Indi ‘Magbalikid’

“Wala sing tawo nga nagaarado kag nagabalikid ang takus sa ginharian sang Dios.”—LUC. 9:62.

ANO ANG IMO SABAT?

Ngaa dapat naton ‘dumdumon ang asawa ni Lot’?

Anong tatlo ka butang ang indi naton dapat pirme dumdumon?

Paano kita nagadungan sa organisasyon ni Jehova?

1. Ano ang ginpaandam ni Jesus, kag ano nga pamangkot ang nag-utwas?

“DUMDUMA ninyo ang asawa ni Lot.” (Luc. 17:32) Ining paandam ni Jesus mga 2,000 ka tuig na ang nagligad importante gid subong. Pero ano ang buot silingon ni Jesus sa sining serioso nga paandam? Nahangpan na ini sang mga Judiyo nga nagapamati sa iya sadto. Nahibaluan nila ang natabo sa asawa ni Lot. Samtang nagapalagyo sa Sodoma kaupod sang iya pamilya, wala sia nagtuman sa sugo nga indi magbalikid, gani nangin haligi sia nga asin.—Basaha ang Genesis 19:17, 26.

2. Ngaa nagbalikid ang asawa ni Lot, kag ano ang resulta sini?

² Ngaa nagbalikid ang asawa ni Lot? Gusto lang bala niya makita ang nagakatabo? Ukon posible bala nga daw indi sia makapati nga malaglag ang siudad, ukon maluya bala ang iya pagtuo? Ukon indi ayhan gusto niya balikan ang iya pagkabutang sa Sodoma? (Luc. 17:31) Bisan ano man ang iya rason, napatay sia bangod sang iya pagkadimatinumanon. Hunahunaa ini! Napatay sia dungan sa mga malauton nga katawhan sang Sodoma kag Gomorra. Indi katingalahan nga si Jesus nagsiling: “Dumduma ninyo ang asawa ni Lot”!

3. Paano ginapakita ni Jesus nga indi kita dapat magbalikid sa malaragwayon nga paagi?

³ Subong, importante man nga indi kita magbalikid sa malaragwayon nga paagi. Ginpadaku ini ni Jesus sang ginsabat niya ang tawo nga namangkot kon bala puede ini makabalik sa iya pamilya agod magpaalam antes mangin disipulo niya. Si Jesus nagsiling: “Wala sing tawo nga nagaarado kag nagabalikid ang takus sa ginharian sang Dios.” (Luc. 9:62) Maparas bala ukon masakit ang sabat ni Jesus? Indi, bangod nahibaluan niya nga nagapangita lang sang balibad ang tawo para likawan ang responsibilidad bilang isa ka disipulo. Suno kay Jesus, amo sini nga sahi sang tawo ang “nagabalikid.” May kinatuhayan bala ang pagbalikid sing makadali samtang nagaarado sa pagdulog anay antes magbalikid? Bisan diin man sini, naupangan na sia, kag mahimo nga indi magtalaid ang iya agi.

4. Sa ano dapat nakasentro ang aton panulok?

⁴ Sa baylo nga dumdumon ang nagligad, dapat kita magpokus sa palaabuton. Talupangda kon paano ini ginpaathag sa Hulubaton 4:25: “Itolok ang imo mga mata sing matadlong sa unhan, kag itolok ang imo mga ilalakub sing matadlong sa una nimo.”

5. Ngaa indi kita dapat magbalikid?

⁵ May rason gid kita nga indi magbalikid. Ano ang rason? Bangod yari na kita sa “katapusan nga mga adlaw.” (2 Tim. 3:1) Nagahilapit na ang kalaglagan indi lamang sang duha ka malaut nga siudad kundi ang kalaglagan sang bug-os nga sistema sang mga butang. Ano ang makabulig sa aton agod malikawan ang natabo sa asawa ni Lot? Una, dapat mahibaluan naton kon ano ang pila ka butang nga mahimo magpabalikid sa aton. (2 Cor. 2:11) Gani binagbinagon naton ini nga mga butang kag kon paano malikawan ang pagsentro sang aton igtalupangod sa sini.

MAS MAAYO PA SADTO

6. Ngaa indi pirme masaligan ang aton memorya?

⁶ Mahimo magsayop kita sa paghunahuna nga mas maayo ang kabuhi sadto. Ang aton memorya indi pirme masaligan. Sing di-hungod, mahimo maghunahuna kita nga daw diutay lang ang problema kag daw mas malipayon ang kabuhi sadto, bisan pa nga indi ini matuod. Gani, masiling kita nga kuntani magbalik ang nagligad. Apang ginapaandaman kita sang Biblia: “Indi ka magpamangkot, ‘Ngaa mas maayo sang una sang sa subong?’ Kay indi ina husto nga pamangkot.” (Man. 7:10, Ang Pulong sang Dios) Ngaa makatalagam ini nga panghunahuna?

7-9. (a) Ano ang natabo sa mga Israelinhon sa Egipto? (b) Ngaa dapat magkalipay ang mga Israelinhon? (c) Ngaa nagreklamo kag nagkumod ang mga Israelinhon?

⁷ Dumduma ang natabo sa mga Israelinhon sang adlaw ni Moises. Sang primero, ang mga Israelinhon ginkabig nga mga bisita sa Egipto. Pero sang wala na si Jose, ‘ginbutangan sila sang mga Egiptohanon sing mga agalon sa pangabudlay sa pagsakit sa ila sa mga lulan nila.’ (Ex. 1:11) Sang ulihi, nagsugo pa gani ang Paraon nga pamatyon ang tanan nga lapsag nga lalaki sang mga Israelinhon agod indi sila magdamo. (Ex. 1:15, 16, 22) Gani, si Jehova nagsiling kay Moises: “Nakita ko ang kapipit-an sang akon katawohan nga yara sa Egipto, kag nabatian ko ang ila pagtuaw bangud sang ila mga agalon sa pangabudlay; nahibaloan ko ang ila mga kasubu.”—Ex. 3:7.

⁸ Mahanduraw mo bala ang kalipay sang mga Israelinhon sang nahilway sila sa pagkaulipon? Sa tumalagsahon nga paagi, nasaksihan nila ang gahom ni Jehova sang nagpadala sia sing Napulo ka Kalalat-an sa bugalon nga Paraon kag sa mga Egiptohanon. (Basaha ang Exodo 6:1, 6, 7.) Magluwas nga ginhilway nila ang mga Israelinhon, ginpadalidali pa nila sila kag ginpabalunan sang tuman kadamo nga bulawan kag pilak amo nga masiling nga “ginhublasan [sang katawhan sang Dios] ang mga Egiptohanon.” (Ex. 12:33-36) Labi nga nagkasadya ang mga Israelinhon sang nakita nila ang paglaglag sa Paraon kag sa iya hangaway sa Dagat nga Pula. (Ex. 14:30, 31) Dapat nga nagbakod gid ang ila pagtuo sang masaksihan nila ining tumalagsahon nga mga hitabo.

⁹ Apang daw indi mapatihan nga wala lang madugay nga ginluwas sila, nagreklamo na dayon sila kag nagkulumuron. Parte sa ano? Sa pagkaon! Indi sila kontento sa gin-aman ni Jehova kag nagreklamo: “Nadumduman namon ang isda nga ginkaon namon nga walay bayad sa Egipto, ang mga atimon, ang mga sandiya, ang mga bawang, ang mga sebuyas, kag ang ahos; apang karon ang amon kalag nagakag-as, kag wala gid sing iban nga tololokon kondi ining mana.” (Num. 11:5, 6) Huo, nangin balingag sila amo nga gusto pa nila nga magpaulipon liwat! (Num. 14:2-4) Nagbalikid ang mga Israelinhon kag nadula nila ang kahamuot ni Jehova.—Num. 11:10.

10. Ano nga leksion ang matun-an naton sa mga Israelinhon?

¹⁰ Ano nga leksion ang aton matun-an? Kon may mga kabudlayan kag mga problema, indi kita magpokus sa daw mas maayo nga mga butang sang nagligad, ayhan pati sa mga tion nga indi pa kita bawtismado. Bisan pa indi sayop ang pagpamalandong sa mga leksion nga natun-an naton sang nagligad ukon pagdumdom sang maayo nga mga inagihan, dapat huptan naton ang balanse kag realistiko nga pagtamod sa sini. Kay kon indi, magadugang ang aton kulumuron sa aton kahimtangan subong kag masulay kita nga magbalik sa aton anay pagginawi.—Basaha ang 2 Pedro 2:20-22.

MGA SAKRIPISYO NGA NAHIMO NATON SANG UNA

11. Paano gintamod sang pila ang mga sakripisyo nga ginhimo nila sang una?

¹¹ Makapasubo nga ginabalikid sang iban ang ila mga ginsakripisyo sadto kag nanugon sila sa sini. Mahimo nga may kahigayunan ka kuntani nga makakuha sang mataas nga edukasyon agod makilala kag magmanggaranon, apang wala mo ini ginpadayon. Madamo sang aton kauturan ang nagbiya sang dalagku sing sueldo nga mga obra sa patag sang negosyo, kalingawan, edukasyon, ukon isport. Nagligad ang tion kag wala pa gihapon ang katapusan. Ginahanduraw mo bala kon ano ka na kuntani subong kon wala ka magsakripisyo?

12. Ano ang pagkabig ni Pablo sa mga butang nga iya ginbiyaan?

¹² Madamo sang ginsakripisyo si apostol Pablo agod mangin sumulunod sang Cristo. (Fil. 3:4-6) Ano ang iya pagtamod sa mga butang nga ginbiyaan niya? Sia nagsiling: “Ang mga butang nga bentaha anay sa akon, ginkabig ko ini nga kadulaan tungod kay Cristo.” Ngaa? Nagpadayon sia: “Ginakabig ko gid nga kadulaan ang tanan nga butang tungod sa labaw gid nga balor sang ihibalo tuhoy kay Cristo Jesus nga akon Ginuo. Tungod sa iya ginbaton ko ang kadulaan sang tanan nga butang kag ginakabig ko ini nga mga basura, agod maagom ko si Cristo.”a (Fil. 3:7, 8) Pareho sa tawo nga wala nanugon sa basura nga iya ginhaboy, wala man ginhinulsulan ni Pablo ang tanan nga sekular nga oportunidad nga gintalikdan niya. Para sa iya wala na ini sing pulos.

13, 14. Paano naton mailog ang halimbawa nga ginpahamtang ni Pablo?

¹³ Ano ang makabulig sa aton kon nanugunan kita sang oportunidad nga ginbiyaan naton? Iluga si Pablo. Paano? Pabalori ang imo natigayon subong. May hamili ka nga kaangtanan kay Jehova kag may rekord ka sang imo katutom sa iya. (Heb. 6:10) May matanyag bala ang kalibutan nga makatupong sa espirituwal nga pagpakamaayo nga ginatigayon naton subong kag matigayon naton sa palaabuton?—Basaha ang Marcos 10:28-30.

¹⁴ Ginsambit dayon ni Pablo ang isa pa ka butang nga makabulig sa aton nga magpabilin nga matutom. Sia nagsiling nga “ginakalimtan [niya] ang mga butang sa likuran kag ginalab-ot ang mga butang sa unahan.” (Fil. 3:13) Ginpadaku ni Pablo ang duha ka tikang nga kinahanglanon. Una, dapat naton kalimtan ang mga butang nga aton ginbiyaan, nga wala nagauyang sing hamili nga kusog kag tion sa pagpanumdom sini. Ikaduha, kaangay sang manugdalagan nga nagatinguha nga malab-ot ang inangan, dapat magpadayon kita, nga nagasentro sang aton igtalupangod sa unahan.

15. Paano kita makabenepisyo kon pamalandungan naton ang halimbawa sang matutom nga mga alagad sang Dios?

¹⁵ Kon nagapamalandong kita sa halimbawa sang matutom nga mga alagad sang Dios, sadto man ukon subong, madugangan ang aton motibasyon sa pagpadayon sa baylo nga balikdon ang nagligad. Halimbawa, kon pirme ginpanumdom nanday Abraham kag Sara ang Ur, “may kahigayunan sila kuntani nga magbalik.” (Heb. 11:13-15) Apang wala sila magbalik. Mas madamo sing ginbiyaan si Moises sang magbiya sia sa Egipto sangsa bisan sin-o nga Israelinhon nga nagbiya sang ulihi. Apang, wala sing rekord nga nagapakita nga gin-ulikdan niya yadtong mga butang. Sa baylo, ang Biblia nagasugid sa aton nga “ginkabig niya ang pagpakahuya sa iya subong Isa nga Hinaplas subong daku pa nga manggad sangsa mga bahandi sang Egipto; kay gintulok niya sing maayo ang balos nga padya.”—Heb. 11:26.

NEGATIBO NGA MGA EKSPERIENSIA SANG UNA

16. Paano kita mahimo maapektuhan sang aton mga eksperiensia sang nagligad?

¹⁶ Apang indi tanan nga inagihan naton sadto maayo. Mahimo madumduman naton pirme ang nahimo naton sadto nga mga sala. (Sal. 51:3) Ukon ayhan mabatyagan naton gihapon ang kasakit ukon kasubo sang laygay sa aton. (Heb. 12:11) Ang mga inhustisya—matuod man ukon pamatyag lang naton—mahimo magbalikbalik sa aton pensar. (Sal. 55:2) Ano ang aton himuon agod mapat-od naton nga indi ini magpabalikid sa aton? Binagbinaga ang tatlo ka halimbawa.

17. (a) Ngaa nagsiling si Pablo nga sia “isa ka tawo nga kubos pa sa labing kubos sa tanan nga balaan”? (b) Ano ang nakabulig kay Pablo nga indi magluya bangod sang negatibo nga mga panghunahuna?

¹⁷ Mga sala naton sadto. Si Pablo naglaragway sang iya kaugalingon subong “isa ka tawo nga kubos pa sa labing kubos sa tanan nga balaan.” (Efe. 3:8) Ngaa amo sini ang iya ginabatyag? “Bangod ginhingabot ko ang kongregasyon sang Dios,” siling niya. (1 Cor. 15:9) Mahanduraw mo bala ang ginbatyag ni Pablo sang nagkitaay sila sang mga kauturan nga ginhingabot niya anay? Apang wala ini magpugong sa iya nga alagaron ang Dios. Gindumdom ni Pablo ang kaluoy kag kaayo sang Dios sa iya. (1 Tim. 1:12-16) Bilang resulta, ang apresasyon sa sini ni Pablo nagpahulag sa iya nga padayunon ang iya ministeryo. Ang iya mga sala sadto ginlakip niya sa mga butang nga luyag gid niya kalimtan. Kon magpokus man kita sa kaluoy ni Jehova sa aton, malikawan man naton nga magluya bangod sa aton mga sala sadto. Sa baylo, gamiton naton ang aton kusog sa pag-alagad.

18. (a) Ano ang mahimo matabo kon dumdumon naton pirme ang laygay nga nagpalain sang aton buot sadto? (b) Paano naton masunod ang laygay ni Solomon parte sa pagbaton sang laygay?

¹⁸ Masakit nga laygay. Ano abi kon ginadumdom naton pirme ang laygay nga nagpalain sang aton buot sadto? Indi lamang ini masakit kundi makapaluya sang buot. Mahimo ini bangdan nga “mapunaw” kita. (Heb. 12:5) Mahimo nga ‘pakadiutayon’ naton ang laygay bangod indi naton ini gusto, ukon ayhan ‘napunaw’ kita bangod ginbaton naton ini pero ginbalewala sang ulihi. Bisan diin man sini, wala naton gintugutan nga buligan kita sang laygay. Mas maayo nga sundon naton ang ginsiling ni Solomon: “Kapti sing malig-on ang pagtudlo, dili sia pagbuhii; bantayi sia, kay sia imo kabuhi.” (Hulu. 4:13) Pareho sa drayber nga nagasunod sang mga karatula sa dalan, dapat man naton batunon ang laygay, i-aplikar ini, kag magpadayon.—Hulu. 4:26, 27; basaha ang Hebreo 12:12, 13.

19. Paano naton mailog ang pagtuo nanday Habacuc kag Jeremias?

¹⁹ Inhustisya—matuod man ukon pamatyag lang naton. Mahimo nga kon kaisa kaangay man kita sa manalagna nga si Habacuc, nga nagpangayo sing hustisya kay Jehova. Wala niya mahangpan kon ngaa gintugutan ni Jehova nga matabo ang pila ka inhustisya. (Hab. 1:2, 3) Dapat gid naton ilugon ang iya pagtuo, sang magsiling sia: “Apang ako magakasadya sa GINOO, magakalipay ako sa Dios sang akon kaluwasan.” (Hab. 3:18) Pareho kay Jeremias sadto, kon “magalaum” kita nga may pagtuo kay Jehova nga Dios sang hustisya, makasalig kita nga tadlungon niya ang tanan sa husto nga tion.—Pan. 3:19-24.

20. Paano naton mapamatud-an nga ‘ginadumdom naton ang asawa ni Lot’?

²⁰ Nagakabuhi kita sa makahalawathawat nga tion. Ang makalilipay nga butang nagakatabo subong kag madamo pa ang magasunod. Kabay nga ang kada isa sa aton magadungan sa organisasyon ni Jehova. Sundon naton ang laygay sang Kasulatan nga magtulok sa unahan kag indi magbalikid. Sa amo mapamatud-an naton nga ‘ginadumdom naton ang asawa ni Lot’!

[Nota]