Kahulugan sang Balita

Ang Sayop nga Tanda

“Ano ang imo tanda (sign)?” Para sa minilyon ka tawo nga nagatan-aw sa “star­sign” nga mga tsart nga ginhanda sang mga astrologo, ina nga pamangkot importante katama. Nagapati sila nga ang posisyon sang mga bituon, mga planeta, adlaw, kag bulan may kahilabtanan sa konstelasyon sang zo­di­ac sa tion sang pagkabun-ag direkta nga nagaimpluensia sa kabuhi sang isa. Apang, suno sa pamantalaan nga Independent sang London, ang mga astrologo nagahatag sing sayop nga tanda sa mga tawo. Ang “star­sign” nga mga tsart nga ginagamit para sa mga horoskopyo ginpasad sa astrolohiko nga “mga kasuguan” nga ginhimo mga 2,000 ka tuig ang nagligad.

Ang Independent nagasiling: “Ginasilingan sang isa ka astrologo ang mga ginikanan sang bag-o natawo nga lapsag sa karon nga adlaw nga Cancer sia.” Apang, ang report nagasiling: “Apang kon tan-awon nila ang posisyon sang adlaw sa langit, masapwan nila nga ang adlaw sa katunayan Gemini.” Ano ang kabangdanan sini? Ginatawag ini sang mga astronomo nga “pre­ces­sion of the equi­noxes,” ang hitabo diin ang ehe sang duta, sa epekto, nagawalog-walog kaangay sang trompo samtang manugdulog na ini. Ini nga pre­ces­sion, ukon “walog-walog,” nagakompleto sang 360 ka grado nga siklo kada 25,800 ka tuig, nga nagakahulugan nga ang mga equi­nox nagaabante sing 50 segundos sang arko kada tuig, ukon isa ka grado sa sulod sang 72 ka tuig. Busa, sang nagligad nga 2,000 ka tuig, ang ginkunokuno nga posisyon sang adlaw sa langit nag-isol sing isa ka bug-os nga tanda sang zo­di­ac. Subong resulta, “ang horoskopyo pagkatawo indi amo ang tunay nga larawan sa langit sa tion sang pagkatawo,” paathag ni Rich­ard F. Smith sa iya libro nga Prelude to Science. “Ang kalabanan sang mga Scorpio sini nga kalibutan,” paathag niya, “tunay nga natawo sang ang adlaw yara sa Libra, ang kalabanan nga Leo mga Cancer, ang mga Cancer mga Gemini, kag padayon.”

Ang pagkadimasaligan sang mga tsart sa bituon kag mga horoskopyo nagapadaku sa kaalam nga magpangayo sing tuytoy sa Manunuga kag indi sa mga butang nga gintuga niya. (Roma 1:24, 25) Apang, ang daku pa nga rason sa paglikaw sa paggamit sa mga horoskopyo amo nga nagadul-ong ini sa pagsimba sa “adlaw ukon sa bulan ukon sa tanan nga kasoldadosan sang langit, ang butang nga wala pag-isugo [sang Dios].”—Deuteronomio 17:2-5.

Wala sing Tubig—Wala sing Kabuhi

Amo ini ang konklusion nga nalab-ot ni Propesor Norman H. Horo­witz, isa ka sientipiko nga katapo sang 1965-76 nga misyon sang Mariner kag Viking sa Mars.

Sa iya libro nga To Utopia and Back: The Search for Life in the Solar System, si Propesor Horo­witz nagsiling nga ang mga resulta gikan sa sining mga misyon maathag nga nagsabat sa pamangkot kon bala may kabuhi sa Mars ukon sa iban pa nga planeta sang aton solar nga sistema. “Ang Mars,” siling niya, “wala sing ekstraordinaryo nga kinaiya nga nagapangibabaw sa palibot sang aton kaugalingon nga planeta, mga oseano sang likido nga tubig nga nadayag sing bug-os sa adlaw.” Ginlig-on sang panalawsaw nga ang planeta wala sing tubig.

Pagkatapos nga ginkuha sa mahalungon nga mga eksperimento ang posibilidad sang kabuhi sa Mars, ginbaton ni Horo­witz: “Ang kapaslawan nga makakita sing kabuhi sa Mars makasulubo, apang pagpahayag man ini. Sanglit ang Mars amo ang labing posible nga puluy-an sang ekstra­ter­restrial nga kabuhi sa solar nga sistema, pat-od na gid sa karon nga ang duta amo lamang ang may kabuhi nga planeta sa aton rehiyon sang galaksiya.”

Daw ano ka nagakaigo nga, sang nagasulat nahanungod sa duta, ang dumaan nga si manalagna Isaias nagsiling nga ang Nagbuhat sini “naghimo sini nga pagapuy-an”! (Isaias 45:18) Ang tubig ginsambit sing una sa kasaysayan sang pagpanuga sa Biblia. Sing maathag, ang pag-aman sa tubig sa wala pa gintuga ang bisan anong kabuhi sa duta kinahanglanon. Subong sang ginpamatud-an sang mga misyon sa Mars: Sa guwa sang espiritu nga duog, diin wala sing tubig, wala sing kabuhi.—Genesis 1:1-10.

[Laragway sa pahina 7]

Ang wala sing kabuhi nga kadaygan sang Mars, nga ginatan-aw gikan sa “Viking II” nga salakyan sa kahawaan

[Ginkuhaan]

NASA photo