“Sa Prosesyon sang Kadalag-an”
ANG prosesyon sang kadalag-an isa ka makakulunyag nga pagsaulog sang pagdaug sa kaaway. Ang isa sang pinakamataas nga dungog nga ginahatag sang Romanong Senado sa nagdaug nga heneral amo ang pagtugot sa iya nga saulugon ang iya kadalag-an paagi sa isa ka pormal kag magasto nga prosesyon. Makaduha nga ginsambit ni apostol Pablo ang prosesyon sang kadalag-an sa iya mga sulat. Apang, antes naton binagbinagon ang iya mga pulong, tinguhai nga handurawon ina nga prosesyon. Handurawa ang kadam-an nga nagaraya sa dalan samtang mahinay ini nga nagalakat sa Via Triumphalis kag pataklad sing ikis-ikis sa templo ni Jupiter sa ibabaw sang Capitoline Hill sang Roma.
“Ang mahumot nga kaamyon gikan sa nagadabdab nga spices lapnag sa mga templo kag mga dalan, nagapuno sa hangin sang kahumot sini,” sulat sang eskolar nga si James M. Freeman. “Yara sa prosesyon ang senado kag pangunang mga banwahanon sang estado, nga paagi sa pagtambong nila ginapadunggan nila ang nagdaug. Ang pinakamahal nga inati sa inaway, subong sang bulawan, pilak, mga hinganiban nga lainlain sing dagway, mga kinaandan, malaka kag malahalon nga mga buhat sang taliambong, kag tanan nga butang nga ginakabig nga hamili katama sang nagdaug ukon sang gindaug, ginapakita sing hayag sa gutom nga siudad. Ang mga bilanggo sang inaway ginpilit man sa pagmartsa sa prosesyon. Ang heneral, nga sa kadungganan niya gindekrito ang kadalag-an, nagasakay sa isa ka kangga nga pinasahi sing dagway kag ginaguyod sang apat ka kabayo. Ang iya panapton burdado sang bulawan, kag ang iya kunop sing mga bulak. Ang iya tuo nga kamot nagauyat sing isa ka pungpung sang laurel, kag ang iya wala sing setro; samtang sa iya ulo yara ang korona nga Delphic laurel. Sa tunga sang mga singgit sang mga soldado kag hinugyaw sang mga tawo ang nagdaug ginaparada sa dalan pakadto sa templo ni Jupiter, diin ginahalad ang mga halad, nga pagkatapos may publiko nga sinalusalo sa templo.”
Gingamit ni Pablo ang prosesyon sang kadalag-an sing malaragwayon sang ginsulat niya ang iya ikaduha nga sulat sa mga Cristiano sa Corinto sang tuig 55 sang aton Kumon nga Dag-on. Sia nagsiling: “Salamat sa Dios nga nagapangulo sa aton pirme sa prosesyon sang kadalag-an nga kay Cristo kag nagapahayag paagi sa aton sang kaamyon sang pagkilala sa iya sa tagsa ka duog! Kay kahumot kita ni Cristo nga sa Dios sa mga nagakaluwas kag sa mga nagakawala; sa isa kaamyon gikan sa kamatayon pa kamatayon, sa iban kaamyon gikan sa kabuhi pa kabuhi.”—2 Corinto 2:14-16.
Ginalaragway diri si Pablo kag ang iban pa hinaplas nga mga Cristiano subong debotado nga mga sakop sang Dios “nga kay Cristo.” Ginlaragway sila subong mga anak nga lalaki, mga opisyal, kag mga soldado nga nagasunod sa parada ni Jehova kag ginapangunahan niya sa prosesyon sang kadalag-an sa mahumot nga ruta. (Tan-awa Ang Lalantawan, Hulyo 15, 1990, pahina 10-15.) Ining malaragwayon nga paggamit sa sina nga prosesyon nagapakita man nga ang mga nagasikway sa maayong balita sang Ginharian sang Dios may paglaum nga kamatayon lamang. Kag tuhay gid ini para sa hinaplas nga mga sumulunod ni Jesus! Sila may paglaum nga kaluwasan padulong sa dimamalatyon nga langitnon nga kabuhi kaupod ni Cristo. Kag kamusta ang ila matutom nga mga kaupdanan, nga dedikado man sa Dios? Sila may makalilipay nga paglaum nga kabuhi sa dutan-on nga paraiso, diin ang Dios ‘magapahid sang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa.’ (Bugna 21:1-4; Lucas 23:43) Bahin ka bala sining malipayon nga kadam-an?
Ang tuhay nga laragway ginahatag sang Colosas 2:15, diin si Pablo nagsulat: “Ginhuklasan niya ang mga punuan kag mga kagamhanan kag ginpakita sila [sang Dios] sing dayag subong gindaug, nagapanguna sa ila sa prosesyon sa kadalag-an paagi sini.” Diri ang kaaway nga mga pangulohan kag mga awtoridad sa idalom ni Satanas nga Yawa ginlaragway subong mga bihag kag mga bilanggo sa prosesyon sang kadalag-an. Ginaubahan sila ni Jehova nga Mandadaug kag ginpakita sing dayag subong mga napierde. Gindaug sila “paagi sini,” kon sayuron, “sa usok sang pag-antos” ni Jesus. Ang iya kamatayon sa usok naghatag sing sadsaran para madula ang “nasulat sang kamot nga dokumento” (ang katipan sang Kasuguan) kag nagpaposible para sa mga Cristiano nga mahilway gikan sa pagkaulipon sa sataniko nga mga gahom sang kadudulman. (Colosas 2:13, 14) Daku gid ang aton apresasyon sa Cristianong kahilwayan!