Ang Biblia Bala Isa Gid ka Dulot Gikan sa Dios?
“NAGAPATI ako nga ang Biblia amo ang labing maayo nga dulot nga ginhatag sang Dios sa tawo.” Ginsiling ina ni Abraham Lincoln, ang ika-16 nga presidente sang Estados Unidos.a Wala sia nagaisahanon sa iya apresasyon para sa sining madugay na nga libro.
Ang ika-19 ka siglo nga estadista sang Britanya nga si William E. Gladstone nagsiling: “Ang Biblia kilala bangod sang Pagkapinasahi sang Ginhalinan, kag malayo gid ini sa iban pa nga mga libro.” May kaanggid nga panghunahuna, ang ika-18 ka siglo nga estadista sang Amerika nga si Patrick Henry nagsiling: “Ang Biblia takus sa tanan iban pa nga libro nga naimprinta na.” Nahayanghag sa Biblia, ang Pranses nga emperador nga si Napoléon Bonaparte nagkomento: “Ang Biblia indi lamang libro, kundi ‘Buhi’, nga may gahom sa pagdaug sa tanan nga nagapamatok sa sini.”
Para sa iban, ang Biblia nangin tuburan sang bulig kag paumpaw. Ang heneral sang Confederate sang Amerika nga si Robert E. Lee nagsiling: “Sa tanan ko nga problema kag kasubo, ang Biblia wala gid mapaslawi sa paghatag sa akon sing kapawa kag kusog.” Kag bangod sang apresasyon niya sa sining libro, ang presidente sang E.U. nga si John Quincy Adams nagsiling: “Mga tinuig na nga ginhimo ko nga batasan ang pagbasa sang bug-os nga Biblia sing makaisa kada tuig.”
Kon ginhatag sang Labing Mataas ang Biblia sa katawhan, dapat may pamatuod nga ginbugna ini sang Dios. Dapat nga mas daku ini sang sa iban nga libro. Kag agod ang Biblia mangin matuod nga tuburan sang kusog kag panudlo, dapat ini bug-os nga masaligan. Gani, nian, nagapabilin ang pamangkot, Ang Biblia bala isa gid ka dulot gikan sa Dios? Pangitaon naton ang sabat sa sinang pamangkot.
[Footnote]
[Mga Laragway sa pahina 3]
William E. Gladstone
[Kapsion]
Retrato sang U.S. National Archives
Abraham Lincoln
[Kapsion]
Retrato sang U.S. National Archives
Patrick Henry
[Kapsion]
Harper’s U.S. History
Napoléon Bonaparte
[Kapsion]
Gindrowing ni E. Ronjat
John Quincy Adams
[Kapsion]
Harper’s U.S. History
Robert E. Lee
[Kapsion]
Retrato sang U.S. National Archives