tugob-globo nga kasangkaron. Huo, ang mga hitabo sa pisikal nga kalibutan bilang katumanan sang tagna sa Biblia nagatudlo tanan sa 1914 subong ang tuig nga si Jesus nagsugod sa paggahom subong Hari sa langit. Dugang pa, ang tagna sa Daniel kapitulo 4 nagahatag sing pasunod nga pamatuod nga nagadul-ong sa sina man nga tuig—1914—subong ang tion nga ang gintangdo ni Jehova nga Hari magasugod sang iya paggahom.b

Ngaa Isa ka Tion sang mga Kagamo?

11, 12. (a) Ngaa mabudlay para sa iban ang magtuo nga si Cristo nagagahom karon sa langit? (b) Paano naton mailustrar kon ano ang natabo sa tapos si Jesus ginpurungpurungan subong Hari?

¹¹ Apang, ang iban natingala, ‘Ngaa ang kalibutan tuman kagamo kon ang Mesias nagagahom sa langit? Indi bala epektibo ang iya paggahom?’ Ang isa ka ilustrasyon mahimo makabulig. Ang isa ka pungsod ginagamhan sang isa ka malaut nga presidente. Nagtukod sia sing dunot nga sistema nga may nagakontrol nga impluwensia nga nagalab-ot sa tagsa ka bahin sang duta. Apang ginhiwat ang isa ka piniliay; ang maayo nga tawo nagdaug. Karon ano ang matabo? Subong sa kaso sang pila ka demokratiko nga mga pungsod, nagautwas ang pila ka bulan nga panag-on sang transisyon antes inagurahan ang bag-ong presidente. Paano ining duha ka tawo magapanghikot sa sinang panag-on? Ang maayo nga tawo gilayon bala nga magaatake kag magadula sang tanan nga mga kalautan nga ginhimo sang ginbuslan niya sa bug-os nga pungsod? Indi bala nga, sa baylo, magakonsentrar anay sia sa kapital nga siudad, magatukod sing bag-o nga gabinete kag magapadala sing pahibalo sa malaut nga mga abyan kag tinawo sang presidente anay? Sa sinang paagi, kon may bug-os na sia nga awtoridad, sarang sia makapanghikot gikan sa isa ka matinlo, epektibo nga lugar. Nahanungod sa malain nga presidente, indi bala nga hingalitan niya ang nabilin niya nga malip-ot nga tion agod kuhaon gikan sa pungsod ang tanan nga manggad nga natigayon niya sa malain nga paagi sa masarangan niya antes niya madula ang tanan nga gahom?

¹² Sa pagkamatuod, amo man ini sa pa·rou·siʹa ni Cristo. Ginapakita sang Bugna 12:7-12 nga sang si Cristo ginhimo nga Hari sa langit, gintagbong niya anay si Satanas kag ang mga demonyo gikan sa langit, busa nagtinlo sang duog sang Iya panguluhan. Bangod nag-antos sining madugay na ginhulat nga kapierdehan, paano nagapanghikot si Satanas sa “malip-ot nga tion” antes himuon ni Cristo ang iya bug-os nga awtoridad diri sa duta? Kaangay sang malaut nga presidente, ginatinguhaan niya nga kuhaon ang tanan nga butang nga masarangan niya gikan sa sining daan nga sistema. Indi niya luyag ang kuwarta; luyag niya ang mga sumulunod. Luyag niya ihamulag ang mas madamo nga mga tawo gikan kay Jehova kag sa Iya nagagahom nga Hari tubtob sa masarangan niya.

13. Paano ginapakita sang Kasulatan nga ang pamuno sang paggahom ni Cristo mangin isa ka magamo nga tion diri sa duta?

¹³ Indi katingalahan, nian, nga ang pamuno sang paggahom sang Mesias nagakahulugan sang isa ka tion sang ‘kailo sa duta.’ (Bugna 12:12) Sa kaanggid, ginapakita sang Salmo 110:1, 2, 6 nga ang Mesias nagasugod sang iya paggahom sa ‘tunga sang iya mga kaaway.’ Sa ulihi lamang nga dugmukon niya sing bug-os ang “mga pungsod,” upod ang tagsa ka bahin sang malaut nga sistema ni Satanas, tubtob malipatan na!

Kon ang Mesias Nagagahom sa Duta

14. Ano ang sarang mahimo sang Mesias pagkatapos niya malaglag ang malauton nga sistema sang mga butang ni Satanas?

¹⁴ Pagkatapos niya malaglag ang sistema ni Satanas kag ang tanan nga nagasakdag sini, ang Mesianikong Hari, si Jesucristo, sa ulihi mangin sa posisyon nga tumanon ang matahom nga mga tagna sa Biblia nga nagalaragway sining Milenyo nga Paggahom. Ang Isaias 11:1-10 nagabulig sa aton nga makita kon ano gid nga sahi sang gumalahom ang Mesias. Ang bersikulo 2 nagasugid sa aton nga sia may ‘espiritu ni Jehova . . . , espiritu sang kaalam kag paghangop, espiritu sang laygay kag kusog.’

15. Ano ang kahulugan sang ‘espiritu sang kusog’ sa Mesianikong paggahom?

¹⁵ Binagbinaga kon ano ang kahulugan sang ‘espiritu sang kusog’ sa paggahom ni Jesus. Sadtong yari sia sa duta, may daku sia nga kusog gikan kay Jehova, nga nagpaposible sa iya sa paghimo sing mga milagro. Kag ginpakita niya ang tinagipusuon nga handum nga makabulig sa mga tawo, nga nagasiling, “Buot ko.” (Mateo 8:3) Apang ang iya mga milagro sadto anay abanse lamang nga pasiplat sa kon ano ang pagahimuon niya kon magagahom sia gikan sa langit. Si Jesus magahimo sing mga milagro sa bug-os globo nga kasangkaron! Ang masakiton, bulag, bungol, kumpol, kag piang nga mga tawo pagaayuhon sing dayon. (Isaias 35:5, 6) Ang bugana nga pagkaon, nga ginapanagtag sing alangay, magatapos sing dayon sa tiggulutom. (Salmo 72:16) Kamusta yadtong dimaisip nga minilyon sa lulubngan nga ginkahamut-an sang Dios nga dumdumon? Ang “kusog” ni Jesus magalakip sang ikasarang sa pagbanhaw sa ila, nagahatag sa tagsa sing kahigayunan nga magkabuhi sing dayon sa Paraiso! (Juan 5:28, 29) Apang, bisan upod ining tanan nga kusog, ang Mesianikong Hari mangin pirme gid nga mapainubuson. “Magakalipay sia sa kahadlok kay Jehova.”—Isaias 11:3.

16. Anong sahi sang Hukom ang Mesianikong Hari, kag paano ina kabaliskaran sa rekord sang tawhanon nga mga hukom?

¹⁶ Ining Hari mangin isa man ka himpit nga hukom. “Indi sia maghukom suno sa itololok sang iya mga mata, ukon maghusay suno sa pagpamati sang iya mga igdulungog.” Anong tawhanon nga hukom, sang nagligad ukon karon, ang sarang malaragway sa sinang paagi? Bisan ang tuman kaayo magdesisyon nga tawo makahukom lamang paagi sa kon ano ang iya nakita kag nabatian, nagagamit sang bisan anong kaalam ukon paghantop nga ginapanag-iyahan niya. Busa, ang mga hukom kag mga hurado sining daan nga kalibutan mahimo madala ukon magumon sang tuso nga pangatarungan, mga daya sa hukmanan, ukon nagasumpakilay nga ebidensia. Sa masami ang manggaranon kag gamhanan lamang ang makasarang sang isa ka epektibo nga depensa, nga sing aktuwal pagbakal sang katarungan. Indi amo sina sa idalom sang Mesianikong Hukom! Ginabasa niya ang mga tagipusuon. Wala sing butang nga indi niya makita. Ang katarungan, nga ginalakipan sang gugma kag kaluoy, wala ginabaligya. Pirme ini magapangibabaw.—Isaias 11:3-5.

Kon Paano ang Iya Paggahom Nagaapektar sa Imo

17, 18. (a) Anong makalilipay nga larawan tuhoy sa palaabuton sang katawhan ang ginalaragway sa Isaias 11:​6-9? (b) Kay sin-o labi na naaplikar ining tagna, kag ngaa? (c) Paano ining tagna may literal nga kahulugan?

¹⁷ Sing halangpunon, ang paggahom sang Mesias may daku nga impluwensia sa iya mga sakop. Nagabalhin ini sang mga tawo. Ginapakita sang Isaias 11:6-9 kon daw ano kadaku ina nga mga pagbalhin. Ini nga tagna nagalaragway sang makatalandog nga larawan sang makatalagam, nagapanukob nga mga sapat—mga oso, mga lobo, mga leopardo, mga leon, mga kobra—kaupod sang mahagop nga mga sapat kag bisan sang mga bata. Apang ang nagapanukob nga mga sapat indi makatalagam! Ngaa? Ang bersikulo 9 nagasabat: “Indi sila maghalit ukon maglaglag sa bug-os ko nga bukid nga balaan; kay ang duta matugob sang ihibalo ni Jehova subong nga ang mga tubig nagatabon sang dagat.”

¹⁸ Sa pagkamatuod, ang “ihibalo ni Jehova” wala sing epekto sa literal nga mga sapat; busa ining mga bersikulo labi na nga naaplikar sa mga tawo. Ang paggahom sang Mesias nagasakdag sang tugob-globo nga programa sang edukasyon, nagatudlo sa mga tawo nahanungod kay Jehova kag sang iya mga dalanon, nagatudlo sa tanan nga tratuhon ang ila isigkatawo nga may gugma, pagtahod, kag dignidad. Sa nagapakari nga Paraiso, ang Mesias milagruso nga magabayaw sang katawhan sa pisikal kag moral nga kahimpitan. Ang nagapanukob, sapatsapaton nga mga batasan nga nagapalaw-ay sa tawhanon nga kinaugali pagadulaon. Sa literal nga kahulugan, ang katawhan magapakighidait man sa mga sapat​—⁠sa katapusan!—Ipaanggid ang Genesis 1:28.

19. Paano ang paggahom sang Mesias nagaapektar sang kabuhi sang katawhan sa sining katapusan nga mga adlaw?

¹⁹ Apang, dumduma nga ang Mesias nagagahom karon. Bisan karon, ang mga sakop sang iya Ginharian nagatuon sa pagkabuhi sing tingob sing mahidaiton, nagatuman sang Isaias 11:6-9 sa isa ka kahulugan. Dugang pa, sa halos 80 na ka tuig, si Jesus nagtuman sang Isaias 11:10: “Sa sadto nga adlaw ang gamot ni Jesse magatindog subong nga hayahay sang mga katawhan. Sa iya magapangita ang mga pungsod, kag ang iya palahuwayan mangin mahimayaon.” Ang katawhan sang tanan nga mga pungsod magakadto sa Mesias. Ngaa? Bangod kutob sang nagsugod sia sa paggahom, ‘nagtindog sia subong nga hayahay.’ Ginapahibalo niya ang iya presensia sa bug-os nga kalibutan paagi sa masangkad nga programa sang edukasyon nga ginlaragway sa ibabaw. Sa katunayan, si Jesus nagtagna nga ang tugob-globo nga hilikuton sang pagbantala mangin isa ka talalupangdon nga tanda sang iya presensia antes matapos ining daan nga sistema.—Mateo 24:14.

20. Anong panimuot ang dapat likawan sang tanan nga mga sakop sang paggahom sang Mesias, kag ngaa?

²⁰ Gani ang presensia ni Cristo nga may Harianon nga gahom indi isa ka pahapyaw kag teoritiko nga butang, isa lamang ka topiko sang maalamon nga binais sa tunga sang mga teologo. Ang iya paggahom nagaapektar kag nagabalhin sang mga kabuhi diri sa duta, subong sang gintagna ni Isaias nga himuon sini. Gintuytuyan ni Jesus ang minilyon nga mga sakop sang iya Ginharian paguwa sa sining dunot nga sistema sang kalibutan. Amo bala ikaw sina nga sakop? Nian mag-alagad upod ang bug-os nga kapagsik kag kalipay nga nagakabagay sa aton Gumalahom! Huo, tuman kahapos ang kapuyon, ang magbuylog sa mayubiton nga singgit sang kalibutan: “Diin bala ang saad sang iya presensia?” (2 Pedro 3:4) Apang subong sang ginsiling mismo ni Jesus, “ang nagapadayon tubtob sa katapusan maluwas.”—Mateo 24:13.

21. Paano naton tanan mahimo mapasangkad ang aton apresasyon para sa Mesianikong paglaum?

²¹ Ang tagsa ka adlaw nga nagaligad nagapalapit sing labi sa aton sa dakung adlaw nga si Jehova magasugo sa Iya Anak nga ipadayag ang iya presensia sa bug-os nga kalibutan. Indi gid pagtuguti nga magaugdaw ang imo paglaum sa sina nga adlaw. Magpamalandong sa pagka-Mesias ni Jesus kag sa iya mga kinaiya subong nagagahom nga Hari. Hunahunaa man sing tudok ang nahanungod kay Jehova nga Dios, ang awtor kag utok sang dakung Mesianikong paglaum nga ginbalay sa Biblia. Samtang ginahimo mo ini, walay duhaduha nga magabatyag ka sing labi kag labi subong sang ginbatyag ni apostol Pablo sang nagsulat sia: “O pagkadalom sang kamanggaran kag kaalam kag ihibalo sang Dios!”—Roma 11:33.

[Mga footnote]

Paano Mo Sabton?

◻ Sa anong paagi magabalik si Cristo?

◻ Paano naton nahibaluan nga ang pa·rou·siʹa ni Cristo dikitaon kag nagadugay sa malawiglawig nga tion?

◻ Kasan-o nagsugod ang presensia ni Cristo, kag paano naton ini nahibaluan?

◻ Anong sahi sang langitnon nga Gumalahom ang Mesias?

◻ Sa anong mga paagi ang paggahom ni Cristo nagaapektar sa kabuhi sang iya mga sakop?

[Laragway sa pahina 15]

Ang paglaum nga si Jesus magabalik may daku nga kahulugan sa iya matutom nga mga apostoles

[Laragway sa pahina 17]

Nagagahom gikan sa langit, si Jesus magahimo sing mga milagro sa tugob-globo nga kasangkaron

[Kapsion]

Duta: Pasad sa retrato sang NASA