Ginabasa Mo Bala ang mga Magasin?

¹Amo sini ang masiling sang isa ka misyonero nga mag-asawa sa Aprika tuhoy sa aton mga magasin: “Ang Lalantawan nagabulig sa amon nga magpabilin nga nagabugtaw sa espirituwal sa amon teritoryo. Nagakuha kami sing pagpalig-on kag kusog sa kada guwa.” Amo man bala sini ka tudok ang imo apresasyon sa aton mga balasahon? Kag nalangkag ka bala nga basahon ini?

² Madamo nga tion ang ginakinahanglan sa paghanda sing mga artikulo sang magasin nga sarang mabasa sa sulod sang pila lang ka minuto. Nakahibalo sini, basahon mo lang bala sing pahapyaw ang mga artikulo, tan-awon ang mga laragway, ukon kon kaisa basahon lang ang artikulo nga nakaganyat sang imo igtalupangod? Maalamon kita kon labi pa sa sina ang himuon naton. Dapat kita maghinguyang sing tion nga basahon kag tun-an ang tanan nga artikulo sa kada guwa sang aton mga magasin. Ang Lalantawan amo ang aton panguna nga balasahon para sa suno-sa-tion nga espirituwal nga pagkaon. Ang Magmata! may makawiwili kag impormatibo nga mga artikulo tuhoy sa lainlain nga topiko. Ang matun-an naton paagi sa pagbasa sini nga mga magasin wala lamang nagapabakod sa aton sa espirituwal kundi nagahanda man sa aton para sa mas epektibo nga pagpakigbahin sa ministeryo. Bangod kita mismo maukod nga mga bumalasa, mapagsik naton nga matanyag sa iban ang mga magasin.

³ Kon Paano Pauswagon ang mga Batasan sa Pagbasa: Mapauswag pa bala nimo ang imo padayon nga pagbasa sang mga magasin? Yari ang duha ka panugda nga nakabulig sa madamo. (1) Maghimo sing regular nga iskedyul sa pagbasa. Paagi lamang sa pagtalana sing 10 ukon 15 ka minuto kada adlaw sa pagbasa, makibot ka sa kon daw ano kadamo ang imo mabasa sa isa ka semana. (2) Maghimo sing sistema agod madumduman ang imo na nabasa. Ayhan mabutangan mo sing tanda ang umpisa sang kada artikulo nga nabasa mo. Kon wala ini, mahimo nga indi mo mabasa ang pila ka artikulo ukon ang bug-os pa gani nga magasin. Importante nga maghimo sing regular nga iskedyul sa pagbasa nga epektibo para sa imo kag himua ini pirme.​—⁠Ipaanggid ang Filipos 3:⁠16.

⁴ “Ang matutom kag mainandamon nga ulipon” maalamon nga naghulag sa nagabalhin nga mga tion paagi sa pagbalhag sing mga artikulo nga nagabinagbinag sa adlaw-adlaw nga kinahanglanon sang mga tawo. (Mat. 24:45) Sa pagkamatuod, ginatandog sang mga magasin ang aton kabuhi. Ang kadasigon sang aton espirituwal nga pag-uswag, sa daku nga kasangkaron, nasandig sa kalidad sang aton teokratiko nga batasan sa pagbasa. Daku gid nga kabulahanan sa espirituwal ang natigana para sa mga nagahinguyang sing tion nga mabasa ang tanan nga magasin.