Report sang mga Manugbantala sang Ginharian
Ang mga Pamatan-on sa Italya Nakakita sing mga Kahigayunan sa Pagpanaksi
ANG mga nagaapresyar sa dalayawon nga mga katuyuan sang Dios nalipay sa pagbulig sa iban nga maton-an ang dalayawon nga paglaum sa Ginharian. Kinahanglan sini sa masami ang paghimulos sa mga kahigayunan nga nagautwas, subong ginapakita sang masunod nga report gikan sa Sardinia.
◻ “Ang isa ka pamatan-on nga 12-anyos nga manugbantala nagasakay sa bus pauli gikan sa pag-alagad sa latagon. May nagasakay man sa bus nga duha ka pamatan-on nga lalaki kag isa ka lin-ay, 18 anyos tanan. Ang pamatan-on nga manugbantala nagpungko sa tupad sang lin-ay kag nagbasa sing Magmata! nga magasin, nagalaum nga pukawon ang iya interes. Natalupangdan sang lin-ay ang magasin kag namangkot sia kon ano ang iya ginabasa. Ginpaathag niya nga ginabasa niya ang artikulo tuhoy sa solusyon sa mga problema nga ginaatubang sang mga pamatan-on. Nagsiling sia nga nakabenepisyo sia sing daku gikan sa sining materyal kag makabulig man ini sa iya. Malipayon nga ginbaton niya ang mga magasin.
“Bangod nabatian ang paghambalanay, ang duha pa ka pamatan-on nga lalaki nangabay man sing mga magasin. Samtang ginakuha nila ang ila iamot nga kuwarta, ginsilingan sila sang tsuper nga indi pag-uyangan ang ila kuwarta sa sinang walay pulos nga mga butang. Nagsabat ang mga pamatan-on nga intelihente sila, kag ang mga magasin makawiwili. Sa sini ginpahigad sang tsuper ang bus sa higad sang dalan, ginpadulog ang bus, kag gintan-aw kon ano ang makawiwili gid sa sining mga magasin. Nagbaton man sia sing mga kopya.
“Ang pamatan-on nga Saksi nga nag-asoy sining eksperiensia nagsiling: ‘Nalipay gid ako nga nagpanaksi ako sa bus.’”
◻ Ginhimuslan sang isa pa ka pamatan-on nga Saksi ang isa ka kahimtangan sa eskwelahan. Ining pamatan-on nagaasoy: “Gintudluan kami sang amon manunudlo sing isa ka metodo sa pagtuon nga tuhay sa tradisyonal nga paagi. Sa tapos mabinagbinag ang materyal, magahimo kami sing balayan nga nagalakip sing dalagku nga mga punto kag sing sekondaryo nga mga punto kag dayon maghatag sing ekstemporanyo nga pamulongpulong tuhoy sa tema.
“‘Pamilyar gid ako sa sining metodo,’ siling sang Saksi. ‘Amo ini ang ginapanugda sa Theocratic Ministry School Guidebook.’ Natalupangdan dayon sang manunudlo nga ako lamang ang nangin madinalag-on sa pag-aplikar sining metodo. Namangkot sia kon ngaa may daku nga kinatuhayan ang akon ginhimo sang sa iya sang iban. Ginpaathag ko nga naton-an ko ining metodo sa Teokratikong Eskwelahan sa Ministeryo. Nahamuot gid sia kag gin-agda niya ako nga iilustrar ini sa klase, nga ginagamit ang Theocratic Ministry School Guidebook. Ginhimo ko ini.
“Pagpauli ko, ginsugiran ko ang akon pamilya sang natabo. Ang akon amay, nga indi Saksi, pirme nagasiling anay nga ang akon pagka-Saksi ni Jehova isa ka sablag sa eskwelahan, apang sa tapos mapamatian ang akon eksperiensia, napilitan sia sa pagbag-o sang iya hunahuna.”
Daw ano ka daku nga pribilehiyo ang yara sa inyo nga mga pamatan-on, subong man sa inyo nga mga hamtong, sa pagsakdag kag sa pagpakilala sang ngalan ni Jehova!—Salmo 148:12, 13.