Kon Daw Indi Na Mabatas ang mga Problema
Halimbawa, si Sally,a nga taga-United States, nadulaan sang halos tanan niya nga pagkabutang bangod sa mabaskog nga bagyo. Nagsiling sia: “Pamatyag ko daw indi na ako makabatas. May mga adlaw nga daw mabuang na ako.”
Ukon ano abi kon napatay ang imo pinalangga? Si Janice, nga taga-Australia, nagsiling: “Sang napatay ang akon duha ka bata nga lalaki, kinahanglan ko gid magpanikasog nga kay-uhon ang akon kabuhi kag magbangon liwat. Nagpakitluoy ako sa Dios: ‘Palihug buligi ako, indi na gid ako makaagwanta! Tani mapatay na lang ako.’”
Sa pihak nga bahin, grabe gid nga kasakit ang nabatyagan ni Daniel sang nagluib ang iya asawa. Nagpaathag sia: “Sang gin-ako sang akon asawa nga nagluib sia, daw ginkumos ang akon dughan. Sa sulod sang mga binulan, sulitsulit ko nga nabatyagan ini nga kasakit.”
Sa sini nga isyu sang Ang Lalantawan binagbinagon naton kon ngaa may pulos gihapon ang kabuhi bisan pa
May kalamidad
Mapatyan sing pinalangga
Magluib ang bana ukon asawa
May malala nga balatian
Daw indi na mabatas ang problema
Una, paano kita makabatas kon may kalamidad?
a Gin-islan ang pila ka ngalan sa sini nga mga artikulo.