Report sang mga Manugbantala sang Ginharian

Pagsuklub sang Bag-o nga Personalidad

ANG Biblia nagasugo: “Ubaha ang daan nga personalidad kag ang iya mga buhat, kag isuklub ang bag-o nga personalidad, nga paagi sa sibu nga ihibalo ginabag-o suno sa larawan sang Isa nga nagtuga sini.” (Colosas 3:9, 10) Madamu sadtong mga Saksi ni Jehova karon ang bahin anay sang dibunayag nga kalibutan ni Satanas. Sang mahibaloan ang sibu nga ihibalo sa kon ano ang ginapangabay sang Dios sa mga Cristiano, nagbag-o sila, nagsuklub sa ila kaugalingon sang bag-o nga personalidad. Ang masunod nga mga eksperiensia nagailustrar kon paano ini nga mga pagbag-o mahimu.

◻ Ang isa ka kompirmado nga makawat sa Espanya nga may huyog sa pagpangawti nagsugod sa pagtuon sang Biblia upod sa mga Saksi ni Jehova. Ang iya balay puno sang kinawatan nga mga butang. Samtang padayon sia nga nagauswag sa sibu nga ihibalo sang mga prinsipio sang Biblia, ang iya konsiensia nagsugod sa pagtublag sa iya kag namat-od sia nga ibalik ang mga butang nga iya ginkawat sa mga tag-iya.

Ginpalapitan niya ang iya anay amo kag gintu-ad nga kinawat niya anay ang isa ka bag-o nga wash­ing ma­chine sa iya. Ini nga tawo nahamuot sa mga rason sang iya nagbag-o nga panimuot, nagsugot nga bayaran niya ang bili sang wash­ing ma­chine, nga amo ang $292 (U.S.), kag nagsiling nga indi na niya pagpahibaluon ang polis.

Masunod ginduaw niya ang meyor sang banwa kag gintu-ad nga ginbuka niya anay ang duha ka mahalalon nga suga sang siudad, kag nagtanyag nga bayaran ini. Sang makita nga ining tawo nagsuklub sang “bag-o nga personalidad” bangod sang pagtuon sang Biblia, ginpatawad sia sang meyor kag wala pagbatona ang bisan ano nga bayad.

Ginduaw man niya ang iban pa nga mga kasilingan niya, gin-uli ang iya mga ginkawat, kag sila tanan nagpabutyag sing kakibot sa iya daku nga pagbalhin sing panimuot bangod sang pag-aplikar sa mga prinsipio sang Biblia.

Apang wala niya mahibal-i kon sin-o ang mga tag-iya sang madamu pa nga butang nga yara sa iya. Gani sa tapos mangamuyo kay Jehova, nagkadto sia sa ulong-talatapan sang polisiya kag gin-ampo ang anum ka ste­reo cas­sette play­er, nga ginkuha niya gikan sa nagapundo nga mga salakyan. Ang polis nakibot bangod matinlo ang iya rekord sa ila. Ginpabayaran nila sa iya ang pina kag nabilanggo sing makadali.

Karon may matinlo na sia nga konsiensia sa atubangan ni Jehova. Nahisuno sa Efeso 4:28, “Ang mga nagpangawat dili na magpangawat,” kag nagaapresyar nga ang mga makawat indi “magapanubli sang ginharian sang Dios,” nag-untat na sia sa pagpangawat kag nagsuklub sang “bag-o nga personalidad.”—1 Corinto 6:9, 10.

◻ Ang kabunayag sadtong may katulad-Cristo nga personalidad masami nga ginakilala sang mga taga-guwa, subong sang ginailustrar sang isa ka eksperiensia sa Italya. Nasaksihan sang isa sa mga Saksi ni Jehova ang grabe nga aksidente sa awto. Ginpalapitan niya ang isa sa mga salakyan nga naaksidente agod tan-awon kon bala makabulig sia, kag nakita niya ang isa ka tawo nga nasamaran sing grabe kag duguon, kag nakighambal sia sa iya nga nagasambit sa ngalan ni Jehova. Ginbayaw sang tawo ang iya ulo kag namangkot kon bala isa sia sa mga Saksi ni Jehova, kag sa sini nagsabat sia sing huo. Nagsiling ang tawo: “Miss, malain ang akon pamatyag. May isa ako ka bag sa salakyan nga nagaunod sing madamung minilyon [nga lira] nga kuarta. Palihug dalha ini sa imo balay. Nahibaloan ko nga yari ini sa maayo nga kamut. Kay kon indi ini nga kuarta madula. Kon magaayo na ako sarang mo mabalik ang kuarta sa akon!” Ginkuha sang Saksi ang kuarta kag ginbalik ini sa iya sang mag-ayo sia. Tuman gid sia ka mapasalamaton.

Ginapakamaayo ni Jehova yadtong “nag-uba sang daan nga personalidad” kag “nagsuklub sang bag-o nga personalidad.”—Efeso 4:22-24.

“Ang nagpangawat dili na magpangawat, kundi hinonoo magpangabudlay sia, nga nagabuhat sa iya mga kamut sang butang nga maayo, agod nga may ikahatag sia sa mga nawad-an.”—Efeso 4:28.