Kon Ngaa ang Pag-abuso sa Gahom Pat-od nga Matapos
ANG dumaan nga si Hari Solomon nagsiling nahanungod sa pag-abuso sa gahom sang iya kaadlawan: “Nagbalik ako kag nakita ang tanan nga pagpigus [pag-abuso sa gahom] nga ginahimo sa idalom sang adlaw, kag, yari karon! ang mga luha sang mga ginpigus, kag wala sila sing manuglipay; kag sa bahin sang ila mga manugpigus may gahom.”—Manugwali 4:1.
Ayhan mamangkot ka, sanglit tuman na kadugay nga nagluntad ang pag-abuso sa gahom, magapabilin ini sa aton sing dayon? Indi, indi ini magapabilin. Bangod, subong sang ginsiling mismo ni Solomon sa idalom sang inspirasyon, may Isa nga nagatan-aw sini tanan: “Kon ang pagpigus sang mga imol kag ang pagpatiku sa katarungan kag pagkamatarong makita [mo] sa awtoridad dili ka magkatingala sa butang, kay ang isa nga mataas pa sa mataas nagatamud, huo, ang Labing Mataas mataas pa sa ila.”—Manugwali 5:8, Rotherham.
Ang Pulong sang Dios, ang Balaan nga Biblia, nagapakita nga si Jehova, nga Labing Mataas, walay katapusan sa gahom kag kaalam, kag himpit man sa katarungan, kag sia amo ang personipikasyon sang gugma. Bangod amo sia sina nga Dios, indi niya pagpabay-an sing dayon ining dimakatarunganon nga mga kahimtangan. Si salmista David nagsulat: “Dili ka magkaakig, ini nagapadulong lamang sa malaut nga buhat. Kay utdon ang mga manughikot sang malaut, apang ang mga nagahulat kay Jehova magapanubli sang duta.”—Salmo 37:8, 9.
Makatigayon kita sing dugang nga pasalig gikan sa pinamulong ni manalagna Isaias: “Silotan ko . . . ang mga malauton tungod sang ila kalautan. Kag pauntaton ko ang pagpabugal sang mga matinaastaason, kag paubson ko ang pagpalabilabi sang mga makakulugmat [mga nagaabuso sa gahom].”—Isaias 13:11.
Apang siniglo na kutob sang ginsulat ina nga mga pulong, gani ngaa makapat-od kita nga tumanon gihapon ni Jehova nga Dios ang iya saad nga tapuson ang tanan nga pag-abuso sa gahom? Bangod kay sang nagligad nga tion ginpakita niya ang iya determinasyon sa paghimo sina. Sa wala pa ang Anaw sang adlaw ni Noe, may yara daku nga pag-abuso sa gahom. Mabasa naton nga “ang duta napuno sing kasingki.” (Genesis 6:5, 11) Kag ano ang kasingki kundi ang pag-abuso sa gahom? Amo man sina ang natabo sa malaut nga mga siudad sang Sodoma kag Gomora sang adlaw ni Lot. (Genesis 18:20, 21; 19:4-29) Sa duha ka hitabo gintapos ni Jehova ang pag-abuso. Gani nakita naton nga si Jehova nga Dios indi amo ang isa nga magapahanugot sing dayon sang pag-abuso sa gahom.
Ang dugang nga rason nga mapat-od naton nga si Jehova magapanghikot amo ang kamatuoran nga maimon sia sa iya ngalan, kag ang tanan nga pag-abuso sa gahom insulto sa iya kamahalan. Talupangda ang kaangtanan sini sa sining mga teksto: “Ang nagapigus sang imol nagapakahuya sang iya Magbubuhat.” “Ang bisan sin-o nga nagauligyat sang imol nagapakahuya sang iya Magbubuhat.”—Hulubaton 14:31; 17:5.
Nian, makasalig gid kita nga ang Labing Mataas indi magapahanugot sa tanan nga tion nga ginapasipalahan sia. Nagabilin ina sa isa na lamang ka pamangkot: San-o matapos ang pag-abuso sa gahom?
San-o Ini Matapos?
Ang Pulong sang Dios nagasugid sa aton nga “sa tagsa ka butang may panag-on, kag tion sa tagsa ka katuyoan sa idalom sang langit.” (Manugwali 3:1) Ayhan ang iban indi magapailob sa orasan sang Dios, apang ginsilingan kita: “Si Jehova wala nagapalantang nahanungod sa iya saad, . . . kundi mabinatason sia ayon sa inyo nga wala nagahandum nga mawala ang bisan sin-o.”—2 Pedro 3:9.
Ang katumanan sang tagna sang Biblia nagapakita nga nagakabuhi kita sa katapusan nga mga adlaw sining malaut nga kalibutan, ukon sistema sang mga butang. Nakita sini nga kaliwatan ang katumanan sang dalagku nga tagna ni Jesus nahanungod sa iya presensia kag sa konklusion sining sistema sang mga butang: mga inaway, mga linog, tiggulutom, mga kamatay, pagmuad sang pagkamalinapason, kag pagbantala sang maayong balita sang Ginharian sang Dios. (Mateo 24:1-35; Lucas 21:10, 11) Nagatudlo ina sa aton tion subong ang katapusan nga mga adlaw sining malauton nga kalibutan.
Bangod amo ini ang katapusan nga mga adlaw, makalaum kita sa dili madugay sa pagtan-aw nga ang tagna sa Sofonias 3:8 matuman: “‘Hulata ninyo ako,’ siling ni Jehova, ‘tubtob sa adlaw nga magtindog ako sa inagaw, kay ang akon hudisyal nga desisyon amo ang pagtipon sang mga pungsod, agod nga matingob ko ang mga ginharian, sa pag-ula sa ila sang akon kaalipungut, ang bug-os kong mapintas nga kaakig; kay ang bug-os nga duta lamonon sang kalayo sang akon kaimon.’”
Sa pagkamatuod, ina nga mga pinamulong nagapasalig nga tapuson ni Jehova nga Dios ang pag-abuso sa gahom.