Ang mga Ministro sang Dios Nagapamatuod sang Ila Kalipikasyon

“Kag sin-o bala ang sangkol gid?”—2 CORINTO 2:16.

SA KARON nga kalibutan nga nabahinbahin sa relihion, ini nga pamangkot mahimu ipamangkot sing sinsero katama: Sin-o gid ang awtorisado nga ministro sang Dios? Sing kaanggid, si apostol Pablo namangkot: “Sin-o bala ang sangkol gid tungod sining mga butang?” Sang ginhangkat, si Pablo kag ang iya kaupod nga mga manugpangabudlay nagsiling, “Kami”! (2 Corinto 2:16, 17) Apang sa karon, sin-o ang may malig-on nga sadsaran, ang may matarong, kag may kaisog sa pagsabat, “Kami”?

² Antes sabton ina nga pamangkot, binagbinagon naton ining mga pinamulong ni Pablo sa mga Cristiano sa Corinto: “Apang salamat sa Dios! Kay . . . bisan diin kita magkadto ginagamit niya kita sa pagsugid sa iban tuhoy sa Ginuo kag sa pagpalapnag sang Ebanghelyo kaangay sang matam-is nga kahumot. Kon tuhoy sa Dios yara ang matam-is, maayo nga kahumot. Amo ini ang kahumot ni Cristo sa sulod naton, ang kaamyon sang mga nagakaluwas kag sang mga nagakawala sa palibot naton. Sa mga nagakawala, makita naton ang makahaladlok nga kaamyon sang kamatayon kag katapusan, kag samtang sa mga nakakilala kay Cristo nagahatag-kabuhi nga kahumot. Apang sin-o ang sangkol sa subong sini nga hilikuton? Yadto lamang, nga kaangay sa aton, mga tawo sang integridad, nga ginpadala sang Dios, nga nagapamulong sa gahom ni Cristo, kag ang itololok sang Dios yara sa aton. Indi kita kaangay sadtong manugbaligya—kag madamu sila—nga ang ideya sa pagpalapnag sang Ebanghelyo amo ang pagpangwarta sa sini.”—2 Corinto 2:14-17, The Living Bible; tan-awa ang The Watchtower, Mayo 1, 1944, mga pahina 133-4.

³ Pagbaligya sang Pulong sang Dios bangod sang makagud nga daug—daw ano ka makangilil-ad ina nga panghunahuna! Wala gintinguhaan ni Pablo ang pinansial nga daug paagi sa pagbantala sina nga Pulong agod magkabuhi sing matawhay, kag sa ulihi magretiro gikan sa ministeryo kag magpahunayhunay sa nabilin niya nga mga adlaw. Handa sia sa paghimu sang mga tolda subong side­line nga hilikuton agod makasupot sing pundo para sa iya kaugalingon kag sa pagbulig sa iya kaupdanan sa pag-alagad kay Jehova. (Binuhatan 18:1-4) Si Pablo indi nangin palas-anon sa sadtong ginbantalaan niya sang maayong balita. Gani sarang sia makapamangkot sa taga-Corinto nga mga Cristiano: “Nakasala bala ako sa pagpakubos ko sang akon kaugalingon agod mabayaw kamo, bangod nagwali ako sa inyo sang maayong balita sang Dios sa walay bayad?” (2 Corinto 11:7) Ina nga pamangkot pagasabton sing positibo nga indi!

⁴ Ginailog karon sang mga Saksi ni Jehova ang maayo nga halimbawa sang maayo nga apostol sa indi pagbaligya sa hamili nga Pulong sang Dios kundi sa paghimu sini nga matigayon sang tanan. Wala nila ginanegosyo inang balaan nga butang. Sa amo wala sila sing ginabayaran nga klerigo, ang ila mga manugpamulongpulong publiko wala nagapabayad, kag ang plato sa pagpangolekta wala ginalibot sa ila mga miting. Kon ang bisan sin-o maluyag sa pag-amot sing kuarta para sa hilikuton, sarang niya mahulog ang bisan ano nga kantidad, bisan ang isa nga kaangay sa “duha ka lepta nga diutay katama sing balor” sang balo, sa kahon alamotan sa King­dom Hall ukon bisan diin. (Lucas 21:1-4) Inang kinabubut-on nga amot ginabayad sa mga galastuhon kag indi sa pagpamanggaranon kay bisan sin-o nga indibiduwal. Bisan ang pribado nga mga puluy-an kinabubut-on nga ginabuksan para sa mga miting sang mga Saksi ni Jehova.—Filemon 1, 2.

“Sangkol Gid”

⁵ Apang sin-o karon ang nagkalipikar sa mga Saksi ni Jehova nga sundon inang Makasulatanhon nga talaksan walay sapayan sang mga paghingabot kag mga pagpamatok nga padayon nga ila ginaeksperiensia? Wala sing isa ang makapaathag sini kundi ang Indibiduwal nga nagpasangkol kay Pablo kag sa iya kaupdanan para sa sagrado nga pag-alagad. Talupangda palihug ang kaputli sang katuyoan ni Pablo, nga kabaliskaran sa katuyoan sang relihioso nga mga manugbaligya, subong sang ginsiling niya: “Subong maminatud-on, huo, subong pinadala halin sa Dios, sa atubangan sang Dios, nagahambal kita, kaupod ni Cristo.” (2 Corinto 2:17) Amo ini kon paano ang mga Saksi ni Jehova nagapamulong karon. Apang ginarekomendar bala naton ang aton kaugalingon subong mga ministro? Kinahanglan bala nga ibalhag naton ang mga sulat sang rekomendasyon gikan sa iban?

⁶ Wala pagbatona ni Pablo ang kalipikasyon para sa iya ministeryo subong butang nga napalambo niya. Sia nagsiling: “Ang amon pagkasangkol naghalin sa Dios, nga nagsangkol gid sa amon nga mangin mga ministro sang bag-ong katipan.” (2 Corinto 3:4-6) Kabaliskaran kay Pablo, ang klerigo sang Cristiandad nagaangkon nga nangin “sangkol gid” bangod nga nakagradwar sila gikan sa teolohiko nga mga seminaryo. Gani ginapanghiwala nila nga yadtong indi mga gradwado sa seminaryo kalipikado nga mga ministro nga may awtoridad sa pagtudlo. Apang ang pinasahi nga pagtuon ni Pablo sa Judaismo wala magkalipikar sa iya para sa Cristianong ministeryo may kahilabtanan sa bag-ong katipan. Wala magtukod si Jesus sang bisan anong teolohiko nga seminaryo para sa iya 12 ka apostoles ukon kay bisan sin-o nga pagabuthoan. Amo man sa karon, ang pagkasangkol sang isa sa matuod nga Cristianong ministeryo naghalin kay Jehova, ang labing daku nga Manunudlo. Sa pagkamatuod, ina nga ministro dapat maghatag sing pamatuod nga indi gid mapanghiwala.

“Sin-o bala ang Naghatag sa Imo Sining Awtoridad?”

⁷ Ginhangkat sang relihioso nga mga lider ang kinamatarong sang Anak sang Dios sa pagbantala sang maayong balita kag sa paghimu sing mga milagro. Sa templo, “ang puno nga mga saserdote kag ang mga tigulang sang katawhan nagpalapit sa iya sang sia nagapanudlo kag nagpamangkot: ‘Sa ano bala nga awtoridad nagahimu ka sining mga butang? Kag sin-o bala ang naghatag sa imo sining awtoridad?’” (Mateo 21:23) Nagdumili sila sa paghinakop kasubong sang Judiyong gumalahom nga si Nicodemo sang ginsilingan niya si Jesus: “Rabbi, nahibaloan namon nga ikaw manunudlo gikan sa Dios; kay walay isa ang makahimu sining mga tanda nga imo ginahimu kon indi ang Dios kaupod niya.”—Juan 3:1, 2.

⁸ Mahimu nga masilingan ni Jesus ang mga nagahangkat sa iya, ‘Pahanugoti ang akon mga buhat nga magahambal sang ila kaugalingon!’ Pagkatapos sang kapin sa tatlo ka tuig sang iya dayag nga hilikuton, ang puno nga mga saserdote kag ang mga tigulang may madamung mga tanda nga mapasaran nila sing husto nga konklusion tuhoy sa pagkakilala kag kinamatarong ni Jesus sa paghimu sing mga milagro kag sa pagtudlo sang kamatuoran nahanungod sa Ginharian sang Dios. Tuman sa ila ka bugalon sa pagbaton sang tanan nga pamatuod nga gin-aman ni Jehova agod pamatod-an nga si Jesus amo ang ginsaad nga Mesias.

⁹ Bangod sang natabo kay Jesus, ang mga Saksi ni Jehova wala makibot nga ang ila kalipikasyon subong awtorisado nga mga ministro sang iya Amay ginaduhaduhaan sang relihioso nga mga lider karon. Sanglit yadtong naghangkat sang awtoridad ni Jesus wala magsapak sang iya madamu milagruso nga mga buhat, nagpautwas sia sing pamangkot nga nag-ipit sa ila. Kag ang iya karon nga mga disipulo makahimu man sina sa bahin sadtong hungod nga wala nagasapak sa mga buhat sadtong mga disipulo.

¹⁰ Sang ginpamangkot sang puno nga mga saserdote kag mga tigulang si Jesus, “Sin-o bala ang naghatag sa imo sining awtoridad?” wala sia maghatag sing mabudlay hangpon nga pamangkot kundi nagsiling: “Ako man mamangkot sa inyo sang isa ka pamangkot. Kon inyo masugid sa akon ang iya sabat, nian ako man magasugid sa inyo kon sa anong awtoridad ginahimu ko ining mga butang: Ang bawtismo ni Juan, diin bala ini maggikan? Sa langit ukon sa mga tawo?” Ang kasaysayan nagadugang: “Kag nagbinaisay sila, nga nagsiling: ‘Kon magsiling kita, “Gikan sa langit,” magasiling sia sa aton, “Ngaa man bala wala kamo magtuo sa iya?” Apang, kon magsiling kita, “Gikan sa mga tawo,” mahadlok kita sa kadam-an, kay ang tanan nagakabig kay Juan nga manalagna.’ Gani nagsabat sila kay Jesus: ‘Wala kami makahibalo.’ Sia man nagsiling sa ila: ‘Indi man ako magsugid sa inyo kon sa anong awtoridad ginhimu ko ining mga butang.’” (Mateo 21:23-27) Karon, sarang mapamangkot sang mga Saksi ni Jehova ang mga klerigo sa Makasulatanhon nga paagi nga may kaanggid nga epekto.a

¹¹ Kutob sang 1876 padayon, ang katawhan ni Jehova naghatag sing paandam sa kalibutan, kag labi na sa Cris­tian­dad, nga ang Panag-on sang mga Gentil magatakop sa tigragas sang 1914. (Lucas 21:24, King James Version) Indi mapasapayanan sang mga klerigo ining nahauna nga hilikuton sang halos 40 na ka tuig—ang hilikuton nga katumbas sang iya ni Juan Bawtista. Yadtong mga klerigo naghulat sing malangkagon nga salakayon sing hinali ang editor sining balasahon kon ang 1914 magaligad nga wala sing bisan anong talalupangdon nga hitabo nga katumbas sadtong iya ginpaandam. Apang, ti, napahipos gid sila sang sadtong Hulyo 28, 1914, ang paghidait gintublag sang pagdabdab sang Inaway Kalibutanon I!

¹² Ang paghapay sang inaway kag ang pag-untat sang madamu sa pagpanguma nagpahanabo sang kakulang sing kalan-on. Ang mga linog nagtay-ug sa nagkalainlain nga bahin sang duta, nga nagtuga sing daku nga halit kag pag-antos. Sang 1915 ang linog sa Avezzano, Italya, nagpatay sa 29,970, kag ang daku nga linog sang 1920 nagpatay sa 200,000 sa Probinsia sang Kansu, Tsina. Sang 1923, kapin sa 140,000 ang napatay sa linog sa Great Kanto sa Japan. Pagkatapos mismo sang inaway nag-abot ang trangkaso Espanyola nga sa isa ka tuig nagpatay sing mas madamu nga biktima sang sa apat ka tuig sang inaway. Indi man mapaligad amo ang paghingabot sa mga alagad ni Jehova sadtong nahaunang kalibutanon nga inaway, nga nagdul-ong sa dimakatarunganon nga pagbilanggo sing siam ka bulan sa presidente kag sa sekretaryo-tresurero sang Watch Tower Society kag sa anum sang ila kaupod nga mga manugpangabudlay.

¹³ Kutob sang matapos ang Inaway Kalibutanon I, ginpamangkot sang mga Saksi ni Jehova ang mga klero sang Cristiandad: ‘Ang makahalapay nga mga hitabo nga nagpapiot sang aton duta kutob sang 1914 padayon katumanan bala sang tagna ni Jesus sa Mateo 24:3-13?’ Kon yadtong mga klerigo bunayag nga magasiling sing huo, pagabatunon nila nga si Jesucristo naglingkod na sa iya langitnon nga Ginharian sang 1914. Natural, sanglit si Jesus nagsiling nga ‘ang kalibutan indi na makakita sa iya’ kag isa na sia karon ka dimamalatyon espiritu nga persona, ang iya “pagkari,” ukon “presensia,” indi makita. (Juan 14:19; Mateo 24:3, KJ; 1 Pedro 3:18) Apang ang pagbaton sini tanan magapauntat sa klerigo gikan sa pagpakigbais nga ang nagapatay-ug sa kalibutan nga mga hitabo sang 1914-18 kinaandan lamang nga pagdabdab sang mga pungsod sa lakat sang maragtas.

¹⁴ Dugang pa, kon batunon sang klero sang Cristiandad nga ang mga hitabo sang 1914-18 nagtanda sang pagsugod sang katapusan sang daan nga sistema sang mga butang, obligado sila sa pagkilala sa iban nga mga bahin sang “tanda” sang “presensia” ni Jesus kag magapakigbahin sa katumanan sang iya pinamulong: “Ining maayong balita sang ginharian pagaibantala sa bug-os napuy-an nga duta nga panaksi sa tanan nga kapungsoran.” (Mateo 24:14) Magakahulugan ina sang pagbantala, indi sang Ebanghelyo nga ginbantala nila sing siniglo na, kundi sang maayong balita sang Ginharian nga natukod na sa langit sang magtakop ang Panag-on sang mga Gentil sang 1914. Pagasikwayon nila ang Liga de Nasyones subong “ang politikal nga ekspresyon sang Ginharian sang Dios sa duta” kag tamdon ini, kag ang tal-us sini, ang Nasyones Unidas, nga ‘kalangil-aran nga nagatindog sa duog nga balaan.’ (Mateo 24:15, KJ) Apang tubtob sang tuig 1986, ang klero sang Cristiandad nagdumili sa pagtawag sa Liga de Nasyones kag sa Nasyones Unidas subong inang “kalangil-aran,” ukon “makangilil-ad nga butang.”

¹⁵ Gani ang klero sang Cristiandad nagadumili sa pagdampig sa Ginharian ni Jehova paagi kay Jesucristo. Bangod sang indi pagsakdag sa sini, pagalaglagon sila sa “dakung kapipit-an” nga malapit na. Apang indi kaangay sa ila, ang mga Saksi ni Jehova nagbiya sa Babilonia nga Daku, ang bug-os kalibutan nga emperyo sang butig nga relihion, kag nagabantala sang mensahe sang Ginharian sa 203 ka kadutaan. Ining dimatupongan nga hilikuton isa ka talalupangdon nga bahin sang “tanda” nga nagapamatuod nga sang 1914 si Jesus ginpalingkod subong langitnon nga Hari, sa paggahom sa tunga sang iya mga kaaway.—Mateo 24:3, 14, 21; Salmo 110:1, 2; Bugna 18:1-5.

Kinahanglan bala ang Rekomendasyon?

¹⁶ Wala bala sing sadsaran nga ginarekomendar naton ang aton kaugalingon subong hinaplas nga mga saksi ni Jehova? Ukon maalam bala nga ginamaniobra naton ang mga bagay agod matukod ina nga rekomendasyon para sa “iban nga mga karnero” ni Jesus? (Juan 10:16) Wala ina paghimua ni Pablo kundi nagsiling sa mga taga-Corinto nga nangin mga Cristiano bangod sang iya wala kakapoy nga panikasog: “Nagasugod bala kami liwat sa pagrekomendar sang amon kaugalingon? Ukon nagakinahanglan bala kami, subong sang ginahimu sang iban, sing mga sulat sang rekomendasyon ayon sa inyo ukon gikan sa inyo? Kamo ang amon sulat, nga nasulat sa inyo mga tagipusuon kag kilalahon kag basahon sang tanan nga tawo. Kay nagapahayag kamo nga isa ka sulat ni Cristo nga ginsulat namon subong mga ministro, nga nasulat indi sa tinta kundi sa espiritu sang buhi nga Dios, indi sa mga tapitapi nga bato, kundi sa mga tapitapi nga unod, sang mga tagipusuon.”—2 Corinto 3:1-3.

¹⁷ Paagi sa bulig sang espiritu ni Jehova, si Pablo nagsulat sing madamu nga tolon-an sa Biblia kag nagkombertir sa madamu sa Cristianismo. Gani napamatod-an sia nga sangkol gid para sa Cristianong ministeryo. Sing kaanggid, labi na kutob sang ini nga balasahon ginbalhag primero sang 1879, ang hinaplas nga nagkalabilin sang mga disipulo ni Cristo, bisan pa wala nainspirar subong kay Pablo, nakapatubas sang madamung literatura sa Biblia. Kutob sang 1920, nagbalhag sila sing linibo ka milyon ka mga libro, mga polyeto, mga magasin, kag mga ­tract sa madamu nga pamulong. Ini nga literatura ginpanagtag sa manubo nga bili, ang kalabanan sini ginhatag nga wala sing bayad sa mga imol. Ang Watch Tower So­ci­ety naghimus man sang wala bayad nga mga pamulongpulong sa Biblia kag nagpadala sing mga misyonero sa wala maalagdi nga mga teritoryo sa palibot sang globo. Linaksalaksa ang nagahulag sa naimprinta kag ginpamulong nga mensahe kag nagsimbulo sang ila dedikasyon paagi sa pagpabawtismo, labi na kutob sang 1935 sang maathagan primero nga ang wala sing latid nga “dakung kadam-an” sang “iban nga mga karnero” ni Jesus nagalaum nga magkabuhi sing dayon sa napasag-uli nga paraiso sa duta.—Bugna 7:9-17; Lucas 23:43.

¹⁸ Gani, ano abi kon hangkaton sang klero ang hinaplas nga nagkalabilin nga ipakita ang mga sertipiko subong sang Doc­tors of Di­vi­ni­ty? Ti, ining mga alagad ni Jehova makahatag sing mas importante nga ebidensia! Matudlo nila karon ang kapin sa duha kag tunga ka milyon ka “iban nga mga karnero” sa bug-os nga kalibutan kag makasiling: ‘Sila ang amon mga sulat sa pagsuporta!’ Magamit nila ang pinamulong ni Pablo kag makasiling sa mga katapo sang “dakung kadam-an”: “Kamo ang amon mga sulat, nga nasulat sa amon mga tagipusuon kag kilalahon kag basahon sang tanan nga tawo.” (2 Corinto 3:2) Tugoti ang klero sang Cristiandad nga basahon inang buhi nga sulat nga ginahuman sang dedikado, bawtismado nga mga Cristiano nga nagaalagad kay Jehova nga Dios sa adlaw kag gab-i sa iya templo kag nagabulig sa ‘pagbantala sang maayong balita sang ginharian sa bug-os nga duta nga panaksi sa tanan nga kapungsoran.’ (Mateo 24:14) Kaangay sang hinaplas nga nagkalabilin, ginapamatod-an nila ang ila kaugalingon nga sangkol gid para sa Cristianong ministeryo.

¹⁹ Ining pinasahi nga sulat sang rekomendasyon indi pagapapason sa nagahinampot nga “inaway sang dakung adlaw sang Dios nga Labing Gamhanan” sa simbuliko nga duog nga ginatawag Har–Magedon. (Bugna 16:14-16) Sa baylo, pagabantayan kag pagaamligan ini sang Labing Gamhanan nga Dios agod ipasundayag sa tapos ang Har–Magedon nga sistema sang mga butang sa idalom ni Cristo nga Hari. Daw ano gid ka kusog nga sulat inang “dakung kadam-an” sa binilyon ka minatay nga pagabanhawon ni Jehova nga Dios, paagi kay Jesucristo, gikan sa handumanan nga mga lulubngan sa palibot sang duta! Gani padayon sa pagsulat, kamo nga hinaplas nga nagkalabilin! Kag padayon nga buligan sila, kamo nga “dakung kadam-an” sang “iban nga mga karnero” sang Maayo nga Manugbantay!

[Footnotes]

Ano ang Imo mga Komento?

◻ Paano ginailog sang mga Saksi ni Jehova si Pablo sa indi pagbaligya sa Pulong sang Dios?

◻ Ano ang sadsaran para sa pagkanangin sangkol gid sang isa ka tawo para sa matuod nga Cristianong ministeryo?

◻ Kon akuon sang relihioso nga mga lider, ano nga hilikuton ang obligado sila nga pakigbahinan?

◻ Anong pinasahi nga sulat ang matudlo sang hinaplas nga nagkalabilin sa pagpamatuod nga sangkol gid sila nga mga ministro?

[Mga Pamangkot sa Pagtinuon]

1. Sa karon nga kalibutan nga nabahinbahin sa relihion, ano nga pamangkot ang mapautwas sing sinsero katama?

2. Ano ang kahulugan sang ginsiling ni Pablo sa 2 Corinto 2:14-17?

3. (a) Ano ang reaksion naton sa panghunahuna nga pagbaligya sa Pulong sang Dios para sa makagud nga daug? (b) Ano ang ginhimu ni Pablo agod indi mangin palas-anon sa iya ginabantalaan?

4. Paano ginailog sang mga Saksi ni Jehova ang halimbawa ni Pablo may kaangtanan sa Pulong sang Dios?

5. Sin-o ang nagkalipikar sa mga Saksi ni Jehova para sa sagrado nga pag-alagad?

6. (a) Ngaa ang klero sang Cristiandad nagahunahuna nga sila “sangkol gid”? (b) Apang ano ang sadsaran para sa pagkasangkol gid sang isa sa matuod nga Cristianong ministeryo?

7. Sa anong paagi ang relihioso nga mga lider tuhay kay Nicodemo sa kon paano nila ginatamod ang awtoridad ni Jesus?

8. Pagkatapos sang kapin sa tatlo ka tuig sang ministeryo ni Jesus, ano ang reaksion sang Judiyong mga lider sa iya pagkakilala kag awtoridad?

9, 10. (a) Ngaa indi makibot ang mga Saksi ni Jehova nga ang ila kalipikasyon subong mga ministro ginaduhaduhaan karon? (b) Paano gin-atubang ni Jesus ang relihiosong mga lider nga naghangkat sang iya awtoridad, kag ano ang epekto sini?

11. Ano nga hilikuton ang ginhimu sang katawhan ni Jehova antes sang 1914, kag paano napahipos ang ila mga kritiko?

12. Anong mga kabudlayan ang kaupod kag nagsunod sa Inaway Kalibutanon I?

13. Ano ang ginapamangkot sang mga Saksi ni Jehova sa klero sang Cristiandad, kag ano ang pagabatunon sining mga kritiko kon magasabat sila sing bunayag?

14. (a) Kon akuon sang relihioso nga mga lider, sa anong hilikuton sila obligado nga makigbahin? (b) Ano nga tal-us para sa Ginharian ang sikwayon nila, kag ano nga dalanon ang himuon nila?

15. Ano nga palaabuton ang nagahulat sa klero, apang ano ang ginahimu sang mga Saksi ni Jehova?

16. Anong mga pamangkot ang nagautwas tuhoy sa rekomendasyon, kag ano ang masiling ni Pablo tuhoy sini?

17. Ngaa masiling nga si Pablo sangkol gid para sa ministeryo, kag sa sini nga bahin, ano ang masiling tuhoy sa mga Saksi ni Jehova?

18. Kon ginahangkat agod pamatod-an ang ila kalipikasyon subong ministro, ano ang matudlo sang hinaplas nga nagkalabilin?

19. Anong pinasahi nga sulat sang rekomendasyon ang pagaamligan sa Har–Magedon?