Ang Papa kag ang Apokalipsis

AVERTING ARMAGEDDON (Pagpugong sa Armagedon) amo ang titulo nga ginhatag sang duha ka reporter sa ila 1984 nga libro sa ulihi nga politika sang papa. Sanday Gordon Thomas kag Max Morgan-Witts nagreport sa pagkapapa sa kapin na sa 17 ka tuig. Ano nga paghangop ang matigayon naton gikan sa ila tuhoy sa kabalaka sang mataas nga nibel sang Iglesia Katolika nahanungod sa apokalipsis?

Suno sa sining mga reporter, si Monsignor Emery Kabongo, personal nga sekretaryo kay Juan Paulo II, nagsiling: “Ang Papa kaangay sang espirituwal nga Hercules nga nagatinguha sa pagpabulagay sa mga superpower, nagatinguha sa pagpugong sa nuklear nga Armagedon.”

Daw subong bala nga ang mga lider sang iglesia nabalaka sing labi nahanungod sa tugob-globo nga kalaglagan paagi sa tawhanon nga buhat sa baylo sang sa mapilion nga pagpasilabot sang Dios sa hilikuton sang tawo—ang apokalipsis nga ginatagna sang Biblia. Busa, ang Averting Armageddon nagasiling: “Lakip sadtong nadalahig kay Kabongo, wala sing nagguwa nga tanda sang kahuol sa pagtinguha nga punggan ang apokalipsis ang natukiban nila. . . . Apang sa likod sining paagi yara ang tension nga amo ang direkta nga kasugpon gikan sa internasyonal nga Synod of Bishops. Naghinakop ini sing mga paghinambalanay sa puno sing paghukom nga komento, nagapakamalaut sa ‘makiawayon nga pagkaagresibo, kasingki kag terorismo, pagtukod sang mga talagoan sang mga hinganiban nga kombensional kag labi na sang nuklear nga mga hinganiban, kag iskandaloso nga pagbaligyaanay sang tanan nga hinganiban sa inaway.’” Bisan ang papa nadalahig. Sanday Thomas kag Morgan-Witts nagareport nga sa mga talagoan sang libro sa iya tolon-an yara ang mga sinulatan kaangay sang International Defense Review, The Problems of Military Readiness, kag Surprise Attack: Lessons for Defense Planning. Nagadugang sila:

“Malapit sa mga ensiklikal amo ang mga libro nga nagahinun-anon tuhoy sa topiko nga nagaganyat sa Papa: eskatolohiya, pagtuon sa mga panudlo sang Biblia nga nagapangatarungan nga inagurahan sang Dios ang Iya Ginharian sa duta paagi sa mga serye sang ‘mga hitabo’ sa pagtapos sang dag-on. Si Juan Paulo nagapati sing hanuot . . . nga, ayhan sa wala pa matapos ang isa ka siglo, may pila ka butang nga ‘mapinamat-uron’ ang magalaglag sa kalibutan. Mangin kamatay bala ini, ang ikaduha nga Itom nga Kamatayon? Ukon malawig nga tig-ilinit bala ukon gutom sa dimahanduraw nga kasangkaron? Ukon nuklear nga inaway bala? Masami niya nga ginakahadlokan ang naulihi; ayhan, nakilal-an sia nga nagahunahuna, ginhimo sia nga ulo sang Iglesia sa mahimo mangin katapusan nga dekada sang kalibutan sa wala pa ini permanente nga malaglag sang nuklear nga kalaglagan.”

Ang Averting Armageddon nagapatalupangod man sa simbuliko nga “doomsday clock” nga tayuyon nga ginapatalupangod sa Bulletin of the Atomic Scientists. Sang ining “relo” ginbalhag una sang Disiembre 1947, ginbutang ini sing pito ka minuto antes sang tungang gab-i agod ipakita “kon daw ano kalapit ang kalibutan sa nuklear nga Armagedon.” Pagkatapos sang kasugtanan sa paglatid sa mga armas (SALT) sang 1972, ang mga kamut sang relo ginbutang pabalik sa 12 minutos sa wala pa ang tungang gab-i. Sang 1984 sanday Thomas kag Morgan-Witts nagsulat: “Ang relo mabasa na karon nga tatlo na lamang ka minuto kag magtungang gab-i. Amo ini ang pinakamalapit sa adlaw sang paghukom sa katloan ka tuig.”

Walay sapayan sang mga panikasog sang papa nga “punggan ang nuklear nga Armagedon,” sadtong Nobiembre 1985, ang mga kamut nagapakita gihapon sing mga tatlo na lamang ka minuto. Apang, indi naton pagdulaon ang kabalaka sa kon bala laglagon sang mga pungsod ang katawhan. Sa baylo nga tinguhaan punggan ang apokalipsis, maalamon nga pangitaon naton ang dalanon sang Dios sa kaluwasan sa apokalipsis, kay amo gid ini ang “magaabot sa bug-os napuy-an nga duta.”—Bugna 3:10.