Pagkaulay​—⁠Ngaa?

“ANG kulto sang pagkaulay”​—⁠amo sini ang tawag ni Ran­dall Bal­mer, kaupod nga propesor sa relihion sa Bar­nard Col­lege/Co­lum­bia Uni­ver­sity, sa daw nagatubo nga huyog sa tunga sang mga tin-edyer nga ipaiway anay ang tuhoy sa sekso tubtob may edad-edad na sila.

Sing indi makapakibot, ang daku nga pagpalig-on nga likawan anay ang sekso nagahalin sa relihioso nga mga organisasyon. “Apang ang kusog nga nagatiklod sa kulto sang pagkaulay sekular, indi relihioso,” siling ni Dr. Bal­mer. “Ang matuod nga motibo sa pagpabilin nga ulay amo ang kahadlok​—⁠indi kahadlok nga gabaan sila, kundi kahadlok sa makamamatay nga balatian.” Sa amo, ginpatuhay niya “ang kulto ni Birhen Maria,” nga nagalaragway sang paglikaw sa sekso subong isa ka relihioso nga tulumuron, batok sa modernong-adlaw nga “kulto sang pagkaulay,” nga nagapresentar sang paglikaw sa sekso subong isa ka hulusayon sa panglawas.

“Isa ka makapasubo nga komentaryo nahanungod sa kahimtangan sang relihion sa katuigan 1990 nga ang kahadlok sa balatian amo pa ang nagaimpluwensia sa moralidad,” padayon ni Dr. Bal­mer. “Ang relihioso nga mga lider, sa sobra nga paglikaw nga makasaklaw sila, nagtanyag sing walay puwersa nga moralidad, ukon wala gid. Gani ang mga sientipiko kag mga opisyal para sa panglawas sang publiko amo na lang ang nagalaygay sa mga lampukon kon paano sila dapat maggawi sa ila seksuwal nga kabuhi.”

Apang, indi subong sini sa matuod nga mga Cristiano. Binagbinaga si Chad, isa ka tin-edyer nga ginapadaku subong isa sang mga Saksi ni Jehova. Si Chad ­ginpalapitan sang isa ka lin-ay nga nagbukas sang pagpakighambal sa iya. Apang wala madugay nangin maathag nga ang iya katuyuan indi lamang pagpakighambal. “Narealisar ko sa hinali,” siling ni Chad. “Indi ko mahimo nga paslawon si Jehova. Bangod ginahunahuna ko pirme nga pahamut-an si Jehova, ginsingganan ko sia nga malakat na ako.”

Kaangay ni Chad, madamo nga pamatan-on sa tunga sang mga Saksi ni Jehova ang nagahupot sing maayong moralidad indi lamang agod maamligan ang maayong panglawas kundi labi na agod pahamut-an ang ila Manunuga, si Jehova nga Dios. Indi ang kahadlok sa balatian ang nagaimpluwensia sang ila moralidad. Sa baylo, ginasunod sina nga mga pamatan-on ang laygay sang Manugwali 12:1: “Dumduma, karon, ang imo Dakung Manunuga sa mga adlaw sang imo pagkapamatan-on.”