Mabuligon nga Impormasyon Para sa Ikaduha nga mga Ginikanan
ANG Departamento sang Sensus sa Estados Unidos nagapakot nga ang mga tapik nga mga pamilya magalabaw sa ordinaryo nga mga pamilya sa tuig 1995. Sa sina nga tion, 59 sa tagsa 100 ka kabataan ang magapuyo sa “nasamo nga mga pamilya” (mga pamilya nga may ikaduha nga ginikanan) antes sila makaabot sa panuigon nga 18 anyos. Ang masunod amo ang pila ka mga panugda nga makabulig sa nagadamo nga ikaduha nga mga ginikanan.
Hatagi Ini sing Tion: Dapat dumdumon sang ikaduha nga mga ginikanan nga ang ila mga manak nagakinahanglan sing tion agod mabaton ang bag-o nga ginikanan. Ang propesyunal sa ikaayo sang hunahuna nga si Mavis Hetherington nagapaathag kon ngaa ang una nga pila ka mga binulan—ukon mga tinuig—tuman gid kabudlay: “Sa una nga mga bahin sang ikaduha nga pag-asawahay, ang mga anak nga lalaki kag babayi lunsay masuayon, makumuron, negatibo kag akig indi lamang sa ila ikaduha nga amay kundi subong man sa ila iloy. Akig sila . . . sa ila iloy bangod sang iya liwat nga pagpamana.” Dapat hangpon sang ikaduha nga mga ginikanan ang balatyagon sang mga manak, bisan pa mabudlay ini.—Tan-awa ang Hulubaton 19:11.
Magtukod Una sing Isa ka Maayo nga Relasyon: Si Joy Conolly, sa iya libro nga Stepfamilies, maalamon nga nagpaandam nga mangin maayo para sa ikaduha nga mga ginikanan nga sabdungon ang pagginawi sang ila mga manak sa tapos nga makatukod sila sing maayo nga relasyon sa ila. Samtang, mas maayo nga ang kaugalingon nga ginikanan ang maghatag sang nagakaigo nga disiplina. (Ipaanggid ang Hulubaton 27:6.) Sa pihak nga bahin, ang ikaduha nga mga ginikanan makahatag sa ila mga manak sang balatyagon sang pagkalig-on paagi sa pagsakdag sang mga buluhaton nga madugay na nila naluyagan—katulad sang pagdayandayan ukon paghampang sing tingob. Apang, indi gid dapat sabdungon sang ikaduha nga mga amay ang pamilya sa tion sang pagkaon.
Likawi ang Paboritismo: Ang ikaduha nga amay ukon manding dapat maglikaw, kon mahimo pa lang, sa pagpakita sing paboritismo sa iya kaugalingon nga anak, bisan pa kon kaisa mabudlay ini.—Ipaanggid ang Roma 2:11.
Makigsuod Upod ang Paghalong: Nasapwan sang karon lang nga pagtuon sa tapik nga mga pamilya nga masami mabudlay nga magsuoray ang ikaduha nga mga amay kag ang mga manak nga babayi. Ang isa ka awtor nagsiling sing subong sini: “Ang ikaduha nga mga amay luyag makig-angot, apang ang mga manak nga babayi nagalikaw. Ang ikaduha nga mga amay nagatinguha sa paghatag sing pila ka pagdisiplina, apang ang manak nga babayi nagabato.” Ang awtor nagsumaryo: “Sa primero, daw subong nga wala sing mahimo ang ikaduha nga amay nga magmadinalag-on sa iya pagpakig-upod sa iya mga manak nga babayi.” Sa amo daku nga pagpailob kag kahanuklog ang kinahanglan. Samtang ang mga manak nga babayi nagaapresyar sang pulong sang pagdayaw sang ila ikaduha nga amay, sa masami nasaw-ahan sila sa pisikal nga mga hagyon kasubong sang paghakos. Dapat masayran sang ikaduha nga amay nga mahimo amo sini ang batyagon sang iya manak nga babayi. Kon amo sini, dapat niya hatagan sing dugang nga igtalupangod ang pulong sang pagdayaw kag pagsugilanon sa baylo sang pagpadayag sang pisikal nga pagpalangga.—Ipaanggid ang Hulubaton 25:11.
Mag-andam sa Pangimon: Ang eksperiensia nagapakita nga madamo nga mga manak nga babayi ang nagahunahuna sa ila manding subong karibal. Ang manding nga nagapaabot kag nagakahanuklog sa balatyagon sang iya manak nga babayi maalamon nga maglikaw sa dinagakaigo nga pag-agaway sang igtalupangod. May daku nga mahimo ang amay sa pagpakanay sang dimaayo nga relasyon paagi sa pagpasalig sang iya gugma kag pagtahod sa iya anak nga babayi. (Hulubaton 15:1) Ang mga mananalawsaw nagapaandam nga sa masami ang mga manding nagatinguha gid kag sa malip-ot lang nga tion nga batunon subong iloy sang ila bag-o nga mga manak nga babayi. Sa liwat, ang pagpailob amo ang sekreto.
Ang mangin ikaduha nga ginikanan indi mahapos. Apang mahimo ini, subong sang ginpakita sang linibo ka madinalag-on nga halimbawa. Kag dumduma, ang Biblia nagahatag sang pinakamaayo nga laygay agod magmadinalag-on ang pamilya sa bisan ano nga kahimtangan sang ini magsiling: “Isul-ob ninyo ang gugma, bangod ini amo ang himpit nga higot sang paghiusa.”—Colosas 3:14.