Indi Magpalayo sa Teokrasya

“Si Jehova ang aton Hukom, si Jehova ang aton Manughatag-sing-kasuguan, si Jehova ang aton Hari.”​—ISAIAS 33:22.

1. Ngaa ginakabalak-an sang kalabanan nga tawo ang tuhoy sa gobierno?

ANG topiko tuhoy sa gobierno ginakabalak-an gid sang tanan. Ang maayo nga gobierno nagapaluntad sing paghidait kag kabuganaan. Ang Biblia nagasiling: “Paagi sa katarungan ginapalig-on sang hari ang duta.” (Hulubaton 29:4) Sa pihak nga bahin, ang malain nga gobierno nagadul-ong sa inhustisya, kagarukan, kag pagpamigos. “Kon nagagahom ang malaut nga tawo, ang katawhan nagapanghayhay.” (Hulubaton 29:2) Sa bug-os nga maragtas, gintilawan sang mga tawo ang madamo nga sahi sang gobierno, kag sing makapasubo, masami sila nga ‘nagpanghayhay’ bangod sang mga pagpamigos sang ila mga gumalahom. (Manugwali 8:9) May gobierno bala nga magamadinalag-on sa pagpaluntad sing dayon nga kaayawan sa mga sinakpan sini?

2. Ngaa ang “teokrasya” nagakaigo nga paglaragway sa gobierno sang dumaan nga Israel?

² Ang istoryador nga si Josephus nagsambit sang isa ka pinasahi nga gobierno sang sia magsulat: “Ginsalig sang iban nga mga tawo ang supremo nga gahom sang politika sa mga monarkiya, ang iban sa mga oligarkiya, kag ang iban sa grupo sang kilala nga mga tawo. Apang, ang amon manughatag sing kasuguan [si Moises], wala maganyat sa isa sang mga porma sining politikal nga organisasyon, apang ginhatag sa konstitusyon sini ang porma—kon gamiton ang dikinaandan nga tinaga—mahimo tawgon nga ‘teokrasya,’ ginatugyan ang bug-os nga soberanya kag awtoridad sa mga kamot sang Dios.” (Against Apion, II, 164-5) Suno sa Concise Oxford Dictionary, ang teokrasya nagakahulugan sing “isa ka porma sang gobierno sang Dios.” Ang tinaga indi makit-an sa Biblia, apang nagakaigo nga ginalaragway sini ang gobierno sang dumaan nga Israel. Walay sapayan nga may kitaon nga hari ang mga Israelinhon, ang ila matuod nga gumalahom amo si Jehova. Ang Israelinhon nga manalagna nga si Isaias nagsiling: “Si Jehova ang aton Hukom, si Jehova ang aton Manughatag-sing-kasuguan, si Jehova ang aton Hari.”—Isaias 33:22.

Ano ang Matuod nga Teokrasya?

3, 4. (a) Ano ang matuod nga teokrasya? (b) Sa malapit nga palaabuton, ano nga mga pagpakamaayo ang dalhon sang teokrasya sa tanan nga tawo?

³ Kutob sang gin-imbento ni Josephus ining tinaga, madamo nga katilingban ang ginlaragway subong mga teokrasya. Ang iban sa ila nangin tuman ka estrikto, panatiko, kag tuman ka mapiguson. Matuod bala ini nga mga teokrasya? Indi suno sa kahulugan sang paggamit ni Josephus sa tinaga. Ang problema amo nga ang kahulugan sang “teokrasya” nangin masangkad. Ginapaathag ini sang World Book Encyclopedia subong “isa ka porma sang gobierno diin ang estado ginagamhan sang isa ka saserdote ukon mga saserdote, kag diin ang mga katapo sang pagkasaserdote may awtoridad sa sibil kag relihioso nga mga butang.” Apang, ang matuod nga teokrasya indi isa ka gobierno sang mga saserdote. Amo gid ini ang pagginahom sang Dios, ang gobierno sang Manunuga sang uniberso, si Jehova nga Dios.

⁴ Sa malapit nga palaabuton, ang bug-os nga duta mapaidalom sa teokrasya, kag daw ano ina nga pagpakamaayo! “Ang Dios magaupod sa [mga tawo]. Kag pahiran niya ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.” (Bugna 21:3, 4) Wala sang saserdotenhon nga paggahom sang dihimpit nga mga tawo ang makapaluntad sina nga sahi sang kalipay. Ang paggahom lamang sang Dios ang makapaluntad sini. Sa amo, wala ginatinguhaan sang matuod nga mga Cristiano nga paluntaron ang teokrasya paagi sa politikal nga mga buhat. Mapailubon sila nga nagahulat nga magtukod ang Dios sing bug-os kalibutan nga teokrasya sa iya gintalana nga tion kag sa iya kaugalingon nga paagi.—Daniel 2:44.

5. Diin nagapanghikot ang matuod nga teokrasya karon, kag anong mga pamangkot ang nagautwas tuhoy sini?

⁵ Apang, samtang wala pa, may isa ka matuod nga teokrasya nga nagapanghikot. Diin? Sa tunga sadtong kinabubut-on nga nagapasakop sa paggahom sang Dios kag nagakooperar sa paghimo sang iya kabubut-on. Inang mga matutom gintipon subong bug-os kalibutan nga espirituwal nga “pungsod” sa iya espirituwal nga “duta.” Sila ang mga nagkalabilin sang “Israel sang Dios” kag ang ila kapin sa lima ka milyon kag tunga nga Cristianong kaupdanan. (Isaias 66:8; Galacia 6:16) Nagapasakop sila kay Jesucristo, ang langitnon nga Hari nga ginpalingkod ni Jehova nga Dios, “ang Hari nga dayon.” (1 Timoteo 1:17; Bugna 11:15) Sa anong paagi teokratiko ini nga organisasyon? Paano ginatamod sang mga katapo sini ang awtoridad sang sekular nga mga gobierno? Kag paano ang prinsipio sang teokrasya ginasunod sang mga tawo nga may awtoridad sa sulod sang ila espirituwal nga pungsod?

Isa ka Teokratiko nga Organisasyon

6. Paano ang kitaon, tawhanon nga organisasyon ginagamhan sang Dios?

⁶ Paano ang tawhanon nga organisasyon magamhan ni Jehova, nga nagapuyo sa dikitaon nga mga langit? (Salmo 103:19) Posible ini bangod ginasunod sang mga katapo sini ang inspirado nga laygay: “Magsalig kay Jehova sa bug-os mo nga tagipusuon kag indi magsandig sa imo kaugalingon nga paghangop.” (Hulubaton 2:6; 3:5) Ginatugutan nila ang Dios nga maggahom sa ila samtang ginatuman nila “ang kasuguan ni Cristo” kag ginaaplikar ang inspirado nga mga prinsipio sang Biblia sa ila matag-adlaw nga kabuhi. (Galacia 6:2; 1 Corinto 9:21; 2 Timoteo 3:16; tan-awa ang Mateo 5:22, 28, 39; 6:24, 33; 7:12, 21.) Agod mahimo ini, kinahanglan nga mangin mga estudyante sila sang Biblia. (Salmo 1:1-3) Kaangay sa “dungganon” nga mga taga-Berea anay, wala nila ginasunod ang mga tawo kundi padayon nga ginausisa sa Biblia ang mga butang nga ila natun-an. (Binuhatan 17:10, 11; Salmo 119:33-36) Nagapangamuyo sila kaangay sa salmista: “Tudlui ako sang kaayuhan, pagkamabinatyagon kag sang ihibalo mismo, kay nagtuo ako sa imo mga kasuguan.”—Salmo 119:66.

7. Ano ang sistema sang pagdumala sa idalom sang teokrasya?

⁷ Sa tagsa ka organisasyon, dapat may pila nga nagapatuman sing awtoridad ukon nagahatag sing panuytoy. Amo man sa mga Saksi ni Jehova, kag ginasunod nila ang sistema sang awtoridad nga ginbalay ni apostol Pablo: “Ang ulo sang tagsa ka lalaki amo si Cristo; ang ulo naman sang babayi amo ang lalaki; ang ulo naman ni Cristo amo ang Dios.” (1 Corinto 11:3) Nahisuno sa sini, ang kalipikado lamang nga mga lalaki ang nagaalagad subong mga gulang sa mga kongregasyon. Kag bisan nga si Jesus—“ang ulo sang tagsa ka lalaki”—didto sa langit, may yara pa sing “mga nagkalabilin” sang iya hinaplas nga mga kauturan sa duta, nga may paglaum sa paggahom kaupod niya sa mga langit. (Bugna 12:17; 20:6) Sila ang nagahuman sa hubon sang “matutom kag mainandamon nga ulipon.” Ginapakita sang mga Cristiano ang ila pagpasakop kay Jesus, kag busa sa ulo ni Jesus, kay Jehova, paagi sa pagsunod sa pagdumala sinang “ulipon.” (Mateo 24:45-47; 25:40) Sa sini nga paagi, ang teokrasya mahim-ong. “Ang Dios isa ka Dios, indi sang kagamo, kundi sang paghidait.”—1 Corinto 14:33.

8. Paano ginasakdag sang Cristianong mga gulang ang prinsipio sang teokrasya?

⁸ Ginasakdag sang Cristianong mga gulang ang prinsipio sang teokrasya bangod ginakilala nila nga may salabton sila kay Jehova kon paano nila ginagamit ang ila limitado nga awtoridad. (Hebreo 13:17) Kag sa paghimo sang mga desisyon, nagasalig sila sa kaalam sang Dios, indi sa ila kaugalingon. Sa sini, ginasunod nila ang huwaran ni Jesus. Sia ang pinakamaalam nga tawo nga nagkabuhi. (Mateo 12:42) Apang, ginhambalan niya ang mga Judiyo: “Ang Anak indi makahimo sing bisan ano sa iya kaugalingon, kundi lamang ang nakita niya nga ginahimo sang Amay.” (Juan 5:19) Pareho man ang panimuot sang mga gulang kay Hari David. Gingamit niya ang iya daku nga awtoridad suno sa teokrasya. Apang, luyag niya himuon ang paagi ni Jehova, indi ang iya kaugalingon. Sia nangamuyo: “Tudlui ako, O Jehova, sang imo dalanon, kag tuytuyi ako sa dalanon sang pagkamatarong.”—Salmo 27:11.

9. Tuhoy sa lainlain nga paglaum kag lainlain nga mga pribilehiyo sa pag-alagad sa teokrasya, ano ang balanse nga pagtamod sang dedikado nga mga Cristiano?

⁹ Ang iban nagapamangkot kon makatarunganon bala nga ang awtoridad sa kongregasyon ginauyatan lamang sang kalipikado nga mga lalaki ukon kon makatarunganon bala nga ang iban nga mga Cristiano may langitnon nga paglaum samtang ang iban may dutan-on nga paglaum. (Salmo 37:29; Filipos 3:20) Apang, nahangpan sang dedikado nga mga Cristiano, nga ining mga kahimusan napasad sa Pulong sang Dios. Teokratiko ini. Kon ginaduhaduhaan gid man ini, sa masami halin ini sa sadtong wala nagakilala sa mga prinsipio sang Biblia. Luwas sa sina, nahibaluan sang mga Cristiano nga ang mga lalaki kag mga babayi alalangay sa mata ni Jehova kon tuhoy sa kaluwasan. (Galacia 3:28) Para sa matuod nga mga Cristiano, ang mangin mga sumilimba sang Soberano sang bug-os nga uniberso amo ang labing daku nga matigayon nga pribilehiyo, kag malipayon nila nga ginabaton ang bisan ano man nga papel nga ginahatag ni Jehova sa ila. (Salmo 31:23; 84:10; 1 Corinto 12:12, 13, 18) Dugang pa, ang kabuhi nga walay katapusan, sa langit man ukon sa paraiso nga duta, isa gid ka matahom nga paglaum.

10. (a) Anong maayong panimuot ang ginpakita ni Jonatan? (b) Paano ginapakita sang mga Cristiano karon ang panimuot kaangay ni Jonatan?

¹⁰ Sa amo, ang mga Saksi ni Jehova nagalaragway kay Jonatan, ang mahinadlukon sa Dios nga anak ni Hari Saul. Nangin maayo gid kuntani nga hari si Jonatan. Apang, bangod sang pagkadimatutom ni Saul, ginpili ni Jehova si David nga mangin ang ikaduha nga hari sang Israel. Naakig bala sa sini si Jonatan? Wala. Nangin maayo sia nga abyan ni David kag nag-amlig pa gani sa iya batok kay Saul. (1 Samuel 18:1; 20:1-42) Sa kaanggid nga paagi, ang mga may dutan-on nga paglaum wala nahisa sa mga may langitnon nga paglaum. Kag ang matuod nga mga Cristiano wala nahisa sa sadtong nagauyat sing teokratiko nga awtoridad sa kongregasyon. Sa baylo, “ginahatagan [nila] sila sing pinasahi nga pag-ulikid sa gugma,” ginaapresyar ang ila lakas nga pagpangabudlay para sa ila espirituwal nga mga kauturan.—1 Tesalonica 5:12, 13.

Ang Teokratiko nga Pagtamod sa Sekular nga Paggahom

11. Paano ginatamod sang mga Cristiano nga nagapasakop sa teokratiko nga paggahom ang sekular nga mga awtoridad?

¹¹ Kon ang mga Saksi ni Jehova nagapasakop sa teokrasya, sa paggahom sang Dios, paano nila ginatamod ang mga gumalahom sang mga pungsod? Si Jesus nagsiling nga ang iya mga sumulunod “indi bahin sang kalibutan.” (Juan 17:16) Apang, ginakilala sang mga Cristiano ang ila utang kay “Cesar,” ang sekular nga mga gobierno. Si Jesus nagsiling nga dapat nila “ihatag . . . kay Cesar ang mga butang nga iya ni Cesar, apang sa Dios ang mga butang nga iya sang Dios.” (Mateo 22:21) Suno sa Biblia, ang mga gobierno sang tawo “ginabutang sang Dios sa ila relatibo nga mga posisyon.” Ginatugutan ni Jehova, ang Ginahalinan sang tanan nga awtoridad, nga magluntad ang mga gobierno, kag ginapaabot niya nga maghimo sila sing maayo sa ila mga nasakupan. Kon ginahimo nila ini, mga “ministro [sila] sang Dios.” Ang mga Cristiano sakop sang gobierno sang pungsod nga ila ginapuy-an “bangod sang [ila] konsiensia.” (Roma 13:1-7) Sa pagkamatuod, kon ang estado magapatuman sing butang nga supak sa kasuguan sang Dios, ang mga Cristiano “magatuman sa Dios subong manuggahom sangsa mga tawo.”—Binuhatan 5:29.

12. Kon ginahingabot sang mga awtoridad ang mga Cristiano, kay sin-o halimbawa ang ila ginasunod?

¹² Ano kon ginahingabot ang mga Cristiano sang mga awtoridad sang gobierno? Nian ginailog nila ang halimbawa sang unang mga Cristiano, nga nagbatas sing mga dag-on sang daku nga paghingabot. (Binuhatan 8:1; 13:50) Ining pagtilaw sa pagtuo ginapaabot na, bangod nagpaandam si Jesus nga magaabot ini. (Mateo 5:10-12; Marcos 4:17) Apang, yadtong unang mga Cristiano wala magbalos sa mga naghingabot sa ila; ukon nagluya ang ila pagtuo bangod sang pag-ipit. Sa baylo, gin-ilog nila ang huwaran ni Jesus: “Sang ginpasipalahan sia, wala sia magbalos sing pasipala. Sang nagaantos sia, wala sia nagpamahog, kundi gintugyan ang iya kaugalingon sa isa nga nagahukom sing matarong.” (1 Pedro 2:21-23) Huo, ang Cristianong mga prinsipio nagadaug sa mga pagsulay ni Satanas.​—⁠Roma 12:21.

13. Ano ang reaksion sang mga Saksi ni Jehova sa paghingabot kag butig nga mga kampanya batok sa ila?

¹³ Amo man sa karon. Sa sini nga siglo, ang mga Saksi ni Jehova nag-antos sing daku sa kamot sang mapintas nga mga gumalahom​—⁠subong sang gintagna ni Jesus. (Mateo 24:​9, 13) Sa pila ka kadutaan, ginpalapnag ang mga kabutigan sadtong nagapilit sa mga awtoridad nga maghulag batok sa sining sinsero nga mga Cristiano. Apang, walay sapayan sinang “malain nga mga report,” paagi sa ila maayong pagginawi ginarekomendar sang mga Saksi ang ila kaugalingon subong mga ministro sang Dios. (2 Corinto 6:​4, 8) Kon posible, ginapaathag nila ang ila kaso sa mga opisyal kag sa mga hukmanan sang pungsod agod ipakita nga wala sila sing sala. Ginagamit nila ang tanan nga paagi agod pangapinan sing dayag ang maayong balita. (Filipos 1:⁠7) Nian, pagkatapos nga mahimo nila ang tanan nila nga masarangan suno sa kasuguan, ginatugyan nila ang mga butang kay Jehova. (Salmo 5:​8-12; Hulubaton 20:22) Kon kinahanglan, kaangay sang unang mga Cristiano, wala sila mahadlok mag-antos tungod sa pagkamatarong.​—⁠1 Pedro 3:​14-17; 4:​12-14, 16.

Unaha ang Kahimayaan sang Dios

14, 15. (a) Ano ang labing importante sa mga nagasakdag sa prinsipio sang teokrasya? (b) Sa anong okasyon nagpahamtang si Solomon sing huwaran sang pagkamapainubuson sa iya katungdanan sang pagdumala?

¹⁴ Sang gintudluan ni Jesus ang iya mga sumulunod sa pagpangamuyo, ang una nga butang nga iya ginsambit amo ang pagpakabalaan sa ngalan ni Jehova. (Mateo 6:9) Nahisuno sa sini, ang mga nagakabuhi sa idalom sang teokrasya nagapangita sing himaya sang Dios, indi ang ila. (Salmo 29:1, 2) Ang Biblia nagareport nga sang una nga siglo, nangin kasandaran ini sa iban nga nagdumili sa pagsunod kay Jesus bangod “ginhigugma nila ang himaya sang mga tawo,” luyag nila nga himayaon sang mga tawo. (Juan 12:42, 43) Sa pagkamatuod, ginakinahanglan ang pagpaubos agod unahon si Jehova sangsa pagpakaimportante sang isa sang iya kaugalingon.

¹⁵ Si Solomon nagpakita sing maayo nga panimuot sa sini nga bahin. Ipaanggid ang iya mga pinamulong sang tion sang pagdedikar sang mahimayaon nga templo nga iya gintukod sangsa pinamulong ni Nabocodonosor tuhoy sa iya mga tinukod. Sa sobra nga pagpabugal, si Nabocodonosor nagsiling: “Indi bala nga amo ini ang Babilonia nga Daku, nga ginpatindog ko para sa harianon nga puluy-an paagi sa kusog sang akon gahom kag para sa himaya sang akon pagkahalangdon?” (Daniel 4:30) Sa kabaliskaran, mapainubuson nga ginpakanubo ni Solomon ang iya natukod, nga nagasiling: “Matuod gid bala nga ang Dios magapuyo upod sa mga tawo sa duta? Yari karon! Ang langit, huo, bisan ang langit sang mga langit, indi makaigo sa imo; daw ano pa gid ka kubos, nian, ini nga balay nga akon ginpatindog?” (2 Cronica 6:14, 15, 18; Salmo 127:1) Wala ginbayaw ni Solomon ang iya kaugalingon. Nahibaluan niya nga isa lamang sia ka tiglawas ni Jehova kag nagsulat: “Nag-abot bala ang bugal? Nian magaabot ang kahuluy-an; apang ang kaalam kaupod sang mga mapainubuson.”—Hulubaton 11:2.

16. Paano ang mga gulang napamatud-an nga matuod nga mga pagpakamaayo paagi sa indi pagbayaw sang ila kaugalingon?

¹⁶ Ginabayaw man sang Cristianong mga gulang si Jehova, indi ang ila kaugalingon. Ginasunod nila ang laygay ni Pedro: “Kon ang bisan sin-o nagaalagad, mag-alagad sia nga nagasalig sa kusog nga ginaaman sang Dios; agod sa tanan nga butang mahimaya ang Dios paagi kay Jesucristo.” (1 Pedro 4:11) Ginlaragway ni apostol Pablo ang “palangakuan sang manugtatap,” indi subong importante nga posisyon sang kabantugan, kundi subong “maayong hilikuton.” (1 Timoteo 3:1) Ang mga gulang gintangdo agod mag-alagad, indi agod maggahom. Mga manunudlo sila kag mga manugbantay sang panong sang Dios. (Binuhatan 20:28; Santiago 3:1) Ang mapainubuson, masinakripisyuhon nga mga gulang pagpakamaayo gid sa kongregasyon. (1 Pedro 5:2, 3) “Padayon ninyo nga pakamahalon ina nga sahi sang mga tawo,” kag pasalamatan si Jehova nga nag-aman sia sing madamo gid kalipikado nga mga gulang sa pagsakdag sa teokrasya sa sining “katapusan nga mga adlaw.”—Filipos 2:29; 2 Timoteo 3:1.

“Mangin mga Manug-ilog Kamo sang Dios”

17. Sa anong mga paagi nga ginailog sadtong sakop sang teokrasya ang Dios?

¹⁷ Si apostol Pablo nagpalig-on: “Mangin mga manug-ilog kamo sang Dios, subong sang pinalangga nga mga anak.” (Efeso 5:1) Yadtong nagapasakop sa teokrasya nagatinguha nga mangin kaangay sang Dios tubtob posible para sa dihimpit nga mga tawo. Halimbawa, ang Biblia nagasiling tuhoy kay Jehova: “Ang Igang, himpit ang iya binuhatan, kay ang tanan niya nga dalanon katarungan. Isa ka Dios sang katutom, nga sa iya wala sing inhustisya; matarong kag matadlong sia.” (Deuteronomio 32:3, 4) Sa pag-ilog sa Dios sa sini nga paagi, ginapangita sang mga Cristiano ang katutom, pagkamatarong, kag ang balanse nga pagbatyag sang katarungan. (Miqueas 6:8; 1 Tesalonica 3:6; 1 Juan 3:7) Ginalikawan nila ang madamo nga butang nga nangin kalahamut-an sa kalibutan, subong sang imoralidad, paghamkon, kag kakagod. (Efeso 5:5) Bangod ginasunod sang mga alagad ni Jehova ang mga talaksan sang Dios, indi ang iya sang tawo, ang iya organisasyon teokratiko, matinlo, kag kalahamut-an.

18. Ano ang panguna nga kinaiya sang Dios, kag paano ginapabanaag sang mga Cristiano ini nga kinaiya?

¹⁸ Ang panguna nga kinaiya ni Jehova nga Dios amo ang gugma. “Ang Dios gugma,” siling ni apostol Juan. (1 Juan 4:8) Sanglit ang teokrasya nagakahulugan sing paggahom sang Dios, ang teokrasya nagakahulugan sing paggahom paagi sa gugma. Si Jesus nagsiling: “Sa sini ang tanan makahibalo nga kamo mga disipulo ko, kon maghigugmaanay kamo.” (Juan 13:35) Ang teokratikong organisasyon talalupangdon nga nagpakita sing gugma sa tion sining mabudlay nga katapusan nga mga adlaw. Sadtong tion sang pagpapas sang lahi sa Aprika, ang mga Saksi ni Jehova nagpakita sing gugma sa tanan, walay sapayan sang ila etniko nga ginhalinan. Sang tion sang inaway sa anay Yugoslavia, ang mga Saksi ni Jehova sa tanan nga duog nagbinuligay, samtang ang iban nga grupo sang relihion nakigbahin sa gintawag nga pagpapas sang rasa. Sa personal nga paagi, ginatinguhaan sang mga Saksi ni Jehova nga sundon ang laygay ni Pablo: “Ang tanan nga madinumtanon nga kapaitan kag kaakig kag kasingkal kag sininggitanay kag maparas nga hambal kuhaon gikan sa inyo upod sang tanan nga kalainan. Kundi mangin malulo sa isa kag isa, may mapinalanggaon nga pagkaawa, hilway nga nagapinatawaray sa isa kag isa subong nga ang Dios man paagi kay Cristo hilway nga nagpatawad sa inyo.”—Efeso 4:31, 32.

19. Anong mga pagkamaayo karon kag sa palaabuton para sa sadtong nagapasakop sa teokrasya?

¹⁹ Yadtong nagpasakop sa teokrasya nakatigayon sing daku nga mga pagpakamaayo. Nakatigayon sila sing paghidait upod sa Dios kag upod sa mga masigka-Cristiano. (Hebreo 12:14; Santiago 3:17) May katuyuan sila sa kabuhi. (Manugwali 12:13) May espirituwal sila nga kalig-unan kag pat-od nga paglaum para sa palaabuton. (Salmo 59:9) Sa pagkamatuod, natilawan na nila kon ano ang mangin kahimtangan kon ang tanan nga tawo mangin sakop sang teokratiko nga paggahom. Nian, ang Biblia nagasiling, “indi sila magahimo sing bisan ano nga halit ukon magatuga sing bisan ano nga kagulub-an sa bug-os ko nga bukid nga balaan; bangod ang duta pat-od gid nga matugob sang ihibalo kay Jehova subong nga ang mga tubig nagatabon sang dagat.” (Isaias 11:9) Daw ano ka mahimayaon nga tion! Kabay nga pat-uron naton tanan nga makatigayon kita sing duog sa sinang palaabuton nga Paraiso paagi sa indi pagpalayo karon sa teokrasya.

Mapaathag Mo Bala?

◻ Ano ang matuod nga teokrasya kag diin ini masapwan karon?

◻ Paano ginapasakop sang mga tawo ang ila kabuhi sa teokratiko nga paggahom?

◻ Sa anong mga paagi ang tanan nga yara sa idalom sang teokrasya nagauna sa himaya sang Dios sangsa ila kaugalingon?

◻ Ano ang pila sang diosnon nga kinaiya nga ginailog sadtong nagasakdag sa teokrasya?

[Retrato sa pahina 17]

Gin-una ni Solomon ang himaya sang Dios sangsa iya kaugalingon