Report sang mga Manugbantala sang Ginharian

Indi Magpangalag-ag sa Pagbantala sing Maayong Balita

SANG una nga pagduaw sang Europeanhon nga mga manuglagulad sa Gulpo sang Venezuela kag sa Lake Maracaibo, nagagilinutok sadto sa higad sang baybay ang magagmay naatupan kag nadingdingan sing kugon nga mga kamalig nga may mga haligi nga kahoy nga gintukod sa manabaw nga tubig. Ini nga talan-awon nagapahanumdom sang Venice, Italya, diin ang mga tawo nagatukod sang ila mga balay sa higad sang tubig. Sa amo, ginhingadlan sang nagahambal-Espanyol nga mga manuglagulad ang lugar nga Venezuela, nga nagakahulugan “Diutay nga Venice.”

Sa karon, sa sining matahom nga pungsod, ginahimo ang isa pa ka sahi sang programa sa pagtukod, isa ka espirituwal nga pagtukod. Ang mga Saksi ni Jehova didto masako nga nagasab-ug sing binhi sang Ginharian sa tagsa ka nagakaigo nga okasyon. Ang resulta nga pag-ani sa espirituwal nagadala sing daku nga kadayawan sa “Agalon sang alanyon,” si Jehova nga Dios.​—⁠Mateo 9:​37, 38.

Sang magduaw ang nagalakbay nga manugtatap sa isa ka kongregasyon sa estado sang Zulia sa aminhan-nakatundan nga Venezuela, naghimo sing kahimusan ang lokal nga mga Saksi nga duawon niya kag sang iya asawa ang malapit nga diutay nga pulo nga ginatawag Toas. Samtang nagalinya agod magsakay sa lantsa sa kaagahon padulong sa pulo, ang asawa sang nagalakbay nga manugtatap nga si Mery, nagpanugda sa iya kaupod, isa ka bug-os tion nga payunir nga utod nga babayi, nga makighambal sila sa pila ka trabahador sa lantsa. Nagpasugot ang payunir nga utod.

Ginpalapitan ni Mery ang isa ka mekaniko kag ginpakita ang libro nga Ang Ihibalo nga Nagadul-ong sa Kabuhi nga Walay Katapusan. Ginpakita ni Mery sa iya ang kapitulo nga “Pagtukod Sing Pamilya nga Nagapadungog sa Dios,” nga daw nahangpan niya. Nian ginpaathag ni Mery nga paagi sa sining publikasyon, mahimo sia makatuon sing Biblia sa iya puluy-an. Ginbaton niya ang libro kag ginhimo ang kahimusan nga duawon sia sa iya puluy-an.

Wala magdugay sang ulihi, ginhiwat ang isa ka pinasahi nga adlaw nga asambleya sa sini nga duog. Nakibot gid si Mery nga makita didto ang mekaniko, si Senor Nava, upod sa iya asawa kag duha ka bataon nga anak nga babayi! Ginpamangkot ni Mery ang asawa kon ano ang iya masiling tuhoy sa ila pangpamilya nga pagtuon sa Biblia. Makakilibot gid ang iya sabat.

“Nagapasalamat ako kay Jehova nga natun-an namon ang kamatuoran,” siling niya. Dayon nagpaathag sia. “Sang makighambal kamo sa akon bana, bag-o lang niya ako ginbiyaan bangod sa isa pa ka babayi. Palainom man sia kaayo. Kon kaisa nagaabusar sia kon mahubog, kag wala ini maluyagan sang diutay nga pumuluyo sa pulo. Nagapadugi man sia sing espiritismo. Apang, ang ihibalo sa Biblia nga natigayon niya gikan sa pagtuon nagbulig sa iya nga maghimo sing daku nga pagbag-o sa iya kabuhi. Gin-untatan niya ang tanan niya mahigko nga mga buhat. Ang iya Katoliko nga mga ginikanan nagdayaw gid sa sining mga pagbag-o. Nalipay sila nga isa na sia karon ka responsable nga bana kag amay.”

Nabawtismuhan si Senor Nava sang 1996 kag nagaalagad karon subong isa ka bug-os tion nga ministro. Ang iya asawa nga si Jenny, nabawtismuhan sang 1997. Ang alkalde sang banwa nagdayaw gid sa mga pagbag-o sining mekaniko sa lantsa amo nga nagpangabay man sia sing isa ka pagtuon sa Biblia. Nalipay gid ang mga utod nga babayi nga wala sila magpangalag-ag sa pagbantala sing maayong balita samtang nagahulat sa lantsa sadto nga aga!

[Mga retrato sa pahina 7]

Ang pagpaambit sing maayong balita sa isa ka mekaniko sang lantsa nagdala sing makalilipay nga mga resulta