Mahimo Mo Bala Ini?
1 ‘Ang ano?’ ipamangkot mo. Ang Hulubaton 3:27 nagasabat: “Dili pagpunggi ang maayo gikan sa ila sa diin naigo ini, kon ini yara sa gahom sang imo kamot sa paghimo sini.” “Yara [bala] sa gahom sang imo kamot” nga pasangkaron ang imo hilikuton kag mag-auxiliary ukon magregular payunir? Mahimo mo bala ina?
2 Daw ano ka makapalig-on ang makabasa sa 1993 Yearbook nga may promedyo nga 22,205 ka payunir sa Pilipinas, may ratio nga 1 ka payunir sa 5 ka manugbantala. Huo, 3,697 ang nagpayunir sang nagligad nga tuig. Katumbas ini sa kapin sa 10 ka manugbantala kada adlaw nga nag-usisa sang ila mga kahimtangan kag nakatukib nga may labi pa sila nga mahimo sa ministeryo.
3 Ang pag-auxiliary payunir isa ka paagi sa paghimo sing maayo sa iban. Sang nagligad nga tuig may kataason nga 17,009 ang nag-auxiliary payunir. Maayo ina. Madamong manugbantala ang nagapangita sing mga paagi nga makaauxiliary payunir sing mas masunson sa bug-os nga tuig.
4 Agod mapat-od kon bala ‘mahimo [mo] ini’ ukon indi, kinahanglan anay nga binagbinagon mo ang imo tinagipusuon nga handum. (Mat. 22:37-39) Ang Binuhatan 20:35 nagasiling: “Daku pa ang kalipay sa paghatag sangsa pagbaton.” Sa walay duhaduha, yadtong nagahatag sing espirituwal nga bulig sing maalwan halin sa tagipusuon may nagakaigo nga handum. Agod mangin madinalag-on nga manugbantala ukon payunir, ina nga handum kinahanglanon.
5 Ikaduha, binagbinaga ang imo karon mga kahimtangan. Mapasibu mo bala ang imo adlaw-adlaw nga hilikuton agod makaalagad sing bug-os tion? Indi tanan makahimo sini. Apang pagkatapos sang mapangamuyuon nga pag-usisa, kada tuig linibo ang nakakita sing paagi “sa paghimo sini.” (Col. 4:5) Halimbawa, ang iban nga mga pamilya nagapili sing partikular nga mga binulan para ang iban ukon ang tanan nga katapo sang pamilya makaauxiliary payunir. Ang iban nga mga pamilya nagasakdag sa isa sang ila mga katapo sa pagregular payunir. Nabinagbinag na bala sang imo pamilya ini nga mga posibilidad?—Tan-awa ang Hulubaton 11:25.
6 Ang pagbulig sa iban nga mahibaluan ang kamatuoran nagadala sing matuod nga kaayawan, nagaalagad man ikaw subong manugbantala ukon subong payunir. Nahibaluan naton nga ang matuod nga kalipay matigayon gikan sa paghimo sing maayo sa iban, ilabi na kon ini “yara sa gahom sang imo kamot sa paghimo sini.”