Manugpakot sing mga Hitabo—Paano Sila Ginatamod sang Dios?
Ang mga manugpakot sing mga hitabo amo ang mga indibiduwal nga nagapangangkon nga may ikasarang sa pagpakot kon ano ang mahanabo sa palaabuton, nga ginatawag sang Biblia subong madyikero nga mga saserdote, espiritistiko nga mga babaylan, astrologo, kag iban pa. Ang Hebreong tinaga nga yid·deʹo·niʹ, nga ginbadbad “propesyunal nga manugpakot sing mga hitabo,” naghalin sa gamot nga tinaga nga ya·dhaʹ (paghibalo) kag nagapahangop sing ihibalo nga natago sa kinaandan nga tawo. Masami ini makita kaupod sang ’ohv, buot silingon “espiritista.” (Deuteronomio 18:11) Ang iban nga mga indibiduwal nakaangkon sing gahom sang okulto paagi sa pagpakig-angot sa mga demonyo, ang malauton nga mga anghel nga mga kaaway sang Dios sa idalom ni Satanas nga Yawa, nga amo ang manuggahom sang mga demonyo. (Lucas 11:14-20) Sang dumaan nga mga tion madamong paagi ang gingamit sining mga manugpakot sa pagtigayon sang ila mga mensahe sa pagpamakot: pagtan-aw sa mga bituon (Isaias 47:13), pag-usisa sa atay ukon ipan pa nga kasudlan sang hinalad nga mga sapat (Esequiel 21:21), pagpatpat sing mga kapalaran (2 Hari 21:6), pagpamangkot sa ginatawag nga espiritu sang mga patay, kag iban pa.—Deuteronomio 18:11.
Ang kabuhi sang mga Egiptohanon, kaangay sang pagkabuhi sang mga Babilonianhon, ginagamhan anay sa daku nga kasangkaron sang ila mga manugpakot. (Isaias 19:3) Sa pihak nga bahin, ang matuod nga mga alagad sang Dios wala gid nagadangop sa amo nga mga tawo para sa impormasyon. Sang ginhatag ang Kasuguan sa Israel wala madugay pagkatapos nga gihilway sila gikan sa kahiulipnan sa Egipto, estrikto sila nga gindumilian sa pagpamangkot sa “propesyunal nga manugpakot sing mga hitabo.” (Levitico 19:31) Ang “imoral nga paghulid” sa sining mga tawo mahimo magresulta sa pag-utod (pagpatay) gikan sa mga katawhan sang Dios. Kag tuhoy sa isa nga nagahimo sini nga buhat, ang kasuguan nagasiling: “Ang lalaki man ukon babayi nga manugpaguwa sang espiritu ukon manugpakot patyon sa pagkamatuod.” (Levitico 20:6, 27) Mga 40 ka tuig sang ulihi, sang manugsulod na sila sa Ginsaad nga Duta kag agod tabugon ang mga pumuluyo sini, ang Israel ginpahanumdom: “Dili ka magtuon sa paghimo suno sa mga kangil-aran sadtong mga pungsod. Manginwalay makita sa imo . . . bisan sin-o nga nagapamangkot sa isa ka espiritista ukon sa propesyunal nga manugpakot sang mga hitabo ukon sing bisan sin-o nga nagapamangkot sa mga patay.”—Deuteronomio 18:9-11.
Kapin sa 350 ka tuig sang ulihi, gindula sang unang hari sang Israel, si Saul, ang tanan nga manugpakot sing mga hitabo gikan sa duta, apang antes sia mapatay nagpakasala sia sing daku kay Jehova sa amo nga personal sia nga nagpamangkot sa “isa ka babayi nga espiritista sa En-dor” agod hibaluon ang iya palaabuton. Sang primero ginhadlukan sia sa pagpakot, apang bangod sang pagpamilit ni Saul “ginpaguwa niya si Samuel,” paagi sa paghimo sing isa ka palanan-awon. Ginlaragway niya ang iya hitsura subong ‘isa ka tigulang nga lalaki nga nagasuksok sing wala sing pako nga bayo.’ Nakombinse si Saul nga si manalagna Samuel yadto. (1 Samuel 28:3, 7-19) Apang indi gid mahimo nga si Samuel yadto kay patay na sia sadto nga tion, kag ang patay “wala sing pangalibutan.” (Manugwali 9:5) Kon buhi pa si Samuel, pat-od nga indi gid sia makig-angot sa isa ka espiritista, kag indi gid pagbuligan ni Jehova kag sang iya mga anghel ang amo nga sahi sang tawo.
Mga 400 ka tuig pagkatapos sang paggahom ni Saul, si Hari Manases sang Juda “naghimo sing daku nga kalautan sa mata ni Jehova, nga nagpaakig sa iya,” lakip ang pagpamangkot sa propesyunal nga mga manugpakot sang mga hitabo, nga nagdamo sa idalom sang iya paggahom. (2 Hari 21:6; 2 Cronica 33:6) Ini tanan dapat dulaon sa pungsod sang apo ni Manases, sang matarong nga si Hari Josias.—2 Hari 23:24.
Ang lamang nga paghinambit sa Cristianong Griegong Kasulatan tuhoy sa demonyohanon nga pagpakot sing palaabuton amo ang hitabo diin ginhilway ni Pablo, didto sa siudad sang Filipos, ang “isa ka alagad nga bata nga babayi nga may espiritu, isa ka demonyo nga nagapamakot.” Ginpamanggaranon niya ang iya agalon “paagi sa buhat sing pagpamakot.” Ginapakita ang kamatuoran nga ang amo nga buhat matuod nga demonyohanon kag batok gid sa Dios, ang agalon sang bata nga babayi nga ginhilway gikan sa demonyo nagtuga sing daku nga problema kay Pablo sa Filipos, nga gintunaan sing pagdala kay Pablo kag sa iya kaupod nga si Silas sa atubangan sing mahistrado, nga nagsugo nga bunalon sila kag bilangguon.—Binuhatan 16:12, 16-24.