Bulong sa Tanan nga Balatian—Isa Lamang Bala ka Damgo?

SI Juan tigulang na katama. Gintapok sia sing malawiglawig sa isa ka diutay nga pulo. Daw subong bala nga tapuson niya ang iya kabuhi nga nagaisahanon. Apang sa sina nga kahimtangan nakabaton sia sing mensahe nga makapalig-on gid para sa iya—kag para sa aton.

Sa isa ka dramatiko nga palanan-awon nabatian ni Juan ang tingog gikan sa langit nga nagasiling: “Yari karon! Ang kayangkayang sang Dios upod sa mga tawo . . . Pahiran niya ang tagsa ka luha sa mga mata nila, kag wala na sing kamatayon, ukon kalisud ukon paghibi ukon kasakit pa. Ang nahaunang mga butang nagtaliwan.”

Nian, nakita niya ang isa ka suba nga may nagabadlak, daw kristal katin-aw nga mga tubig. Sa mga pangpang sini nakita niya ang madamu sing bunga nga mga kahoy. Ang mga dahon sang mga kahoy bulong sa mga pungsod. Daw ano ka makalulonyag nga eksperiensia!

Kon nabatian mo kag nakita ang naagihan ni Juan, indi ka bala makunyag sa paghibalo nga sa pila ka adlaw ang tanan nga kasakit kag pag-antus madula kag ang tanan nga mga balatian mabulong? Sa pagkamatuod, daw mabudlay ini patihan!

Kon Ngaa Mabudlay Patihan

Isa yadto ka maragtason nga hitabo nga natabo sang 96 C.E. sa pulo sang Patmos, malayo sa baybayon sang modernong-adlaw nga Turkey. Ang tigulang nga si Juan amo ang hinigugma nga apostol ni Jesucristo, kag ginrekord niya sa Balaan nga Biblia ang iya nakita.—Bugna 1:9; 21:3, 4; 22:1, 2.

Bisan pa nga amo sina, madamu nga mga tawo karon ang nabudlayan sa pagpati nga may tion nga madula ang tanan nga mga balatian. Ngaa? Subong nga kon ano gid ang tawhanon nga kinaugali, nahuyog kita sa pagsikway sa daw kabaliskaran sa aton kinaandan nga inagihan.

Nahanungod sa madugay na nga pagpakig-away sang tawo batok sa balatian, si Rich­ard Fien­nes, ang patologo sang Zoo­lo­gi­cal So­ci­ety sang London, nagsulat sa iya libro nga Man, Na­ture and Di­sease:

“Malapit na bala ang katapusan sang pagpakig-away? Ang tawo nagapakig-away sa hydra (ang madamu sing ulo nga sapat sang Griegong mitolohiya nga ginpatay ni Hercules). Kon ang isa ka ulo mautod, nagaulhot ang isa pa sa lugar sini. Ang dihamtong nga mga balatian, sablag, kag kamatayon, amo gihapon ang pinakadaku nga problema sang tawo; diin sang nagligad nga mga adlaw ang anus, pneu­mo­nia, kag pagkapatay pagkabun-ag amo ang mga problema, karon, ang cor­o­nary nga balatian sa tagipusuon, istrok, kanser, kag iban pa nga mga balatian nagbulos sa ila lugar.”

Ang mga manugpatay sang “nagligad nga mga adlaw” wala man madula sing bug-os. Ang The Econ­o­mist sang London nagareport nga “sa Asia, Aprika kag Bagatnan nga Amerika, isa ka tawo sa napulo ang sa pila ka paagi ang nasablagan. Ang kalabanan nga mga imol nagabalatian subong sang grabe nga lupot kag pneu­mo­nia sa bug-os nila nga pagkabuhi. . . . Minilyon ang nagabalatian sing parasitiko subong sang malaria ukon schis­to­so­mias­is (nga amo, ang bil­har­zia [nga gintuga sang parasite sa dugo]); ang iban ginapiang bangod sang aro.”

Bisan sa mainuswagon nga mga pungsod ang iban nga mga ulo sang “hydra” nagapalibog sa mga eksperto. “Ang mga doktor sa karon nagapakig-away sa dikinaandan nga mga balatian nga mas makamamatay sang sa klasiko nga mga manugpatay subong sang buti kag diph­the­ria,” sulat ni Ed­ward Edel­son sa Dai­ly News sang Nueva York.

Sang nagligad nga tuig, ang tinaga nga AIDS halos wala ginasapak sang kalabanan nga mga tawo. Karon, ining makamamatay nga balatian kilala halos sang tanan, subong man ang Le­gion­naires’ di­sease kag ang tox­ic ­shock syn­drome. Ang malapit pa amo ang iban posible nga manugpatay: ang hilanat nga Ebola, ang hilanat nga Lassa, ang Koreano nga hem­or­rhag­ic nga hilanat, ang Reye’s syn­drome, ang Kawasaki nga balatian, ang he­mo­lyt­ic ure­mic syn­drome, kag iban pa. “Ang pagkasunodsunod sa sugilanon sang eksotiko nga balatian amo nga sing masunson nagapresentar sila sing bulong nga may dimalubad nga mga problema,” siling ni Edel­son.

Walay sapayan sang mga pag-uswag sa medisina, ang kalabanan naghinakop nga ang balatian kag kamatayon indi gid man malikawan sa ulihi. Mabudlay para sa ila handurawon ang tion nga ang kamatayon, kasakit, kag balatian magataliwan.

Ano, nian, ang tuhoy sa makapulokaw nga palanan-awon nga nabaton ni Juan? Mangin indi matuman nga damgo lamang bala ini sa ulihi? May maayo kita nga mga rason nga patihan nga indi ini mangin amo sina. Sa gilayon pagkatapos mabatian ang makatilingala nga mga saad, nabaton ni Juan ini nga pasalig: “Isulat ini, kay ini nga mga pulong masaligan kag matuod.” (Bugna 21:5; 22:6) Paano ini natuman? Kag makita bala naton ang katumanan sini sa aton pagkabuhi?

[Diagram/Mapa sa pahina 3]

(Para sa kabug-usan sang teksto, tan-awa ang publikasyon)

Ang mga manugpatay sang nagligad nagahalit gihapon sa madamu nga mga lugar

Aro

Aro kag Malaria