Si Noe kag ang Anaw—Matuod, Indi Sugidsugid Lamang

NAGAHANDUM ka bala sing mas maayo nga kalibutan​—isa ka kalibutan nga mahidaiton ang mga pumuluyo? isa ka kalibutan nga wala sing inaway, wala sing krimen, kag wala sing pagpamigos? Kon amo, mapalig-on ka sang isa ka kasaysayan nga mahimo pamilyar sa imo. Kasaysayan ini sang matarong nga tawo nga si Noe nga nagtukod sing arka agod maluwas sia kag ang iya pamilya sang ginlaglag ang mga malauton paagi sa bug-os kalibutan nga anaw.

Isa ini sa labing bantog nga mga sugilanon. Ang rekord tuhoy sa natabo kay Noe masapwan sa Biblia sa tulun-an sang Genesis, kapitulo 6 tubtob 9, kag ginasaysay man ini sa Koran kag sa mga sugilanon sang madamo nga tawo sa bug-os nga duta. Natabo gid bala ang Anaw, ukon sugidsugid lamang ini agod palig-unon ang mga tawo nga maghimo sing matarong? Siniglo na nga ginadebatihan ini sang mga teologo kag mga sientista. Apang, ang Biblia, ang Pulong sang Dios, nagpaathag nga matuod gid ini nga hitabo, kag indi sugidsugid lamang. Binagbinaga ini:

Ginsugiran kita sang kasaysayan sang Genesis sang eksakto nga tuig, bulan, kag adlaw sang pagsugod sang Anaw, kon san-o kag kon sa diin nagtungtong ang arka, kag kon san-o naghubas ang tubig. Detalyado man ang paglaragway sa arka​—ang plano, mga takus, kag materyal nga gingamit sa pagtukod sini. Sa kabaliskaran, ang mga sugilanon kinaandan na nga indi detalyado sa ila mga paglaragway.

Duha ka listahan sang kaliwatan sa Biblia ang nagapamatuod nga si Noe matuod nga persona. (1 Cronica 1:4; Lucas 3:36) Sanday Esdras kag Lucas amo ang naglista sini nga mga kaliwatan, kag maayo sila nga mga manugpanalawsaw. Ginlista ni Lucas ang katigulangan ni Jesus tubtob kay Noe.

Ang Anaw ginpatuhuyan man nanday manalagna Isaias kag Ezequiel kag sang Cristiano nga mga apostoles nga sanday Pablo kag Pedro.​—Isaias 54:9; Ezequiel 14:14, 20; Hebreo 11:7; 1 Pedro 3:19, 20; 2 Pedro 2:5.

Ginpatuhuyan man ni Jesucristo ang Anaw sang nagsiling sia: “Subong sang nahanabo sa mga adlaw ni Noe, amo man sa mga adlaw sang Anak sang tawo: nagakaon sila, nagainom sila, ang mga lalaki nagapangasawa, ang mga babayi nagapamana, tubtob sa adlaw nga nagsulod si Noe sa arka, kag nag-abot ang anaw kag naglaglag sa ila tanan.” (Lucas 17:26, 27) Kon wala natabo ang Anaw, nian mangin walay pulos ang ginsiling ni Jesus tuhoy “sa mga adlaw sang Anak sang tawo.”

Gintagna ni apostol Pedro nga magaabot ang “mga mayubiton” nga magasikway sa ginasiling sang Biblia. “Suno sa ila luyag,” sulat ni Pedro, “wala nila matalupangdan ining katunayan, nga . . . ang kalibutan [sang tion ni Noe] nalaglag sang gin-anaw ini sang tubig.” Dapat bala naton talupangdon “ining katunayan”? Huo! Kay man, nagpadayon si Pedro: “Ang langit kag ang duta karon ginatigana sa kalayo kag ginatipigan tubtob sa adlaw sang paghukom kag sang paglaglag sa di-diosnon nga mga tawo.”​—2 Pedro 3:3-7.

Laglagon liwat sang Dios ang malauton, kag may maluwas man sa sina nga tion. Paagi sa pagsunod sa halimbawa ni Noe, malakip kita sa mga matarong nga maluwas pasulod sa mas maayo nga kalibutan.