Kahulugan sang Balita

Yabi sa Kalipay?

“Duha ka tuig nga pagpangabudlay, dayon nga kalipay.” Amo ini, suno sa Hapones nga pamantalaan nga Yomiuri Shimbun, ang bag-o nga halambalanon sa tunga sang Intsik nga mga estudyante sa Japan. Sa paglaum nga magmanggaranon, ining mga estudyante nagahulam sing kuwarta agod makakadto sa Japan, diin nagapati sila nga nagaulan ang kuwarta gikan sa langit. Nagalaum sila nga paagi sa pag-obra sing duha ka tuig sa part-time nga mga trabaho samtang nagaeskwela, mahimo sila makasupot sing duha ka milyon ka yen (mga $15,400, U.⁠S.) kag nian makapauli agod magkabuhi sing malipayon.

Ina nga pagsalig sa kuwarta subong yabi sa kalipay lapnag sa bug-os nga kalibutan. Ang ulihi nga surbey sa tunga sang mga pamatan-on sa 9 sa 11 ka pungsod nagpakita nga ang “ ‘kuwarta’ nagapanguna sa listahan” sang ginapaligban kag ginakabalak-an nila, siling sang Asahi Evening News.

Ang pagsalig sa mga manggad nagabukas gid bala sang dalan padulong sa kalipay? Ang maalam nga si Hari Solomon nagpaandam nga “ang nagahigugma sang pilak indi mabusog sang pilak.” (Manugwali 5:​10; 7:12) Ang pag-una sa kuwarta wala nagaresulta sa matuod nga kaayawan, ukon nagagarantiya sing palaabuton nga kalig-onan. Halimbawa, ang Biblia nagasiling: “Bisan ang ila pilak ukon ang ila bulawan indi sarang makaluwas sa ila sa adlaw sang kasingkal ni Jehova.” (Sofonias 1:18) Walay sapayan, sa kabaliskaran, si salmista David nagsulat: “Malipayon ang tawo nga ang iya pagsalig si Jehova.” Ang pagsalig kay Jehova, indi sa kuwarta, amo ang yabi sa pag-agom sing dayon nga kalipay.​—⁠Salmo 40:​4; Isaias 30:⁠18.

Ang Problema sa Bawtismo

Duha ka problema nahanungod sa pagbawtismo sa lapsag ang nag-utwas sining karon lang sa sulod sang Church of England. Ang una amo ang may kahilabtanan sa “wala sing ginapili” nga bawtismo, nga ginalaragway sang isa ka klerigo subong daw isa ka sahi sang “espirituwal nga pagbakuna.” Ang ikaduha amo ang pagdumili sang nagadamo nga klerigo sa pagbawtismo sa mga lapsag nga ang mga ginikanan wala nagasuportar sing aktibo sa Church of England.

Narealisar sang madamong klerigo nga ang mga ginikanan masunson nga indi luyag magsimba kag indi luyag nga ang ila mga kabataan magsimba man. Nian ngaa ginapabunyagan nila ang mga lapsag? “Luyag nila pabunyagan ang ila mga lapsag,” komento sang The Times, “subong nga luyag man nila maghatag ukon magbaton sing regalo sa kumpleanyo, magpuni sang ila mga balay kon Krismas . . . Bahin ini sang ila kultora: indi kinahanglan nga may rason.”

Ang isa ka klerigo naghalin bangod namat-od sia nga indi dapat paghimuon ang pagbawtismo sa mga lapsag. Siling niya: “Ang lamang nga makahimo sing panaad kay Cristo amo ang tawo mismo.” Mahimo pa kuntani niya gindugang nga si Jesucristo 30 anyos sang ginbawtismuhan sia kag nga ang Griegong tinaga para sa bawtismo, ba·ptiʹzo, nagakahulugan sing pagsalom ukon pagtum-oy. Matapos mabawtismuhan sa Suba Jordan, si Jesus “nagtakas sa tubig.” (Marcos 1:​10; Mateo 3:​13, 16) Indi makita sa Biblia nga ginsambit ang pagwisik sing tubig sa mga lapsag. Sanglit ang bawtismo simbulo sang dedikasyon sang isa sa Dios subong nagasunod sa tikang nga sumulunod ni Jesus, indi ini isa ka desisyon nga madesisyunan sang lapsag.

Ang mga Kontraseptibo kag ang mga Katoliko

Ang pagpamatok sang Iglesia Katolika sa kontrasepsion ginkompirma ni Juan Paulo II sa Ikaduhang Internasyonal nga Kongreso sa Teolohiya sa Moral nga ginhiwat sa Roma sang nagligad nga Nobiembre. Suno sa pamantalaan sang Vatican City, ang L’Osservatore Romano, sia nagsiling: “Indi ini isa ka doktrina nga gin-imbento sang tawo. Ginsulat ini sang matugahon nga kamot sang Dios sa kinaugali mismo sang tawo. Ang pagduhaduha sa sini katumbas sa indi pagtuman sa Dios,” kag busa, dugang niya, “indi mapangduhaduhaan sang Katolikong teologo.”

Apang ang encíclica nga sulat nga Humanae Vitae nga ginpatuhuyan ni Papa Juan Paulo kag ginsulat sang nagligad nga mga 20 ka tuig ni Paulo VI “gilayon nga ginpangduhaduhaan sang madamo nga teologo,” siling sang Italyano nga pamantalaan nga La Stampa, kag wala ginsapak sang “kalabanan nga mga Katoliko.”

Sing maathag, ang katig-a sang simbahan sa pangduhaduha tuhoy sa pagkontrol sang pamata wala naghiusa sa mga teologo kag nagtublag sing daku sa sinsero nga mga Katoliko. Ang padayon nga pagbinahinbahin tuhoy sa paggamit sang bisan ano nga sahi sang kontraseptibo nagtiklod kay Juan Paulo nga laygayan ang mga teologo nga ang tanan magpamulong sing “pareho nga hambal.” Apang, kabaliskaran sa ginapangangkon sang papa nga ang tindog sang simbahan sa kontrasepsion “ginsulat sang matugahon nga kamot sang Dios,” ang Italyano nga pamantalaan nga La Repubblica nagsiling nga “wala sing bersikulo gikan sa mga Ebanghelyo ukon sa Daan nga Testamento ang ginsitar nga nagapalig-on sa doktrina.”

Ang Biblia wala nagahinun-anon sang paggamit sa kontraseptibo ukon pagkontrol sang pamata sa pag-asawahay, kag wala ini nagasiling nga ang mga Cristiano obligado sa pagpamata. Ang Pulong sang Dios nagabilin sang pamangkot tuhoy sa pagplano sang pamilya sa konsiensia sang tagsa ka Cristianong mag-asawa. Paagi sa pagpatuman sang iya pagsulundan nahanungod sa pagkontrol sang pamata, ang Iglesia Katolika “naglabang sa mga butang nga nasulat.”​—⁠1 Corinto 4:⁠6.