Ano ang Benepisyo sang Paghambalanay Tuhoy sa Relihion?

MALANGKAGON nga ginahulat sang mga ginikanan ang una nga mga tinaga nga ihambal sang ila bata. Kon mabatian nila ang sulit-sulit nga mga silaba sa tunga sang pag-udyak, ayhan “Mama” ukon “Dada,” nagaawas ang kalipay sa ila tagipusuon. Sa gilayon ginabalita nila ini sa ila mga abyan kag mga kaingod. Ang una nga pagkomunikar sang bata isa gid ka maayong balita nga nagapahalipay.

Ang mga tunog, ang mga butang nga makita, kag ang mga baho nga makuha sang mga igbalatyag sang isa ka diutay nga bata ginapakitaan sing reaksion. Sa pagkamatuod, ang mga reaksion wala nagapalareho. Apang kon, sa pagligad sang isa ka hut-ong sang tion, wala gihapon nagapakita sing reaksion ang isa ka lapsag sa sining mga butang, nagakaigo lamang nga mabalaka ang mga ginikanan nga basi mahalitan ang pagtubo sang ila bata.

Nagapakita ang mga bata sing kalahamut-an gid nga reaksion sa mga tawo nga kilala nila. Kon kuguson sang iloy ang isa ka bata, masami nga isa ka daku nga yuhum ang resulta sini. Apang, ang pagtandog sang isa ka nagaduaw nga paryente mahimo nga bangdan sang paghibi, kag sang matig-a nga pagpangindi nga kuguson sia. Ang kalabanan nga paryente nga nakaeksperiensia sini wala nagapangampo dayon. Samtang amat-amat sila nga makilala sang bata, sa ila kalipay ang sablag sang indi pagkilalahay nagakadula, kag ang bata nagayuhumyuhum na.

Sing kaanggid, madamo nga hamtong ang nagapangalag-ag sa dayag nga pagpakighambal tuhoy sa ila relihioso nga mga pagtuluuhan upod sa isa nga indi nila kasuod. Ayhan indi nila mahangpan kon ngaa ang isa ka dumuluong luyag makighambal nahanungod sa isa ka personal nga butang​—⁠ang relihion. Ang resulta amo nga ginatugutan nila nga magluntad ang isa ka sablag sa ulot nila kag sang mga nagapakighambal tuhoy sa Manunuga. Nagapangindi pa gani sila sa pagpakighambal tuhoy sa isa ka duna nga kinaugali sang katawhan, ang handum sa pagsimba.

Ang matuod, dapat kita mangin interesado sa pagtuon tuhoy sa aton Manunuga, kag mahimo nga ang pagpakighambal sa iban magapahamtang sa aton sa isa ka kahimtangan nga makatuon kita. Amo sina bangod ang Dios madugay na nga ginaangot sa dayag nga komunikasyon. Tan-awon naton kon paano.

‘Mamati kag Magtuon’

Ang una nga komunikasyon sang Dios sa tawo ginhimo kay Adan sa hardin sang Eden. Apang, sang makasala si Adan kag si Eva, ginpasulabi nila nga manago sang gintawag sila sang Dios, sang luyag niya magkomunikar sa ila sing dugang pa. (Genesis 3:​8-13) Apang, narekord sang Biblia ang mga detalye tuhoy sa mga lalaki kag mga babayi nga nag-abiabi sang komunikasyon halin sa Dios.

Ang Dios nagkomunikar kay Noe tuhoy sa nagahilapit nga kalaglagan sang malauton nga kalibutan sang iya adlaw, nga sa amo si Noe nangin “manugbantala sang pagkamatarong.” (2 Pedro 2:⁠5) Subong humalambal sang Dios sa iya kaliwatan, si Noe wala lamang magpakita sing pagtuo sa mga pagpakig-angot sang Dios sa tawo kundi ginpabutyag man niya sing dayag nga dampig sia kay Jehova. Ano nga reaksion ang nakita ni Noe? Sing makapasubo, ang kalabanan sang iya mga kadungan “wala magtalupangod tubtob nga nag-abot ang anaw kag ginlambas sila tanan.” (Mateo 24:​37-39) Apang malipay kita nga pito ka katapo sang pamilya ni Noe ang namati, nagtuman sang mga instruksion sang Dios, kag nakalampuwas sa tugob-globo nga Anaw. Sa ila naghalin ang tanan nga tawo nga nagakabuhi karon.

Sang ulihi, nagkomunikar ang Dios sa bug-os nga pungsod sang katawhan, ang dumaan nga Israel. Paagi kay Moises, ginhatagan sila sang Dios sing Napulo ka Sugo kag mga 600 ka iban pa nga dapat tumanon nga kasuguan. Ginpaabot ni Jehova ang mga Israelinhon nga tumanon nila ini tanan. Nagsugo si Moises nga kada ikapito ka tuig, sa tion sang tuigan nga Piesta sang mga Kayangkayang, ang Kasuguan sang Dios dapat basahon sing mabaskog. “Tipuna ang katawhan,” tugon niya, “ang mga lalaki, ang mga babayi kag ang mga magamay kag ang imo manlulugayaw nga yara sa sulod sang imo mga gawang.” Para sa anong katuyuan? “Agod nga magpamati sila kag agod nga magtuon sila, kay dapat nila kahadlukan si Jehova nga imo Dios kag magbantay sa paghimo sang tanan nga pulong sining kasuguan.” Ang tanan dapat mamati kag magtuon. Handurawa kon daw ano gid ang kalipay nila sa paghambalanay sang ila nabatian!​—⁠Deuteronomio 31:​10-12.

Kapin sa lima ka siglo sang ulihi, gin-organisar sang taga-Judea nga hari nga si Josafat ang mga prinsipe kag ang mga Levinhon sa isa ka kampanya nga ipasag-uli ang putli nga pagsimba kay Jehova. Naglakbay ining mga tawo sa mga siudad sang Juda nga ginatudluan ang mga pumuluyo sang kasuguan ni Jehova. Paagi sa dayag nga pagpaathag sining kasuguan, ginpakita sang hari ang iya kasidla para sa matuod nga pagsimba. Tuhoy sa iya mga sakop, dapat sila mamati kag magtuon.​—⁠2 Cronica 17:​1-6, 9.

Pagpanaksi Paagi sa Paghambalanay

Ginpadala sang Dios ang iya mismo Anak, nga si Jesus, sa duta agod mangin Iya Humalambal. (Juan 1:14) Samtang ginasaksihan sang tatlo ka disipulo ang pagbaylo-dagway ni Jesus sa atubangan nila, nabatian nila ang tingog mismo sang Dios nga nagasiling: “Ini ang akon Anak, ang hinigugma, nga akon nahamut-an; pamati kamo sa iya.” (Mateo 17:⁠5) Nagtuman sila gilayon.

Sing kaanggid, ginsugo man ni Jesus ang iya mga apostoles nga iwali sa iban ang mga katuyuan sang Dios. Apang sang mga anom ka bulan na lang sang iya ministeryo sa duta ang nabilin, ginpahibalo ni Jesus nga ang hilikuton sa pagbantala sang Ginharian sang mga langit tuman ka daku nga dugang pa nga mga disipulo ang kinahanglanon. Gintudluan niya ang 70 sa ila kon paano ipaathag ang Ginharian sang Dios sa mga dumuluong kag dayon ginpadala niya sila agod ipalapnag yadto nga mensahe sa publiko. (Lucas 10:​1, 2, 9) Sang manugbalik na sia sa iya Amay sa langit, ginpanugyanan ni Jesus ang iya mga sumulunod nga isugid nila sa iban ining mensahe sing kinabubut-on, kag ginsugo sila: “Lakat kamo busa kag maghimo sing mga disipulo sa katawhan sang tanan nga kapungsuran, . . . ginatudluan sila sa pagtuman sang tanan nga butang nga ginsugo ko sa inyo.” (Mateo 28:​19, 20) Sa bug-os nga kalibutan, ginatuman sang matuod nga mga Cristiano ina nga sugo paagi sa pagsugid sa ila mga isigkatawo sang maayong balita sang Ginharian sang Dios. Paagi sa sining mga paghambalanay, nagapanaksi sila sa kamatuoran nahanungod sa Manunuga, nga si Jehova.​—⁠Mateo 24:⁠14.

Mahidaiton, Makapalig-on nga mga Paghambalanay

Sa anong paagi dapat ipaathag sang mga disipulo ni Jesus sa iban ang ila mga pagtuluuhan? Indi nila dapat pauguton ang mga manugpamatok, ukon baison sila. Sa baylo, dapat nila pangitaon ang mga magabaton sa maayong balita kag dayon ipakita sa ila ang Makasulatanhon nga ebidensia sa pagsakdag sini. Sa pagkamatuod, nakita sang Dios ang mga reaksion sang mga nakahambal sang mga disipulo sang iya Anak, kay si Jesus nagsiling: “Sia nga nagabaton sa inyo nagabaton man sa akon, kag sia nga nagabaton sa akon nagabaton man sadtong nagpadala sa akon.” (Mateo 10:40) Daw ano nga pagsikway sa Dios sang ang kalabanan sang mga kadungan ni Jesus nagsikway sang iya mensahe!

“Ang ulipon sang Ginuo dili dapat makig-away,” laygay sang Cristianong apostol nga si Pablo. Sa baylo, sia “dapat magmalulo sa tanan, kalipikado sa pagpanudlo, nagapugong sang iya kaugalingon sa idalom sang kalautan, nagatudlo nga may kalum-ok sa mga wala sing huyog sa pag-ugyon; basi hatagan sila sang Dios sing paghinulsol nga nagadul-ong sa sibu nga ihibalo sa kamatuoran.” (2 Timoteo 2:​24, 25) Ang paagi nga gingamit ni Pablo sa pagwali sing maayong balita sa katawhan sang Atenas, Gresya, isa ka maayong huwaran. Nangatarungan sia sa mga Judiyo sa ila sinagoga. Sa adlaw-adlaw sa balaligyaan nakighambal sia sa “mga natabuan nga didto sa malapit.” Bisan pa ang iban, wala sing duhaduha nga luyag lamang mamati sa bag-o nga mga ideya, naghambal si Pablo sa direkta kag malulo nga paagi. Ginpaathag niya sa iya mga manugpalamati ang mensahe sang Dios, nga nagalaygay sa ila sa paghinulsol. Ang ila reaksion pareho gid sa ginapakita sang mga tawo karon. “Ang iban nagsugod sa pag-uligyat, samtang ang iban nagsiling: ‘Mamati pa kami liwat sa imo nahanungod sini sa iban nga tion.’ ” Wala mamilit si Pablo nga palawigon pa ang paghambalanay. Sa tapos mabantala ang iya mensahe, sia “nagguwa gikan sa tunga nila.”​—⁠Binuhatan 17:​16-34.

Sa tapos sadto, ginsugiran ni Pablo ang mga katapo sang Cristianong kongregasyon sa Efeso nga sia ‘wala magdingot sa pagsugid sa ila sang bisan anong butang nga mapuslanon ukon sa pagtudlo sa ila sa dayag kag sa pamalaybalay.’ Dugang pa, sia ‘maid-id nga nagpanaksi sa mga Judiyo kag sa mga Griego nahanungod sa paghinulsol sa Dios kag pagtuo kay Jesucristo.’​—⁠Binuhatan 20:​20, 21.

Ginapakita sining Makasulatanhon nga mga huwaran kon paano anay ginpaathag sang matutom nga mga alagad sang Dios sang panahon sang Biblia ang relihion. Gani sa karon man, matutom nga ginahambalan sang mga Saksi ni Jehova ang relihion sa ila mga isigkatawo.

Mga Paghambalanay nga Tuman ka Mabungahon

‘Pamatii ang Pulong sang Dios.’ ‘Pamatii ang iya mga sugo.’ Masunson gid nga mabasa ini nga mga laygay sa Biblia! Mahimo ninyo himuon ini nga mga sugo sang Biblia sa masunod nga tion nga makighambal sa inyo ang mga Saksi ni Jehova. Pamatii ang mensahe nga ginadala nila sa inyo gikan sa Biblia. Ining mensahe indi politikanhon kundi nagasakdag sang isa ka langitnon nga panguluhan sang Dios, ang iya Ginharian. Amo ini ang paagi sang Dios sa pagdula sang mga kabangdanan sang mga inaway karon. (Daniel 2:44) Sa tapos sini himuon sang langitnon nga pagginahom sang Dios ang bug-os nga duta nga mangin paraiso kaangay sang hardin sang Eden.

Ang isa ka anay sekreta pirme lang nagapangindi nga mamati kon ang mga Saksi ni Jehova nagapakighambal sa iya nahanungod sa Biblia. Apang sang magdugang ang krimen, nagbatyag sia sing kalugaw-an sa kabuhi. Gani ginsingganan niya ang masunod nga Saksi nga nagduaw nga usisaon niya ang ebidensia para sa mensahe sang Biblia. Nagsunod ang regular nga mga paghambalanay. Bisan pa makapila magsaylo sing balay ini nga pulis, malipayon nga ginpangita sia sang mga Saksi sa tagsa ka bag-o nga lokasyon agod padayunon ang mga paghambalanay. Sang ulihi nagbaton ang pulis: “Ang ebidensia nga ginapangita ko yara gid sa Balaan nga Kasulatan sa madugay na. Kon yadtong mga Saksi wala magbatas sa pagpakighambal sa akon, yara pa ako kuntani sa kalibutan nga nagapalibog kon ano ang katuyuan sang kabuhi. Ang matuod, natun-an ko ang kamatuoran, kag ihinguyang ko ang nabilin nga bahin sang akon kabuhi sa pagpangita sa iban pa nga nagapangita sa Dios subong ko anay.”

Ang interesado nga mga manugpamati nagahandum gid nga makahibalo sing dugang pa. Nagakaigo lamang nga nagapaabot sila sing mga rason sa mga pagtuluuhan nga ginapresentar. (1 Pedro 3:15) Subong nga ang isa ka bata palapamangkot sa iya mga ginikanan, kag nagapaabot sa ila sa pagsabat, nagakaigo lamang nga ginapaabot mo ang mga Saksi sa paghatag sa imo sing malig-on nga mga sabat. Makasalig ka nga malipay sila sa pagbalik kag hambalan upod sa imo ang mensahe sang Biblia sing dugang pa.

Ayhan may diutay ka na nga nahibaluan sa Biblia. Ayhan nahangpan mo na nga ang ginapaabot sang Dios sa imo magakahulugan sing pila ka mga pagbag-o sa imo pagkabuhi. Indi magpangalag-ag sa pagpadayon bangod sang kahangawa nga ang mga ginapatuman sang Dios magakahulugan sang imo daku gid nga pagsakripisyo. Magadala ini sing matuod nga kalipay. Maapresyar mo ini samtang nagauswag ikaw sing amat-amat.

Una sa tanan, binagbinaga kon sin-o si Jehova, kon ano ang iya ginapaabot sa imo, kag kon ano ang iya ginatanyag. Pangabaya ang mga Saksi nga ipakita sa imo kon ano ang ginasiling sang Biblia tuhoy sini. Pamatud-i ang ila ginasiling sa imo kaugalingon nga Biblia. Kon mapamatud-an mo nga ang mga Saksi makatarunganon sa ila ginapresentar nga kamatuoran nahanungod sa relihion, wala sing duhaduha nga luyag mo usisaon ang madamo pa sang maayong mga butang nga ila mapaambit sa imo gikan sa Kasulatan.​—⁠Hulubaton 27:⁠17.

Ginaabiabi kamo nga panilagan ang mga Saksi sa ila lokal nga tilipunan, ang Kingdom Hall. Makabati kamo didto sing mapuslanon nga mga paghambalanay tuhoy sa Pulong sang Dios. Makita ninyo kon paano ang mga nagatambong nagakalipay sa paghambalanay nahanungod sa mga katuyuan sang Dios. Tuguti ining mga Saksi nga buligan ikaw sa pagtuon sang kamatuoran nahanungod sa kabubut-on sang Dios para sa aton karon. Sabta ang panawagan sang Dios nga hambalan ang matuod nga pagsimba kag batuna ang iya yuhum sang kahamuot, sa pagkamatuod ang dayon nga kabuhi sa Paraiso.​—⁠Malaquias 3:16; Juan 17:⁠3.

[Retrato sa pahina 5]

Dayag nga naghambal si Noe tuhoy sa mga katuyuan sang Dios

[Retrato sa pahina 7]

Subong sang ginhimo ni Pablo sa dumaan nga Atenas, ginatudluan sang mga Saksi ni Jehova ang iban sing mga kamatuoran gikan sa Biblia