Ang Bukid nga “Nagalakat”
SA NAKATUNDAN sang Ireland, ang pinasahi nga bilog nga korte sang Croagh Patrick talalupangdon gikan sa palibot nga mga kabukiran. Kada tuig, sa katapusan nga Domingo sang Hulyo, ang putukputukan sang bukid daw nagalakat kon ang tubtob sa 30,000 ka tawo, bata kag tigulang, nagasaka sa putukputukan (765 metros) sa tuigan nga peregrinasyon ukon paglakbay sa balaan nga duog.
Sa sining adlaw, ang mga peregrino nagataklad-panaug sa isa ka banas nga makitid, batuhon, kag, makatalagam. Sa katunayan, ang katapusan nga talaklaron (mga tatlo ka gatos ka metros) tindugon katama kag ginahuman halos sang mahuyang nga kabatuhan, sa amo nagahimo sang pagtaklad nga makatalagam subong man makakalapoy.
Ang iban nagatiniil nga nagataklad, kag ang pila nagaluhod pa gani. Sang nagliligad nga mga tion, ang peregrinasyon nag-umpisa sa kagab-ihon.
Ngaa ang Croagh Patrick isa gid ka importante nga eksperiensia para sa madamo?
Madugay Na nga Ginpatok Subong Isa ka Duog sang Peregrinasyon
Sadtong maaga nga bahin sang ikalima nga siglo C.E., ginpadala sang Iglesia Katolika Romana si Patrick subong isa ka misyonero nga obispo sa Ireland. Ang iya pangunang tulumuron amo ang pagkumbertir sa mga Irlandes sa Cristianismo, kag sa iya tinuig nga pagbantala kag pagpangabudlay sa tunga sang katawhan, si Patrick ginpadunggan subong ang nagpasad sang sadsaran para sa Iglesia Katolika didto.
Ang iya hilikuton nagdala sa iya sa madamong lugar sa bug-os nga pungsod. Ang isa amo ang nakatundan sang Ireland diin, suno sa pila ka ginhalinan, naghinguyang sia sing 40 ka adlaw kag gab-i sa putukputukan sang isa ka bukid nga ginhingalanan sunod sa iya—ang Croagh Patrick (nagakahulugan sing “Bungyod ni Patrick”). Didto nagpuasa kag nangadi sia para sa kadalag-an sang iya misyon.
Sa sulod sang mga tinuig madamong leyenda ang ginsugid nahanungod sa iya mga paglagulad. Ang isa sang labing bantog amo nga samtang didto sa sadto nga bukid, gindula ni Patrick ang tanan nga man-ug sa Ireland.
Ginasugid sang tradisyon nga gintukod niya sa putukputukan ang isa ka magamay nga simbahan. Bisan pa madugay na nga wala na yadto nga tinukod, ang orihinal nga pundasyon yara gihapon, kag ang lugar subong man ang bukid tinuig na nga nangin isa ka duog sang peregrinasyon.
Mga Bahin sang Peregrinasyon
Para sa mga tigulang ukon sa mga indi anad sa pagtaklad sa bukid, ang matapos lamang ang lima-ka-kilometro nga taklaron nga paglakbay kag makapanaug sing hilway sa aksidente isa na ka hinimuan. Sa estratehiko nga mga duog sa alagyan, nakahanda ang diutay kag hanas nga mga grupo sa pag-atipan sa nanarisari nga mga samad.
May yara tatlo ka duog, ukon estasyon, sa alagyan diin ang mga peregrino nagahimo sing lainlain nga mga penitensia. Ginapaathag ini sing maayo sa bulletin board sa pagsugod sang pagtaklad.—Tan-awa ang kahon.
Ngaa Nagataklad Sila?
Ngaa madamo katama ang nagahimo sining mabudlay nga peregrinasyon? Ngaa nagahimo ang iban sing sobra kon nagataklad?
Ti, nagapati ang iban nga paagi sa pagpangadi sa panahon sang peregrinasyon, ang ila mga pangabay para sa personal nga kaayuhan mahimo nga pamatian. Ginahimo ini sang iban agod makatigayon sing kapatawaran sa nahimo nga sala. Para sa iban, isa ini ka paagi sa pagpabutyag sing pasalamat. Sa pagkamatuod, madamo ang nagataklad bangod sang kasadya sang peregrinasyon. Ang isa ka awtoridad nagkomento nga ‘pagpakita ini sing espiritu kag gugma sang komunidad.’ Nagsiling man sia nga ang pagtaklad sa Croagh Patrick “amo ang ila paagi sang pagsunod sa mga tikang ni Sto. Patrick kag sang pagkilala sa utang nila sa iya sa pagtuo.” Nagdugang sia nga, sing labi ka importante, ang pagtaklad “isa ka dagway sang pagpenitensia bangod ang pisikal nga paghimakas nga nadalahig isa gid ka penitensia. Ang mahinay nga pagtaklad sa putukputukan isa ka malawig nga buhat sang penitensia.”
Ang isa ka tawo bugalon nga nagsiling nga 25 ka beses na sia nga nakataklad! Ginhimo niya ini, siling niya, “agod makahimo sing diutay nga penitensia!” Ang isa pa ka tawo nagpaathag sing simple, “Kon wala sing kasakit, wala sing ganansia!”
Bisan pa nga indi kinahanglanon, madamo ang nagatiniil nga nagataklad sa bukid. Ngaa ginahimo nila ina? Una, ginakabig nila ang duta nga “balaan” kag gani ginauba nila ang ila mga sapatos. Ikaduha, nahisuno ini sa ila tuyo nga ‘makahimo sing diutay nga penitensia.’ Amo ini ang rason kon ngaa ang iban nagahimo pa gani sing lainlain nga mga penitensia nga nagaluhod sa mga estasyon.
Napahulag nga Apresyahon ang Manunuga
Apang ano kon ang isa wala nagaambit sa relihiosong mga balatyagon sang mga peregrino nga nagataklad sa pinasahi nga adlaw? Kon maayo ang tiempo kag may mabakod nga paris sang sapatos, ang bukid sarang mataklad bisan san-o. Wala kami magtaklad sa adlaw nga ang nagalakat nga masa sang mga peregrino nagataklad. Sa tion sang amon masunson nga pagdulog agod magpahuway, nabinagbinag namon ang pagtaklad mismo kag ang epekto sini sa madamo. Nagahunahuna sa linibo ka peregrino nga naghimo sining mabudlay nga pagtaklad kag nagbuhat sing lainlain nga mga penitensia, napahulag kami sa pagpamangkot, ‘Amo bala sini ang ginapangayo sang Dios? Ang ritwal nga pagtaklad ukon paglibot sa pila ka monumento samtang nagapangadi sing sulitsulit nagapasuod gid bala sing labi sa isa sa Dios?’ Kamusta ang laygay ni Jesus nahanungod sa sulitsulit nga mga pangamuyo sa Mateo 6:6, 7?
Sa pagkamatuod, wala kami magtaklad sa bukid agod matigayon ang relihioso nga eksperiensia. Sa gihapon, nagbatyag kami nga nagsuod sing labi sa aton Manunuga bangod naapresyar namon ang iya pagpanuga, kay ang mga kabukiran bisan diin bahin sang mga kalatingalahan sa duta. Gikan sa putukputukan nakita namon sing maathag ang matahom nga talan-awon, nakita pa gani ang baybayon sang Dagat Atlantiko. Sa isa ka bahin ang magagmay nga kapuluan nga nagaidlak-idlak sa linaw sa ubos namon kag sa pihak naman ang bulubakulod kag kigang nga bulubukid nga rehiyon.
Nahunahuna namon ang tatlo ka estasyon. Nadumduman namon ang pinamulong mismo ni Jesus, sang nagsiling sia sa iya matuod nga mga sumulunod: “Kon nagapangamuyo, indi isiling ang amo gihapon nga mga butang sing sulitsulit, kaangay sang ginahimo sang mga tawo sang mga pungsod, kay nagahunahuna sila nga pamatian sila bangod sa paggamit nila sing madamong mga tinaga.”—Mateo 6:7.
Nahibaluan namon nga ang bukid nangin bahin sang isa ka tradisyon nga nag-obligar sa linibo ka tawo sa makakalapoy nga ritwal. Ginbinagbinag namon ang kinatuhayan sini sa kahilwayan nga ginpamulong ni apostol Juan sang sia nagsiling: “Ginatuman namon ang iya [sang Dios] mga sugo; apang ang iya mga sugo indi mabug-at.”—1 Juan 5:3.
Nalipay kami sa amon paglingawlingaw, lakip ang pagtaklad sa Croagh Patrick. Nagpahulag ini sa amon nga hulaton ang tion nga ang tanan nga katawhan mahilway gikan sa di-biblikanhon nga mga tradisyon kag masimba ang mahigugmaon nga Manunuga sang duta “sa espiritu kag kamatuoran.”—Juan 4:24.
[Kahon sa pahina 27]
Pangunang mga Bahin sang Peregrinasyon
Ang tagsa ka peregrino nga nagataklad sa bukid sa Adlaw ni Sto. Patrick ukon sa sulod sang panag-on sang selebrasyon, ukon sa bisan anong tion sang mga binulan sang Hunyo, Hulyo, Agosto kag Septiembre, kag NAGAPANGADI SA SULOD UKON MALAPIT SA KAPILYA para sa mga tinutuyo sang Papa mahimo makatigayon sing kapatawaran sang sala sa kondisyon nga magkadto sa Kompisar kag Balaan nga Komunyon sa Putukputukan ukon sa sulod sang semana.
ANG TRADISYUNAL NGA MGA ESTASYON
May yara tatlo ka “estasyon” (1) Sa tiilan sang bukid ukon Leacht Benain, (2) Sa putukputukan, (3) Sa Roilig Muire, malapit diutay sa Lecanvey [isa ka banwa] nga bahin sang bukid.
Nahauna nga Estasyon – LEACHT BENAIN
Ang peregrino nagalibot sing pito ka beses sa bulubungyod sang mga bato nga nagapangadi sing 7 ka Amay Namon, 7 ka Maghimaya Ka Maria kag isa ka Kredo
Ikaduha nga Estasyon – ANG PUTUKPUTUKAN
(a) Ang peregrino nagaluhod kag nagapangadi sing 7 ka Amay Namon, 7 ka Maghimaya Ka Maria kag isa ka Kredo
(b) Ang peregrino nagapangadi malapit sa Kapilya para sa mga tinutuyo sang Papa
(c) Ang peregrino nagalibot sing 15 ka beses sa Kapilya nga nagapangadi sing 15 ka Amay Namon, 15 ka Maghimaya Ka Maria kag isa ka Kredo
(d) Ang peregrino nagalibot sing 7 ka beses sa Leaba Phadraig nga nagapangadi sing 7 ka Amay Namon, 7 ka Maghimaya Ka Maria kag isa ka Kredo
Ikatlo nga Estasyon – ROILIG MUIRE
Ang peregrino nagalibot sing 7 ka beses sa tagsa ka bulubungyod sang mga bato nga nagapangadi sing 7 ka Amay Namon, 7 ka Maghimaya Ka Maria kag isa ka Kredo sa kada isa [may yara tatlo ka bulubungyod] kag sa ulihi nagalibot sa bug-os nga sakop sang Roilig Muire sing 7 ka beses nga nagapangadi