Pamangkot Sang Bumalasa

Halin Bala sa Dios ang Tanan nga Milagruso nga Pagpang-ayo?

Wala sing duhaduha nga makasarang si Jehova nga Dios sa pagpang-ayo. Masarangan man niya hatagan sing gahom ang iya mga sumilimba. Halimbawa, sa tion sang mga apostoles, ang milagruso nga pagpang-ayo isa sa pinasahi nga regalo sang iya balaan nga espiritu. Nagsulat si apostol Pablo: “Apang ang pagpadayag sang espiritu ginhatag sa kada isa para sa mapuslanon nga katuyuan. Halimbawa, ginhatag sa isa paagi sa espiritu ang paghambal nga may kaalam, . . . sa isa pa ang mga dulot sang pagpang-ayo paagi sa sini man nga espiritu, . . . sa isa pa ang pagpanagna, . . . sa isa pa ang paghambal sing lainlain nga hambal.”—1 Corinto 12:4-11.

Pero, naghambal man si Pablo sa sini nga sulat nga untaton na sang Dios ang paghatag sing milagruso nga mga dulot sang balaan nga espiritu. Nagsiling sia: “Bisan pa may mga dulot nga pagpanagna, madula ini; bisan pa may paghambal sing lainlain nga hambal, magauntat ini; bisan pa may dulot nga ihibalo, madula ini.”—1 Corinto 13:8.

Sang unang siglo, milagruso nga nagpang-ayo si Jesucristo kag ang iya mga apostoles. Sa sina nga tion sang kasaysayan sang mga Cristiano, ang dulot sang espiritu nagalakip sang ikasarang sa pagpang-ayo, para sa kahimayaan sang Dios kag tanda ini sang kahamuot kag pagpakamaayo ni Jehova sa bag-ong Cristianong kongregasyon. Pero sa tion nga mangin malig-on na ang Cristianong kongregasyon, imbes nga gamiton ang pinasahi nga mga dulot subong ebidensia sang kahamuot sang Dios, dapat nga ipakita sang Cristianong kongregasyon ang malig-on nga pagtuo, paglaum, kag gugma. (Juan 13:35; 1 Corinto 13:13) Gani, sang mga tuig 100 C.E., wala na sila ginhatagan sang Dios sing ikasarang sa pagpang-ayo sing milagruso.a

Pero, mahimo nga matingala ka, ‘Ngaa may milagruso gihapon nga pagpang-ayo?’ Halimbawa, ang isa ka pamantalaan nagreport nga may isa ka tawo nga kanseron. May tumor sia sa ulo, sa kidney, kag sa iya mga tul-an. Daw wala na gid sia sing paglaum, tubtob nga “nasugilanon” niya ang Dios. Pagligad sang pila lang ka adlaw, naayo ang iya kanser, suno sa report.

Kon makabati ka sini, ngaa indi mo pagpamangkuton ang imo kaugalingon: ‘Matuod gid bala ini? May pamatuod gid bala ang ginsiling sini nga tawo? Kag bisan daw nag-ayo pa sia, ginatudlo bala sang Biblia nga ang Dios amo ang responsable sang tanan nga milagruso nga pagpang-ayo?’

Importante gid ang sabat sa naulihi nga pamangkot. Ginpaandaman ni Jesus ang iya mga sumulunod: “Mangin mabinantayon kamo sa butig nga mga manalagna . . . Madamo ang magasiling sa akon sa sina nga adlaw, ‘Ginuo, Ginuo, wala bala kami nagpanagna sa imo ngalan, kag nagpanabog sang mga demonyo sa imo ngalan, kag naghimo sang madamong gamhanan nga mga buhat sa imo ngalan?’ Apang isiling ko sa ila: Wala gid ako makakilala sa inyo! Palayo sa akon, kamo nga mga manugbuhat sang pagkamalinapason.”—Mateo 7:15, 21-23.

Maathag nga suno sa Biblia, mahimo nga wala naghalin sa Dios ang milagruso nga pagpang-ayo. Agod indi madayaan sang mga nagapangangkon nga nagahimo sing milagro sa ngalan sang Dios, kinahanglan nga makatigayon kita sing sibu nga ihibalo sa Dios, gamiton naton ang aton hatag-Dios nga ikasarang sa pagpangatarungan, kag kilalahon ang mga nagahimo sang iya kabubut-on.—Mateo 7:16-19; Juan 17:3; Roma 12:1, 2.

[Nota]