Report sang mga Manugbantala sang Ginharian

◻ ANG “daku nga paghingabot” batok sa nahauna nga Cristianong kongregasyon nagpaaplaag sa madamo nga disipulo ni Cristo. (Binuhatan 8:1) Apang, nagbalandra ining paghingabot kay ang mga nag-aplaag “nagpanglakatan nga nagawali sang maayong balita sang pulong.” (Binuhatan 8:4) Si Felipe nagpadayon sa pagbantala, kag “ang mga kadam-an nagtalupangod sing hiusa.” (Binuhatan 8:6) Subong nga ang paghingabot sang nahaunang siglo nagbalandra, amo man sini ang natabo sa isa ka minuro sa naaminhan sang Thailand.

May isa ka espesyal nga payunir sang mga Saksi ni Jehova nga nagbantala sa sining minuro, apang sang primero wala mamati ang mga taga-minuro. Apang, sang makighambal sia sa lokal nga predikador, gintipunan sila sang mga tawo agod mamati. Narealisar wala madugay nga kapin ang nahibaluan sang Saksi sa Biblia sang sa ila ministro, gani nagsugod sila sa pagtuon sang Biblia upod sa payunir bisan pa gintublag sila sang iban. Ang iban sang ila mga pato ginpatay, ang kabuhi sang payunir ginpahog, kag ang balay sang isa ka interesado nga tawo ginsunog. Ini nga tawo nagsiling: “Masunog nila ang akon balay, apang indi nila masunog ang akon tagipusuon.” Malayo ang ginabisikleta sang mga nagatuon upod sa Saksi agod makatambong sa mga miting sa Kingdom Hall. Apat sa ila ang nagpabawtismo, kag ang anom pa nagatambong gihapon sa mga miting upod sa ila.

Padya sa Pagkabunayag

◻ Ang kauturan sa Zambia nakatukod sing maayong reputasyon bangod sa pagkabunayag, kag ginpakamaayo sila bangod sini, subong man nakabulig ini sa iban nga makilala ang kamatuoran. Ang isa ka gulang, nga isa ka regular nga payunir, nagasakay sa bus kag nabatian niya ang isa ka Saksi sa bus nga nagapakighambal sa iban nahanungod sa pagkabanhaw. Ginpamangkot sia sang isa ka pasahero: “Ngaa kamo nga mga Saksi nagasiling nga ang inyo relihion amo lamang ang matuod?” Nagbuylog ang utod sa paghambalanay kag nagsiling sa pasahero nga padyaan ni Jehova ang iya mga Saksi bangod ginatudlo nila ang kamatuoran gikan sa Biblia.

Pagligad sang tungang-gab-i sa sining malawig nga paglakbay, nag-abot ang bus sa isa ka punto nga may lambay sa dalan. Mabunok ang ulan sadto. May soldado nga nagsulod sa bus kag namangkot sia kon may mga Saksi sa mga pasahero. May tatlo. Nian nagsiling sia: “Sige, ang mga Saksi magpabilin sa pulungkuan, ang nabilin manaug nga dala ang inyo mga bag.” Ang tanan nga iban pa nanaug sa ulanan, kag sa tapos sang pag-usisa, nagsaka sila liwat upod ang ila mga dala kag basa ang ila panapton.

Sa sulod liwat sang bus, ang soldado nagsiling: “Ang rason kon ngaa ginpabilin ko ang mga Saksi amo nga sila bunayag nga mga tawo. Madamo na kami sing eksperiensia kag nasapwan namon nga sila lamang ang bunayag; kon mamangkot kami kon ano ang yara sa sulod sang ila bag, nagasugid sila sing matuod.” Samtang nagadalagan ang bus, ang utod namangkot: “Diin ang matuod nga relihion?” Ang isa ka tawo nagsabat: “Amo ang wala mabasa sang ulan.”

Huo, ang pagkabunayag nagabulig sa pagpakilala sa matuod nga relihion, kag may padya gid ini!