Gamita sing Nagakaigo ang Cristianong Kahilwayan
ANG mga Cristiano “gintawag sa kahilwayan,” apang ginapaandaman sila nga indi ‘paggamiton ining kahilwayan subong panghaylo sa unod.’ (Galacia 5:13; 1 Pedro 2:16) Daw ano kasubo kon abusohan sang Cristiano ang iya Cristianong kahilwayan agod maulipon liwat. Binagbinagon naton ang isa ka halimbawa.
Madamo nga relihiosong mga tawo ang gintudloan nga ang pag-inum sing alkoholiko nga mga ilimnon isa ka sala. Ang sibu nga ihibalo sa Biblia magahilway sa iya gikan sa sining sayop nga ideya, bangod indi ang pag-inum kundi ang pagpahubog ang ginapakamalaut sang Biblia. (Ipaanggid ang Salmo 104:14, 15 sa 1 Corinto 6:10 kag 1 Pedro 4:3.) Gani karon inang nahilway nga Cristiano hilway na sa pagkalipay sa pag-inum kon kaisa. Apang kon ‘gamiton niya ining kahilwayan subong panghaylo sa unod,’ mahimo nga mapasobrahan niya ini, kag sa amo magasandig na sia sa alkohol kag maulipon pa gani sini.
Sa amo, sa tapos mahilway gikan sa sayop nga mga pagtamod tuhoy sa kalingawan, pagpanapot kag pagpamustora, ukon paggawi sa katilingban, ang Cristiano indi dapat magpasobra sa pihak naman: nagagasto sing sobra nga tion ukon kuwarta sa mga butang nga sang una ginadumilian apang ginatugutan na karon. Pag-abuso ini sa Cristianong kahilwayan. May serioso ini nga mga bunga.
Ibantala ang Paglaum nga Kahilwayan
Labi na sang matukod ang Mesianikong Ginharian sang Dios sang 1914 ang iya saad nga ang “tinuga hilwayon sa kahiulipnan sang pagkamadinulunton kag makaagom sing mahimayaon nga kahilwayan sang mga anak sang Dios” madasig nga nagapadulong sa katumanan sini. (Roma 8:21) Ginhilway na ni Cristo ang langit gikan sa impluwensia ni Satanas. (Bugna 12:7-12) Sa dili madugay laglagon niya ang Babilonia nga Daku, nga nag-ulipon sa tawo paagi sa relihioso nga sayop. Nian sa inaway sang Har–Magedon sang Dios, hilwayon niya ang katawhan gikan sa dihimpit nga mga pangulohan sang tawo paagi sa pagdugmok sa ila. (Daniel 2:44; Bugna 18:21; 19:11-21) Hilwayon man nila ang katawhan gikan sa puno nga manugsakdag sang pagkaulipon kon si Satanas indi na makahikot kag indi ‘makadaya sa mga pungsod tubtob nga matapos ang isa ka libo ka tuig.’—Bugna 20:2, 3.
Sa katapusan sang iya Isa ka Libo ka Tuig nga Paghari, bug-os nga mahilway ni Cristo ang tawo gikan sa tanan nga malain nga epekto sang orihinal nga kahublagan para sa kahilwayan didto anay sa Eden. Ang gin-ihig-ihig nga mga grupo sang rasa mahilway na gikan sa dimatarong ukon may pagdampig nga pagtrato. Ang mga babayi mahilway na gikan sa mapiguson nga paggahom sang mga lalaki. Ang mga masakiton mahilway na gikan sa balatian. Ang mga tigulang mahilway na gikan sa makapaluya nga mga epekto sang katigulangan. Kag, labing makatilingala sa tanan, ang mga namatyan mahilway na gikan sa kasubo kay ang ila napatay nga mga hinigugma hilwayon gikan sa lulubngan!—Bugna 20:13–21:5; tan-awa man ang Salmo 146:5-10.
Paagi sa pagbantala sining balaan nga mensahe sang kahilwayan, ginagamit karon sang mga Saksi ni Jehova ang ila Cristianong kahilwayan sa mapuslanon nga paagi. Daw ano kalip-ot sing panulok kon sakdagon nila ang mga kahublagan sang tawo para sa kahilwayan, nga sa labi nga masarangan sini makadala sing diutay lamang nga paumpaw kag, sa kamatuoran, makapalubog sa ginalauman nga matuod nga kahilwayan.
Hunahunaa ini: May kahigayunan ikaw nga masaksihan ang isa ka kahilwayan nga daku pa sa kahilwayan nga ginhambal anay ni Patrick Henry. Dugang pa, may kahigayunan ikaw nga maagom ang mga pagpakamaayo sini sa tapos sang Armagedon sing dayon!