Pamangkot

◼ Paano dapat tamdon ang pag-auxiliary payunir?

Ang pag-auxiliary payunir dapat tamdon subong isa ka pribilehiyo kag isa ka serioso nga salabton. Napulo ka linibo ka manugbantala kada bulan ang ginatangdo sa pag-auxiliary payunir, kag ginahimo ini sang iban sing padayon. Ginahatagan namon sing komendasyon ining makugi nga mga manugbantala nga ang mga kahimtangan nagatugot sa ila sa paghinguyang sing ginakinahanglan nga 60 ka oras sa pag-alagad sa latagon kada bulan nga sila nagaauxiliary payunir. Ang mga gulang subong man ang iban pa dapat magpalig-on sa mga manugbantala nga nag-aplay sa pag-auxiliary payunir nga kabigon sing serioso ang pagtangdo sa ila kag likawan ang bisan anong indi bug-os tagipusuon nga panimuot.

Kaangay sang mga regular payunir, dapat anay isipon sang nagaboluntaryo sa pag-auxiliary payunir sa isa ukon kapin pa ka bulan ang bili. (Luc. 14:28) Nagalakip ini sang pagpat-od sing abanse kon bala makatarunganon sila nga ginapaabot nga makahinguyang sang ginakinahanglan nga kadamuon sang oras sa ministeryo sa latagon nga wala nagapatumbaya sang iban pa nga Cristianong mga salabton. Ang desisyon sang isa sa pagpalista subong auxiliary payunir dapat himuon pagkatapos sang mapangamuyuon nga pagbinagbinag sang iya personal nga mga kahimtangan. Indi ini dapat ginapahulag sang mga emosyon nga napukaw bangod ang iban nagaaplay. Dapat nga isa ini ka nabinagbinag sing maayo nga desisyon, ginaupdan sang paghimo sing isa ka nasulat nga iskedyul para sa paglab-ot sa mga lalab-uton. Importante nga basahon sing maayo ang aplikasyon kag mamat-od sa tagipusuon mismo nga makasiling sia sing tampad sing huo sa ginakinahanglan.

Sa pagkamatuod, nadalahig ang ekstra nga panikasog. May binulan sa sulod sang tuig nga “magmasako sing daku” sa pagbantala sing maayong balita. (Binu. 18:5) Nagalakip ini sang panag-on sang Memoryal sa Marso, Abril, kag Mayo kag sa mga binulan nga ang manugtatap sa sirkito nagaduaw sa kongregasyon. Madamong manugbantala ang malipayon nga nagadisiplina sang ila kaugalingon sa pagsunod sa daw estrikto nga iskedyul agod makapakigbahin sing dugang sa pagbantala nga hilikuton sa sining mga panag-on sang pinasahi nga hilikuton, nagaapresyar nga ang bugana nga mga pagpakamaayo masunson nga nagaresulta. (2 Cor. 9:6) Madamong manugbantala ang nagahimo sing pinasahi nga panikasog sa pagpayunir sa mga binulan sang bakasyon kag sa bisan anong bulan sang tuig nga may lima ka talipuspusan sang semana. Apang kon nagaaplay, ginaapresyar nila ang kinahanglanon nga sundon ang prinsipio nga ‘Ang imo Huo Huo’ paagi sa paghimo sang ila bug-os nga masarangan sa pagreport sing 60 ukon kapin pa nga oras kada bulan nga nagaauxiliary payunir sila.​—Mat. 5:37.

Ang mga manugbantala nga indi makapayunir sarang makabulig paagi sa pagpangabudlay upod sa mga auxiliary payunir, nagahimos sing pat-od nga mga iskedyul upod sa ila. Mas maayo nga mag-upod sing mas madugay sa pag-alagad sa mga payunir kon mahimo pa. Labi na nga ginaapresyar sang mga payunir ang supurta sang iban pa nga mga manugbantala sa kaagahon, sa kahapunanon, ukon sa kasisidmon. Ang mga auxiliary payunir nalipay agdahon nga updan ang iban sa mga pagduaw liwat kag pagsugod sing mga pagtuon sa Biblia sa puluy-an. Busa ang nagasakdag sa mga auxiliary payunir mahimo nga magaani sing mas daku nga kalipay nga nagahalin sa paghatag.​—Binu. 20:35.

Ang kakugi sang madamong auxiliary payunir ginapasalamatan sing daku. Yadtong makabuylog sa ila makapaabot sing buganang mga pagpakamaayo. (Hulu. 10:4) San-o ka masunod nga makig-ambit sa mga kalipay sang dugang nga hilikuton subong auxiliary payunir?