Pagpalapnag sang Kahumot sang Ihibalo sang Dios

“Salamat sa Dios nga pirme nagapangulo sa aton sa prosesyon sang kadalag-an kaupod ni Cristo kag nagapahayag paagi sa aton sang kaamyon sang pagkilala sa iya sa tagsa ka duog!”​—⁠2 CORINTO 2:⁠14.

1. Ano nga kahumot ang ginahambalan naton diri, kag paano tamdon ang pribilehiyo nga ipalapnag ini?

SIMHOT, simhot! M-m-m-m! Napanimahuan mo bala ang matam-is nga kahumot? Wala namon diri ginapatuhuyan ang kahumot sang mga kabulakan kundi, sa baylo, ang malaragwayon nga kahumot gikan sa pinakahamili nga mga sinulatan sa duta. Ining mga sinulatan wala naghalin sa mga tawo lamang kundi amo ang malaragwayon nga bouquet nga inspirado sang Isa nga nagtuga man sang mahumot nga kabulakan nga nagapuni sa duta. Ang pribilehiyo nga ipalapnag ining kahumot sang ihibalo sang Dios daku nga bahandi. Huo, pag-alagad ini nga hamili gid​—⁠nga wala ginapanag-iyahan sang tanan, wala ginapaambitan sang katawhan sa kabilugan.

2. San-o ginsugdan sang mga disipulo ni Cristo nga ipalapnag ang malaragwayon nga kahumot, kag upod ang anong resulta?

² Ining hamili nga bahandi ginhatag sa mga disipulo ni Cristo sang ginpakilala sila sa isa ka aktibo nga pag-alagad kay Jehova nga Dios sa adlaw sang Pentecostes sang tuig 33 sang aton Kumon nga Dag-on. Napuno sang balaan nga espiritu, ginsugdan nila nga ipalapnag ang malaragwayon nga kahumot, nagapaathag sang “dalagkung mga buhat sang Dios.” (Binuhatan 2:​1-4, 11) Paagi sa ila ang kahumot sang ihibalo sa Dios magalab-ot sa iban, indi lamang sa kinaugali sirkunsidado nga mga Judiyo kundi man sa disirkunsidado nga mga pungsod, mga tribo, mga katawhan, kag mga hambal. (Bi­nuhatan 10:​34, 35) Ginatamod sang matuod nga mga disipulo ini nga pag-alagad nga mas ha­mili sang sa tanan nga materyal nga manggad nga matipon sang mga tawo para sa ila kaugalingon.

3. Tubtob diin ginahimo ang hilikuton nga pagpa­lapnag sang kahumot sang ihibalo sa Dios, kag anong pamangkot ang dapat naton ipamangkot sa aton kaugalingon?

³ Sa karon, ang daku nga hilikuton sang pagpalapnag sa kahumot sang ihibalo sang Dios ginahimo sa bug-os nga duta​—⁠sa kasangkaron nga labi pa antes sang tawhanon nga maragtas. Nagalakip ini sa pagpanaksi sang tanan nga katawhan nahanungod sa natukod na karon nga Ginharian sang Dios sa idalom sang iya gintangdo nga Hari, si Jesucristo. (Mateo 6:​10; Binuhatan 1:8) Ginatamod mo bala ang pag-alagad nga nagabantala sang Hari kag sa iya Ginharian subong hamili nga bahandi? Si Jesucristo, nga nanguna sa pagbantala sang maayong balita sina nga Ginharian, nag-apresyar sini sa sina nga paagi, nagahatag sing sulundan.​—⁠Mateo 4:​17; 6:​19-21.

Pagpahumot sa Dalan sa Prosesyon sang Kadalag-an

4. Suno sa 2 Corinto 2:​14, paano karon ginapangulohan sang Dios ang iya mga alagad sa duta, kag anong dumaan nga batasan ang ginapatuhuyan sang pinamulong ni Pablo?

⁴ Ngaa ang pag-alagad sa Dios dapat pakabahandion? Ang isa ka rason amo nga bisan karon ang mga nagaalagad kay Jehova nagaagom sing tumalagsahon nga pribilehiyo nga tuytuyan sang Dios sa isa ka daku nga prosesyon sang kadalag-an. Suno sa New International Version, ang 2 Corinto 2:​14 nagasiling: “Salamat sa Dios, nga pirme nagapangulo sa aton sa prosesyon sang kadalag-an nga kay Cristo kag paagi sa aton nagapalapnag bisan diin sang kahumot sang ihibalo tuhoy sa iya [“nagahimo sang aton ihibalo tuhoy sa iya nga maglapnag sa bug-os nga kalibutan kaangay sang maamyon nga pahumot!” Phillips].” Ina nga pinamulong ni apostol Pablo nagapatuhoy sa dumaan nga batasan sang paghiwat sing mga prosesyon sa kadalag-an.⁠a

5, 6. (a) Ano ang nagakatabo sa mga prosesyon sa kadalag-an sang dumaan nga Roma, kag ano ang kahulugan sang matam-is nga kahumot sa ila? (b) Ano ang espirituwal nga aplikasyon sang ilustrasyon sa 2 Corinto 2:​14-16?

⁵ Sadto anay sa kaadlawan sang republika sang Roma, ang isa sang labing mataas nga kadungganan nga mahatag sang Senado sa nagpangdaug nga heneral amo ang pagtugot sa iya nga isaulog ang iya pagdaug upod ang magasto nga prosesyon sang kadalag-an. Ang Romanhon nga prosesyon mahinay nga nagaagi sa Via Triumphalis kag nagalab-ot tubtob sa likuon pasaka sa templo ni Jupiter sa ibabaw sang Bungyod Capitoline. Ang mga hari, mga prinsipe, kag mga heneral nga gindala nga bihag sa inaway, upod ang ila mga anak kag mga kabulig, nagalakat nga ginakadenahan, sing masami gin-ubahan nga hubo, sa daku nila nga kahuluy-an.

⁶ Sa pag-agi sang prosesyon sa siudad sang Roma, ang mga tawo nagasab-ug sing mga bulak sa kangga sang mandadaug, kag ang nasindihan nga incienso nagapahumot sa bug-os nga ruta. Ining matam-is nga kahumot nagakahulugan sing kadungganan kag mas malig-on nga kabuhi para sa madinalag-on nga mga soldado. Apang nagakahulugan ini sing kamatayon sa wala ginpatawad nga mga bihag nga palatyon pagkatapos sang prosesyon. Nagapaathag ini sa espirituwal nga aplikasyon ni Pablo sa ilustrasyon sa 2 Corinto 2:​14-16. Ina nga laragway nagapresentar kay Pablo kag sa mga masigka-Cristiano subong debotado nga mga sakop sang Dios, “kaupod ni Cristo,” ang tanan nagasunod sa madinalag-on nga katawhan sang Dios kag ginapangulohan Niya sa isa ka daku nga prosesyon sang kadalag-an sa mahumot nga ruta.

Kaamyon sang Kabuhi Ukon Baho sang Kamatayon

7, 8. (a) Paano ginapalapnag sang mga Saksi ni Jehova ang matam-is nga kahumot sang ihibalo sa Dios? (b) Samtang ginapalapnag sang mga Saksi ang malaragwayon nga kahumot, ano ang reaksion sang mga naluwas? (c) Ano ang reaksion sang mga nagakawala?

⁷ Paagi sa pagpalapnag bisan diin sang mga kamatuoran sang Biblia nahanungod sa Ginharian sang Dios sa idalom ni Cristo, ang mga Saksi ni Jehova nagapalapnag, nagapakita, kag nagapadayag bisan diin sang matam-is nga kahumot sang ihibalo sang mainawaon nga Dios nga ang kamatuoran naghilway sa ila gikan sa dimatuod nga relihion. Nagamartsa sila sing madinalag-on sa pag-alagad kay Jehova. Ang ila mga dulot sang pag-alagad subong mga Saksi niya kag sang iya Hari kaangay sang kalahamut-an nga incienso kay Jehova. Busa, maapresyar naton kon ano ang buot silingon sang apostol sang nagsiling sia: “Kay kahumot kita ni Cristo nga sa Dios sa mga nagakaluwas kag sa mga nagakawala; sa isa kaamyon gikan sa kamatayon pa kamatayon, sa iban kaamyon gikan sa kabuhi pa kabuhi [“importante nga kahumot nga nagahatag sing kabuhi,” The New English Bible; “ang makapapagsik nga kahumot sang kabuhi mismo,” Phillips].”​—⁠2 Corinto 2:​15, 16.

⁸ Nahangpan sang bunayag sing tagipusuon nga mga tawo nga may kaangay sang karnero nga disposisyon ang kahumot sang ihibalo tuhoy kay Jehova nga ginapalapnag sang iya mga Saksi. Para sa ila ang pagpanaksi nga hilikuton may kaamyon sang kapagros kag kabuhi, sang pagkabuhi, nagahatag-sing-kabuhi nga kamatuoran. Nagapasalamat sila kay Jehova kag sa iya Hari, nga sa ila prosesyon sang kadalag-an sila nagabuylog, kag mabaskog nga nagasinggit: “Ang kaluwasan iya sang aton Dios, nga nagalingkod sa trono, kag sang Kordero.” (Bugna 7:10) Nagaginhawa sila sa atmospera sang kamatuoran sang Ginharian, nga amo ang nagapapagsik nga kahumot sang kabuhi nga nagadul-ong sa kabuhi. Apang ginhatagan sing sayop nga kahulugan ni Satanas kag sang iya mga demonyo ang ikasarang sa pagpanimaho sadtong nagapanguyapot sa dimatuod nga relihion, amo kon ngaa ginatakpan nila ang ila mga ilong kag may pag-uligyat nga nagsikway sang kamatuoran. Para sa “mga nagakawala,” ang kamatuoran kag ang matutom nga nagadala sini nagapalapnag sang kaamyon sang kamatayon nga nagadul-ong sa kamatayon. Ukon subong sang pagbadbad sang New International Version: “Sa isa nga kita baho sang kamatayon.” Ang ­Phillips nagabadbad sini: “Sa ulihi daw kaangay ini sang makamamatay nga baho sang kalaglagan.”

9. Ano nga pamangkot ang ginpamangkot karon ni Pablo, kag paano mo ini sabton, kag ngaa?

⁹ “Sin-o ang tuman bala tungod sining mga butang?” pamangkot sang apostol. (2 Corinto 2:16) Buot silingon, “kag sin-o ang kalipikado para sa hilikuton kaangay sini?” (The Jerusalem Bible) “Kag sa pag-alagad kaangay sini sin-o ang may ikasarang?” (Weymouth) Ang Makasulatanhon nga sabat amo: Mga Saksi ni Jehova! Ngaa? Bangod mga dedikado lamang nga bunayag, sinsero, kag wala nagatinguha sing makagod nga ganansia kag nagahambal sang kamatuoran, sing maathag kag wala sing kompromiso sa dimatuod nga relihion, ang kalipikado para sa sining hilikuton sang pagpalapnag sang kahumot sang ihibalo sa Dios.​—⁠Colosas 1:​3-6, 13; 2 Timoteo 2:⁠15.

10. Ngaa ang klero indi kalipikado para sa hilikuton nga pagpalapnag sang kahumot sang ihibalo sa Dios?

¹⁰ Ang klero sang Cristiandad, nga nagatinguha sang maayo nga tindog sa sini nga kalibutan, indi kalipikado kag wala sing ikasarang para sa sining dimakagod nga pag-alagad. Ngaa? Bangod wala nila matuman ang kinahanglan nga ginpakita sa pinamulong ni Pablo: “Indi kita mga manugbaligya sang pulong sang Dios subong sang madamo, kundi bangod sang pagkahanuot, huo, subong nga gikan sa Dios, sa idalom sang pagtamod sang Dios, kaupod ni Cristo, kita nagahambal.” (2 Corinto 2:17) Ukon subong sang pagbadbad sang New International Version: “Indi kaangay sang madamo, wala naton ginabaligya ang pulong sang Dios tungod sa ganasia. Sa kabaliskaran, kay Cristo kita nagapamulong sa atubangan sang Dios nga may kahamuot, kaangay sang mga tawo nga ginpadala halin sa Dios.”

11, 12. (a) Ngaa ang mga Saksi indi “mga manugbaligya sang pulong sang Dios” bangod sang pagbaton sing mga amot? (b) Kabaliskaran sa nasimbugan nga bersion sang Cristianismo nga ginbakal sang madamo, ano ang ginatanyag sang mga Saksi ni Jehova?

¹¹ Ang mga Saksi ni Jehova ginpadala halin sa Dios, kag ginahimo nila ang ila pagpanaksi nga hilikuton sa idalom sang pagtamod sang Dios. Samtang nagaaman sila sa mga interesado sing hamili nga mga libro kag iban pa nga mga publikasyon nga nagapaathag sang Pulong sang Dios kag nagabaton sing boluntaryo nga mga amot para sa bug-os kalibutan nga pagbantala sang Ginharian nga hilikuton, ina nga buhat indi pagbaligya ukon pagsimbog sa Pulong sang Dios. Sa katunayan, ina nga mga amot bulig lamang sa pagpalapnag sang ihibalo tuhoy sa Dios sa iban pa.

¹² Madamo gid sa karon, sing hungod ukon sing dihungod, ang nagbakal sang nasimbugan nga bersion sang Cristianismo, kay nahisantu ini sa ila makagod nga mga handum kag wala nagaupang sa ila estilo sang pagkabuhi. Nagapati sila nga ginabaton sila sang Dios bangod sang ila pangangkon nga ginahigugma nila sia sa ila mga tagipusuon. Apang, kon ang Pulong sang Dios ginapakita nga supak sa ila mga pagpati kag paggawi, ginapatiku nila ang Kasulatan agod pataason ang personal nga mga opinyon labaw sa nagakaigo nga paghangop sa Biblia. (Mateo 15:​8, 9; 2 Pedro 3:16) Apang ang mga Saksi ni Jehova nagatanyag sing putli, wala nasimbugi nga kamatuoran gikan sa Biblia, busa nagapatubas sing matam-is nga kahumot nga kalahamut-an sa Dios kag sa iya matuod nga mga sumilimba. Busa ginasikway nila ang tanan nga relihioso nga mga tradisyon kag upang sa pagtigayon sing matuod nga ihibalo sa Dios.

13. Sin-o, luwas sa hinaplas nga mga Cristiano, ang yara sa prosesyon sang kadalag-an sang Dios, kag ano ang ginahimo nila bisan diin sila magkadto?

¹³ Sa pagkamatuod, ang mangin yara sa prosesyon sang kadalag-an sang Dios kaupod kay Cristo isa ka dimatupungan nga pribilehiyo nga ginaagom indi lamang sang hinaplas nga mga Cristiano kundi man sang “dakung kadam-an” sang “iban nga mga karnero” bisan karon, kay ang kadalag-an sang Ginharian malapit na. (Bugna 7:​4, 9; Juan 10:16) Samtang ginahulat naton ang iban pa nga kadalag-an sang aton nagapangdaug nga Hari, bisan diin man kita magkadto ginapalapnag naton ang nagahatag-sing-kabuhi nga ihibalo sa Dios kaangay sang pahumot, ukon hamili nga incienso, sa ila nga ang mga tagipusuon nahidlaw sa kamatuoran kag pagkamatarong. Daw ano gid nga pribilehiyo para sa mga kalipikado sa sining tumalagsahon nga hilikuton!​—⁠Juan 17:​3; Colosas 3:​16, 17.

Awtorisado nga Mangin Tawhanon nga Manugpahumot

14. Ngaa ang mga nagapalapnag sang kahumot sang ihibalo sang Dios wala nagakinahanglan sing sertipiko sang awtorisasyon gikan sa mga tawo?

¹⁴ Apang ang nagapalapnag sang kahumot sang ihibalo sa Dios kag sa iya Ginharian nagakinahanglan bala sing diploma ukon sing sertipiko sang awtorisasyon gikan sa mga tawo? Wala! Kita ginsugo, ukon gintangdo na, subong mga Saksi para sa Supremo sang uniberso. Gani, indi kita dapat mangalag-ag sa pagguwa sa latagon nga nagapalapnag sang kahumot sang maayong balita sang Ginharian sang Dios. Dumduma nga si Jehova nagapangulo sa aton. Ang ministeryo ni Jesus gintuman sa atubangan sang “pagsumpong sang mga makasasala.” (Hebreo 12:3) Apang, ang rekord sang pagpanghikot ni Jesus sa latagon, subong sang makita sa Biblia, matuod gihapon, kag ang iya pagpanghikot sa latagon nagakaigo nga nagahatag sa iya sing komendasyon kag nagasakdag sa iya subong matuod nga ministro ni Jehova nga Dios.

15. Paano ginapakita ni apostol Pablo nga ang matuod nga mga Cristiano wala nagakinahanglan sing “sulat sang pagdayaw”?

¹⁵ Si apostol Pablo nag-atubang man sing kaanggid nga makahalangkat nga kahimtangan sang panahon niya paagi sa paghatag sini nga argumento: “Nagasugod bala kami liwat sa pagdayaw sang amon kaugalingon? Ukon nagakinahanglan bala kami, subong sang ginahimo sang iban, sing mga sulat sang pagdayaw ayon sa inyo ukon gikan sa inyo? Kamo amo ang amon sulat sa pagdayaw, nga nasulat sa inyo mga tagipusuon, nga kilalahon kag basahon sang tanan nga tawo. Nagapahayag kamo nga kamo isa ka sulat ni Cristo nga ginsulat namon subong mga ministro, nga nasulat indi sa tinta kundi sa espiritu sang buhi nga Dios, indi sa mga tapitapi nga bato, kundi sa mga tapitapi nga unod, sa mga tagipusuon.”​—⁠2 Corinto 3:​1-3.

16. Ano nga sahi sang sulat ang ginapresentar sang mga Saksi ni Jehova subong pamatuod nga ang ila ministeryo halin sa Dios?

¹⁶ Wala ginakilala sang kalibutanon nga mga awtoridad ang aton komisyon subong mga Saksi ni Jehova. Apang pabayai ang aton hilikuton sa pagpalapnag sang kahumot sang ihibalo kay Jehova nga maghambal sang iya kaugalingon! Ini nga hilikuton indi sarang mapanas, bisan pa ang iban nagadumili sa pagbasa sining nagapanaksi nga ebidensia sang aton ministeryo. Ang mga klerigo nagapresentar sang ila mga dokumento sang sertipikasyon gikan sa nagagahom nga mga hubon sang klero. Walay sapayan, ina mga papel lamang, pulong sang tawo. Ang mga Saksi ni Jehova, luwas sang pagbalikwat sing suporta gikan sa Pulong sang Dios, mga saksi sa unod kag dugo. Ang dakung kadam-an sang iban nga mga karnero nga nalab-ot sang maayong balita sang Ginharian gintipon man sa tuo sang Hari ni Jehova. (Mateo 25:​33, 34) Sila tanan amo ang aton sulat sang pagdayaw, ang sulat nga ginadala naton subong mga Saksi ni Jehova bisan diin sa aton mga tagipusuon kag mga hunahuna kag sarang mapasundayag nga may pagsalig. Yadtong nagadampig sa bug-os uniberso nga pagkasoberano sang Dios kag nagapakigbahin sa pag-alagad sa Dios kaupod sang mga Saksi ni Jehova dokumento mismo sang pagdayaw nga indi mahimo nga ­indi mabasa kag mahibaluan sang tanan nga tawo.

17. Paano ginasulat ang aton “sulat kay Cristo,” kag ngaa nagsiling si Pablo nga ginsulat ini sa mga tagipusuon?

¹⁷ Sa pagkamatuod, nagapaakig ini sa dimatuod nga relihionista kon mabasa nila ini. Apang, ang nagadugang nga dakung kadam-an sang iban nga mga karnero sulat sang pagdayaw gikan kay Jesucristo, ang Maayo nga Manugbantay, nga nagagamit sang tanan nga mga Saksi ni Jehova sa iya hilikuton sa pagbantay. Kita ang lapis, ukon tawhanon nga instrumento, nga ginagamit niya agod masulat ini. Ang sulat wala ginsulat sa tinta nga sarang mapanas, kundi ginsulat ini paagi kag upod sang aktibo nga kusog, ukon espiritu, sang Dios, nga nagapanghikot sa aton. Indi ini kaangay sa kaso ni Moises sang ang sugo sa Napulo ka Sugo ginsulat sang tudlo sang Dios sa duha ka tapitapi nga bato. Ang aton sulat ginsulat sa undanon nga tapitapi sang mga tagipusuon sang tawo, kay ang aton espirituwal nga ministeryo nagapatubas sing pagbalhin sa hunahuna kag tagipusuon sa mga nagabaton sang mahumot nga maayong balita.

18. Anong resulta ang nagahimo sa mga nagabaton sang maayong balita nga sulat sang pagdayaw?

¹⁸ Ang aton pagpanghikot upod sa Pulong sang Dios nagtudok sa mainapresyahon nga mga nagabaton sang maayong balita kag nagdul-ong sa tumalagsahon nga mga pagbalhin. Ang ila desisyon nga alagaron ang Dios napamatud-an nga indi lamang hinali nga tindog bangod sang silabo nga ginpukaw sa ila sang isa ka emosyonal nga ebanghelisador. Sa baylo, ini nagarepresentar sa permanente nga pagbalhin sa ila kabuhi pasad sa daw-kristal katin-aw nga kamatuoran sang Balaan nga Biblia. Ang gugma sa matuod nga Dios, kay Jehova, nagapahulag sa ila nga ‘ubahon ang ila daan nga personalidad upod ang iya malimbungon nga mga kailigbon kag isuklob ang bag-o nga personalidad,’ nga nagapasundayag sang “bunga sang espiritu.” (Efeso 4:​20-24; Galacia 5:​22, 23) Busa, ang resulta nagahimo sa ila nga sulat sang pagdayaw. Mas maathag ini sang sa bisan anong ginsulat sang kamot nga sulat naton ukon sang kitaon nga organisasyon nga makapadala sa aton.

19. Paano ginalaragway ni Pablo ang mga kalipikasyon sang “mga ministro sang bag-ong katipan,” kag ano ang epekto sang ila hilikuton sa dakung kadam-an?

¹⁹ Sa 2 Corinto 3:​4-6 si Pablo nagapadayon: “Amo ini ang amon pagsalig paagi kay Cristo ayon sa Dios. Indi nga kami sangkol sa amon kaugalingon sa pag-isip sang bisan ano subong nga gikan sa amon gid, kundi ang amon pagkasangkol gikan sa Dios, nga naghimo sa amon nga sangkol nga mga ministro sang bag-ong katipan.” Bisan pa ang hinaplas nga nagkalabilin lamang ang “mga ministro sang bag-ong katipan,” ang ila hilikuton may epekto sa dakung kadam-an sang iban nga mga karnero, kag magaapektar pa sa dimaisip nga kadamuon sang iban pa nga mga karnero nga pagatipunon. Amo ini ang pagsalig sang tanan nga mga Saksi ni Jehova paagi kay Cristo Jesus kay Jehova nga Dios. Ang nagkalabilin mapasalamaton nga nagapalig-on sa dakung kadam-an sang iban nga mga karnero nga makigbahin sing bug-os tagipusuon sa ‘pagsulat’ nga ministeryo nga gintagna ni Jesucristo sa Mateo 24:​14 kag Mateo 28:​19, 20.

20. (a) Ano ang ginapakita sang report sang Yearbook nahanungod sa mga nagapalapnag sang kahumot sang ihibalo sa Dios? (b) Ano ang masiling naton nahanungod sa aton mga kalipikasyon para sa pagsulat nga minis­teryo?

²⁰ Amo sina ang ila ginhimo, subong sang ginpamatud-an sa report sang 1990 Yearboook diin ang mga Saksi ni Jehova ginapakita nga nagapalapnag sang kahumot sang ihibalo sa Dios sa 212 ka pungsod. Nagadamo sila sing sobra sa 3,787,000 ka aktibo nga mga manugbantala, kag sang nagligad nga tuig lamang naghinguyang sila sing mga 835,000,000 ka oras sa pagbantala sining maayong balita sang Ginharian. Sa Panihapon sang Ginuo sang nagligad nga tuig, 9,479,064 ang nagtambong. Ang hinaplas nga nagkalabilin kag ang mga katapo sang dakung kadam-an sang iban nga mga karnero makasiling: “Ang amon pagkasangkol gikan sa Dios.” Ukon subong sang ginasiling sang The Jerusalem Bible: “Ang tanan namon nga kalipikasyon naghalin sa Dios.”

21. Ano dapat ang ginahimo naton tanan, kag ngaa?

²¹ Busa, ipalapnag ang matam-is, nagahatag-sing-kabuhi nga kahumot sang ihibalo sang Dios sa tanan nga lugar! Pun-a ang atmospera sang teritoryo sang inyo kongregasyon sing kahumot sang ihibalo kay Jehova. Nian, subong madinalag-on nga teokratikong Heneral, pangulohan niya kamo sa iya prosesyon sang kadalag-an samtang ang tanan niya nga mga Saksi nagaabante sa sining modernong-adlaw nga ministeryo sang himaya!

[Footnote]

Paano Mo Sabton

◻ Ano nga ilustrasyon ang ginagamit ni Pablo sa 2 Corinto 2:​14-16?

◻ Ano ang epekto sa iban sang pagpalapnag sang kahumot sang ihibalo sa Dios?

◻ Sin-o ang kalipikado para sa sining hilikuton, kag ngaa?

◻ Ngaa ang tawhanon nga mga manugpahumot wala nagakinahanglan sing ginsulat sang kamot nga mga sulat sang pagdayaw para sa ila hilikuton?