Paghatag sing Kapawa sa Presensia ni Cristo

“Kon magkari ang Anak sang tawo sa iya himaya, . . . painpainon niya ang katawhan.”​—⁠MATEO 25:​31, 32.

1. Paano ginpatpat sang mga klero sang Cristiandad ang mga pulong sa Mateo 24:⁠3?

TATLO ka adlaw sa wala pa mapatay si Jesus, nagpalapit sa iya ang apat sang iya mga disipulo kag hanuot nga namangkot: “Isugid sa amon, san-o bala mahanabo ining mga butang? kag ano ang mangin tanda sang imo pagkari [Griego, pa·rou·siʹa], kag sang katapusan sang kalibutan?” Sa sulod sang mga siglo ginpatpat sang mga klero kag mga manunulat sang Cristiandad ining mga pulong nga ginpamulong kay Jesus sa Mateo 24:3 (King James Version) subong nagakahulugan nga sia liwat magakari sa unod agod makita sang tanan nga katawhan. Busa, gintudlo nila nga ang pagbalik ni Cristo pagaupdan sing dakung pasundayag kag kitaon nga mga butang. Ginatawag nila ini nga ikaduha nga pagkari ni Cristo. Apang husto bala ang ila pagpati?

2, 3. (a) Paano ginpatuhay sang Tomo 2 sang Studies in the Scriptures ang mga tinaga nga “pagkari” kag “presensia”? (b) Ano ang nahangpan sang katawhan ni Jehova tuhoy sa kahulugan sang pa·rou·siʹa ni Cristo?

² Sang 1889, ang mga hinaplas ni Jehova, subong amo ang mga manugdala sing kapawa sa ika-19 nga siglo, nakabaton na sing pagtadlong tuhoy sa pagbalik ni Cristo. Sa Tomo 2 sang Studies in the Scriptures, pahina 158 tubtob 161, si ­Charles T. Russell, ang unang presidente sang Watch Tower Bible and Tract Society, nagsulat: “Ang parousia . . . nagakahulugan sing presensia, kag indi gid dapat badbaron nga pagkari, subong sang sa kinaandan nga Ingles nga Biblia . . . Ang ‘Emphatic Diaglott,’ nga isa ka hamili gid nga badbad sang Bag-ong Testamento, husto nga nagabadbad sang parousia, presensia . . . , indi pagkari, nga subong bala nagapadulong, kundi. . . presensia, kay sa tapos sang pag-abot . . . [si Jesus] nagsiling, ‘Subong sang mga adlaw ni Noe, amo man ang parousia [presensia] sang Anak sang tawo.’ Talupangda, nga ang pagpaanggid indi sa ulot sang pagkari ni Noe kag sang pagkari sang aton Ginuo . . . Ang pagpaanggid, kon amo, amo ang sa ulot sang panahon sang presensia ni Noe sa tunga sang katawhan ‘sa wala pa ang anaw,’ kag sang panahon sang presensia ni Cristo sa kalibutan, sa iya ikaduha nga pagkari, ‘sa wala pa ang kalayo’​—⁠ang daku nga kagamo sa Adlaw ni Ginuong [Jehova] nga magatapos sining dag-on.”​—⁠Mateo 24:⁠37.

³ Gani ang katawhan ni Jehova sa ika-19 nga siglo husto nga nakahangop nga ang pa·rou·siʹa ni Cristo indi makita. Nahangpan man nila nga ang katapusan sang Panag-on sang mga Gentil nahanabo sang tigragas sang 1914. Samtang nagasanag ang espirituwal nga kasanagan, nahangpan nila sang ulihi nga si Jesucristo ginpalingkod sa trono sa langit subong Hari sang Ginharian sa amo man nga tuig, 1914.​—⁠Hulubaton 4:18; Daniel 7:​13, 14; Lucas 21:24; Bugna 11:⁠15.

“Ang Presensia sang Aton Ginuo”

4. “Ang presensia sang aton Ginuong Jesucristo” nagapatuhoy sa ano?

⁴ Sa aton adlaw, nian, ano ang buot silingon sang ekspresyon sa Biblia nga “ang presensia sang aton Ginuong Jesucristo”? (1 Tesalonica 5:23) Ang isa ka awtoridad nagkomento nga ang termino nga “presensia,” pa·rou·siʹa, “nangin isa ka opisyal nga termino para sa pagduaw sang isa ka tawo nga may mataas nga ranggo, labi na sang mga hari kag mga emperador nga nagaduaw sa isa ka probinsia.” Gani ining ekspresyon nagapatuhoy sa dungganon nga presensia ni Ginuong Jesucristo subong Hari, kutob kag pagkatapos sang 1914, sa tapos ginpalingkod sa trono sa langit. Sia dikitaon nga presente sa ‘paggahom sa tunga sang iya mga kaaway,’ aktibo nga nagagahom subong Hari sa pagtuman sining matagnaon nga sugo. (Salmo 110:⁠2) Sa mga 79 ka tuig, naeksperiensiahan sang katawhan sa duta ang mga epekto sang dikitaon nga presensia ni Cristo bilang Hari.

5. Ano nga mga hitabo sa panahon sang pa·rou·siʹa ang pagahambalan sa tatlo ka tulun-an nga artikulo sini nga magasin?

⁵ Sa sini nga serye sang tatlo ka artikulo, repasuhon naton ang talalupangdon nga pamatuod sang mga nahimuan sang Ginharian ni Cristo sa sulod sining panahon. Una, ipresentar namon ang pila ka tagna sang Biblia nga nagatagna sang mga hitabo nga natabo na ukon nagakatabo karon. Ikaduha, ilaragway namon ang dakung hilikuton nga ginahimo sang matutom kag mainandamon nga ulipon nga klase nga ginagamit ni Jesus sa sining bug-os nga panahon sang iya harianon nga presensia. (Mateo 24:​45-47) Ilaragway sang ikatlo nga artikulo para sa aton ang daku nga katapusan, ang panahon sang “dakung kapipit-an.” Amo ina ang tion nga si Jesus magakari subong Manuglaglag ni Jehova sa paglaglag sa dimatarong nga mga tawo kag sa pagluwas sa mga matarong. (Mateo 24:​21, 29-31) Ina nga tion sang kalaglagan ginlaragway ni apostol Pablo subong nagadala ‘sa inyo nga nagaantos sing kapipit-an, sing kapahuwayan kaupod namon sa pagpahayag ni Ginuong Jesus gikan sa langit kaupod sang iya gamhanan nga mga anghel sa nagadabdab nga kalayo, nga nagatimalos sa mga wala nagakilala sa Dios kag sa mga wala nagatuman sang maayong balita sang aton Ginuong Jesus.’​—⁠2 Tesalonica 1:​7, 8.

Ang Tanda

6. Anong kabilugan nga tanda ang ginalaragway sa Mateo kapitulo 24 kag 25?

⁶ Napulog-siam ka gatos ka tuig sang una, ang manugdala sing kapawa nga mga disipulo ni Jesus nangayo sa iya sing isa ka tanda, ukon ebidensia, sang iya palaabuton nga presensia sa paggahom sa Ginharian. Ang iya sabat, nga ginrekord sa ika-24 kag ika-25 nga kapitulo sang Mateo, naghatag sing isa ka kabilugan nga tanda, nga ang tanan nga bahin sini nagakatuman karon sa bug-os nga kalibutan. Ang katumanan sina nga tanda nagatanda sang isa ka tion sang kasisit-an kag dakung pagtilaw. Si Jesus nagpaandam: “Andam kamo nga walay tawo nga magpatalang sa inyo; kay madamo ang magakari sa akon ngalan, nga nagasiling, ‘Ako ang Cristo,’ kag magapatalang sang madamo. Makabati kamo sing mga inaway kag mga kinonokono sang mga inaway; talupangda ninyo nga indi kamo magkalalisang. Kay ini kinahanglan nga mahanabo, apang indi pa ang katapusan.”​—⁠Mateo 24:​4-6.

7. Ano nga mga bahin sang tanda ang nakita naton nga natuman kutob sang 1914?

⁷ Si Jesus dugang pa nga nagtagna nga mahanabo ang mga inaway sa walay tupong nga kasangkaron. Sa katumanan sini, duha sini ang ginkabig subong mga inaway kalibutanon, ang isa halin sang 1914 tubtob 1918 kag ang ikaduha halin sang 1939 tubtob 1945. Dugang pa, nagsiling sia nga mahanabo ang kakulang sing mga kalan-on kag mga linog sa lainlain nga mga duog. Ang matuod nga mga Cristiano hingabuton sing mabaskog. Nahisanto gid sa tagna, ang mga Saksi ni Jehova, ang modernong mga manugdala sing kapawa, nag-antos sing paghingabot sa nagligad nga walo ka dekada samtang nagabantala sing maayong balita sang Ginharian sang Dios “sa bug-os napuy-an nga duta subong panaksi sa tanan nga kapungsuran.” (Mateo 24:​7-14) Ang tagsa ka Yearbook of Jehovah’s Witnesses nagadugang sing ebidensia nga ining mga bahin sang tanda nagakatuman.

8, 9. (a) Ano ang nadalahig sa harianon nga presensia ni Jesus? (b)Ano ang ginapakita sang tagna ni Jesus tuhoy sa butig nga mga Cristo tuhoy sa duog kag paagi sang iya presensia?

⁸ Sanglit ang pagkahari ni Jesus nagalakip sa bug-os nga duta, ang matuod nga pagsimba nagasangkad sa tanan nga kontinente. Ang iya harianon nga presensia (pa·rou·siʹa) isa ka tion sang pag-usisa sa bug-os nga globo. (1 Pedro 2:12) Apang may yara bala isa ka kapital nga siudad, ukon sentro, diin sarang makadtuan si Jesus? Ginsabat ini ni Jesus paagi sa pagtagna nga subong pagpaabot sa iya presensia, magalutaw ang butig nga mga Cristo. Nagpaandam sia: “Kon magsiling sila sa inyo, ‘Yari karon! Yara sia [Cristo] sa kamingawan,’ dili kamo magkadto; ‘Yari karon! yara sia sa nasulod nga mga hulot,’ dili kamo magtuo sini. Kay subong sang kilat nga nagaidlab sa sidlangan kag makita tubtob sa katundan, amo man ang presensia [pa·rou·siʹa] sang Anak sang tawo.”​—⁠Mateo 24:​24, 26, 27.

⁹ Labaw nga maayo sangsa bisan sin-o sa duta, si Jesus, nga “Anak sang tawo,” nakahibalo kon sa diin sia makita kon aktuwal nga magsugod na ang iya presensia. Indi sia magakadto diri ukon didto ukon sa bisan anong partikular nga duog sa duta. Indi sia magapakita sa nabaw-ing nga duog, “sa kamingawan,” agod nga ang mga mangita sa Mesias makakonsulta sa iya nga indi makita sang mga awtoridad sang gobierno sang duta, isa ka duog diin ang mga sumulunod makahanas sa idalom sang iya pagpanguna, nagahanda sa paghimo sing politikanhon nga pagsalakay kag himuon sia nga Mesianikong Manuggahom sang kalibutan. Dugang pa, indi niya pagtaguon ang iya kaugalingon sa “nasulod nga mga hulot,” nga mahibaluan sang pila lamang nga pinili, agod nga didto, nga indi makita kag mamutikan, mahimo sia makahimbon kag makahimo sing sekreto nga mga plano nga may kakomplot sa pagpukan sa mga gobierno sang kalibutan kag ipahaplas ang iya kaugalingon subong ang ginsaad nga Mesias. Indi!

10. Paano ang mga kilat sang kamatuoran sang Biblia nag-idlab sa bug-os nga globo?

¹⁰ Sa kabaliskaran, wala sing dapat itago nahanungod kay Jesus subong Hari, sa pamuno sang iya harianon nga presensia. Subong gintagna ni Jesus, sa bug-os nga globo, ang mga kilat sang kamatuoran sang Biblia padayon nga nagaidlab sa ibabaw sang masangkad nga mga duog halin sa nasidlangan nga mga bahin tubtob sa nakatundan nga mga bahin. Sa pagkamatuod, subong modernong mga manugdala sing kapawa, ang mga Saksi ni Jehova isa ka “kapawa sang mga pungsod, agod nga ang pagluwas [ni Jehova] magalab-ot tubtob sa ukbong sang duta.”​—⁠Isaias 49:⁠6.

Pagpanghikot sang mga Anghel

11. (a) Sa anong paagi ginagamit ang mga anghel sa pagpasiga sing kapawa sang Ginharian? (b) San-o kag sa anong grupo gintipon ang mga katapo sang trigo nga klase?

¹¹ Ang iban pa nga mga teksto tuhoy sa presensia ni Jesus nagalaragway sa iya subong ginaupdan sang, ukon ‘nagapadala,’ sing mga anghel. (Mateo 16:27; 24:31) Sa ilustrasyon sang trigo kag mga gamhon, nagsiling si Jesus nga “ang uma amo ang kalibutan” kag nga “ang tig-alani amo ang katapusan sang sistema sang mga butang, kag ang mga mangangani amo ang mga anghel.” Apang, wala ini nagakahulugan nga sa panahon sang iya presensia nga may gahom kag himaya sa Ginharian, mga anghel lamang nga mga mensahero ang ginagamit niya para sa mga misyon sa duta. Sugod sang 1919, ginpain sang mga anghel sa idalom sang pagtuytoy ni Jesus ang trigo nga klase sang mga hinaplas sang espiritu sa duta, nga ginpaaplaag sang mga hitabo sang Inaway Kalibutanon I, kag ginhanda sila para sa dugang pa nga pagpanghikot sa ngalan sang Hari. (Mateo 13:​38-43) Sang dekada 20 linibo pa ka tawo ang nagdampig sa natukod na nga Ginharian sang Dios kag ginhaplasan sila sing espiritu sang Dios. Ining mga hinaplas epektibo nga gindugang sa grupo sang orihinal nga nagkalabilin. Sing tingob, nagahuman sila sang matutom kag mainandamon nga ulipon nga klase para sa aton adlaw.

12. Sa anong pagpaninlo nagpakigbahin ang mga anghel, kag ano ang resulta sa duta?

¹² Ang isa pa ka halimbawa sang pagpakigbahin sang mga anghel sa panahon sang presensia ni Jesus sa tapos sang iya paglingkod sa trono sang 1914 narekord sa Bugna 12:​7-9: “Si Miguel [Jesucristo] kag ang iya mga anghel nagpakig-away batok sa dragon, kag ang dragon kag ang iya mga anghel nagpakig-away, apang gindaug sila, kag wala na sing duog sa ila sa langit. Gani ginhulog ang dakung dragon, yanang dumaan nga man-ug, nga ginatawag nga Yawa kag Satanas, nga nagapatalang sa bug-os napuy-an nga duta; ginhulog sia sa duta, kag ang iya mga anghel ginhulog kaupod niya.” Sa amo, ang mga langit natinluan na karon, kag ang tilinluan pa amo ang dutan-on nga bahin sang Ginharian para sa pagpakabalaan sang ngalan ni Jehova. Sa karon nga tuig sang 1993, ang balaan nga paandam nagapadayon: “Kailo sa duta . . . kay ang Yawa nagpanaug sa inyo, nga may dakung kasingkal, bangod nahibaluan niya nga malip-ot na lamang ang iya tion.”​—⁠Bugna 12:⁠12.

Langitnon nga Pagkabanhaw

13, 14. (a) Ano ang ginapakita sang Kasulatan nga nagakatabo kutob sang 1918 padayon? (b) Ano ang ginpahayag ni Pablo kag ni Juan tuhoy sa hinaplas nga nagkalabilin karon?

¹³ Ang isa pa ka makatilingala nga hitabo sa panahon sang presensia ni Cristo amo ang pagsugod sang langitnon nga pagkabanhaw. Ginpakita ni apostol Pablo nga ang hinaplas nga mga Cristiano nga madugay na nagakatulog sa ila mga lulubngan amo ang unahon nga banhawon kag magakabuhi upod kay Cristo Jesus sa duog sang mga espiritu. Ang ebidensia ginpresentar sa sulod sang mga tinuig nga mahimo nga natabo ini kutob sang 1918 padayon. Si Pablo nagsulat: “Kay Cristo ang tanan buhion. Apang ang tagsa sa iya kaugalingon nga paagisod: si Cristo ang panganay, ugaling ang mga iya ni Cristo sa presensia [pa·rou·siʹa] niya.” (1 Corinto 15:​22, 23) Ang pagkabanhaw sang mga hinaplas sa panahon sang presensia ni Cristo ginapalig-on sa 1 Tesalonica 4:​15-17: “Kay ini ginasiling namon sa inyo sa pulong ni Jehova, nga kita nga mga buhi nga nabilin tubtob sa presensia [pa·rou·siʹa] sang Ginuo indi mag-una sa mga nagakatulog sa kamatayon . . . Ang mga napatay nga nahiusa kay Cristo mabanhaw sing una. Nian kita nga mga buhi nga nabilin, sagmiton sing tingob upod sa ila paibabaw sa mga panganod sa pagsugata sa Ginuo sa kahawaan.” May 144,000 nga iya ni Cristo subong mga hinaplas nga sa ulihi magabaton sining dalayawon nga padya.​—⁠Bugna 14:⁠1.

¹⁴ Subong ginapakita ni Pablo, ang hinaplas nga mga nagkalabilin nga buhi karon indi magsulod sa Ginharian nga una sa napatay nga matutom nga hinaplas nga Cristianong mga martir kag mga disipulo. Dugang pa nga ginlaragway ni apostol Juan ang mga hinaplas nga nagakapatay karon: “Malipayon ang mga patay nga nagakamatay kutob karon nga nahiusa sa Ginuo. Huo, siling sang espiritu, papahuwaya sila gikan sa ila mga pagpangabudlay, kay ang ila mga binuhatan nagasunod sa ila,” kon sayuron, sa ila nabanhaw nga pagkabuhi. (Bugna 14:13) Kag si Pablo nagsiling: “Yari karon! Nagasugid ako sa inyo sing tinago: Indi kita tanan magatulog, kundi kita tanan pamayluhan, sa isa ka tion, sa isa ka pagpamisok, sa katapusan nga budyong. Kay magatunog ang budyong, kag ang mga patay banhawon nga dimadinulunton, kag pamayluhan kita.” (1 Corinto 15:​51, 52) Daw ano ka makatilingala nga milagro!

15, 16. (a) Anong ilustrasyon ang ginhatag ni Jesus sa Lucas 19:​11-15, kag sa anong rason? (b) Paano nagakatuman ining tagna?

¹⁵ Sang nagabantala isa ka bes si Jesus sa isa ka grupo sang iya mga sumulunod nahanungod sa Ginharian sang Dios, naggamit sia sing isa ka ilustrasyon agod tadlungon ang ila sayop nga mga ideya. Ang rekord mabasa: “Naghunahuna sila nga ang ginharian sang Dios magapahayag sa gilayon. Busa nagsiling sia: ‘Ang isa ka tawo nga dungganon nagkadto sa malayo nga duta sa pagbaton sing ginharian kag ugaling magabalik. Gintawag niya ang napulo sang iya mga ulipon kag ginhatagan sila sing napulo ka mina kag nagsiling sa ila, “Patikanga ninyo tubtob nga mag-abot ako.” . . . Sang nakabalik sia, nga nakabaton sang ginharian, nagsugo sia nga panawgon ining mga ulipon, nga ginhatagan niya sing kuwarta, agod nga mahibaluan niya kon pila ang ila nasaplid sa pagpatikang.”​—⁠Lucas 19:​11-15.

¹⁶ Si Jesus amo ang “tawo” nga nagkadto sa langit, ang “malayo nga duta” diin magabaton sia sing ginharian. Ina nga Ginharian nabaton niya sang 1914. Pagkatapos sadto, si Cristo subong Hari nakighusay sa iya nagapangangkon nga mga sumulunod agod tan-awon kon ano ang ila nahimuan sa pag-atipan sang mga interes sang Ginharian nga gintugyan sa ila. Diutay lamang nga mga matutom ang napilian sa pagbaton sang komendasyon sang agalon: “Maayo, maayong ulipon! Bangod nga nagmatutom ka sa labing diutay, maggahom ka sa napulo ka siudad.” (Lucas 19:17) Ining panahon sang presensia ni Cristo naglakip sing padayon nga pagbantala sang Ginharian sing mabaskog, lakip ang pagpahibalo sang mga paghukom sang Dios batok sa malauton, kag ang pagtatap sining hilikuton ginlakip sa awtoridad nga gintugyan sa “maayong ulipon.”

Bug-os Kalibutan nga Pagbantala

17. Anong kalipay ang nagatanda sa pa·rou·sia?

¹⁷ Ano pa ang matabo sa panahon sining pa·rou·siʹa? Mangin isa ini ka panahon sang dakung pagkalipay sa pagbantala nga hilikuton kag sa pagbulig sa mga bag-uhan sa paghanda para sa kaluwasan sa nagapakari nga dakung kapipit-an. Ini sila nga bahin sang “dakung kadam-an,” nga nagabulig sa nagkalabilin, nangin “mga sulat sang rekomendasyon.” (Bugna 7:9; 2 Corinto 3:​1-3) Ginsambit ni Pablo ang kalipay sining pag-ani nga hilikuton sang magsiling sia: “Ano bala ang amon paglaum ukon kalipay ukon purungpurong​—⁠indi bala kamo?⁠—​sa atubangan sang aton Ginuong Jesus sa iya presensia [pa·rou·siʹa]?”​—⁠1 Tesalonica 2:⁠19.

Magpabilin nga Matinlo kag Walay Kasawayan

18. (a) Anong pangamuyo ni Pablo ang nagapatuhoy sa pa·rou·siʹa? (b) Anong espiritu ang dapat naton tanan ipakita sa sining panahon, kag sa anong mga paagi?

¹⁸ Nangamuyo man si Pablo para sa pagpakabalaan sa mga nagakabuhi pa sa sining panahon sang presensia ni Cristo: “Kabay nga ang Dios gid sang paghidait magpabalaan sa inyo sing bug-os. Kag kabay nga matipigan ang inyo espiritu kag kalag kag lawas nga maayo kag walay kasawayan sa presensia [pa·rou·siʹa] sang aton Ginuong Jesucristo.” (1 Tesalonica 5:23) Huo, sa karon, bahin man kita sang hinaplas nga nagkalabilin ukon sang dakung kadam-an sang iban nga mga karnero, ang espiritu sang pagbuligay nagahugpong sa aton sing matutom agod nga kita kabay nga magpadayon nga matinlo kag walay kasawayan sa sining tumalagsahon nga tion. Sing kaanggid, dapat kita magpailob. Si Santiago nagsulat: “Busa, mga kauturan, magpailob kamo tubtob sa presensia [pa·rou·siʹa] sang Ginuo. . . . Palig-una ang inyo mga tagipusuon, kay ang presensia [pa·rou·siʹa] sang Ginuo malapit na.”​—⁠Santiago 5:​7, 8.

19. Anong paandam ang ginhatag ni Pedro tuhoy sa pa·rou·siʹa, kag ano ang dapat naton himuon?

¹⁹ Si apostol Pedro may isiling man sa aton nga nagakabuhi sa karon nga panahon. Ginpaandaman niya kita batok sa mga manugyubit, nga madamo sa karon sa tanan nga bahin sang duta. Si Pedro nagsiling: “Una sa tanan kinahanglan hangpon ninyo ini, nga sa katapusan nga mga adlaw ang mga mayubiton magaabot nga may pagyubit, nga nagasunod sang ila kaugalingon nga mga kailigbon kag nagasiling: ‘Diin bala ining ginsaad nga presensia [pa·rou·siʹa] niya? Kay kutob sang pagtulog sang aton mga ginikanan, ang tanan nagapadayon subong nga amo sila kutob sa ginsuguran sang pagtuga.’ ” (2 Pedro 3:​3, 4) Walay sapayan nga madamo sing manugyubit sa sining panahon sang presensia ni Cristo, ang katawhan ni Jehova padayon nga nagasiga subong kapawa sang kalibutan, para sa kaluwasan sang madamo.

Repaso nga mga Pamangkot

◻ Paano nasanagan sing progresibo ang katawhan ni Jehova tuhoy sa pa·rou·siʹa?

◻ Paano nagakatuman ang Mateo 24:​4-8?

◻ Paano ang mga anghel nagakooperar kay Cristo nga nagalingkod sa trono?

◻ Anong makatilingala nga milagro ang mahimo nga nagdungan sa pa·rou·siʹa?

◻ Ano nga kalipay ang ginaeksperiensiahan sa sining panahon, kag sin-o ang nagapakigbahin sa sini?