Pamangkot

◼ Ano ang himuon kon magainsister ang tagbalay nga indi na magduaw ang mga Saksi ni Jehova sa sina nga puluy-an?

Kon ang karatula sa ganhaan espesipiko nga nagadumili sa mga Saksi ni Jehova, dapat naton tahuron ang ila mga luyag kag maglikaw sa pagpanuktok.

Kon kaisa ayhan makita naton ang karatula nga nagadumili sa mga ahente ukon sa mga nagapangayo-bulig. Sanglit nagahimo kita sing relihiosong buhat sa kaluoy, wala gid ina naaplikar sa aton. Nagakaigo ang magpadayon kag manuktok sa sina nga mga ganhaan. Kon mamatok ang tagbalay, mapaathag naton sing mataktikanhon kon ngaa nagapati kita nga ina nga mga karatula wala naaplikar sa aton bahin. Kon athagon nian sang tagbalay nga ang pagdumili nagalakip sa mga Saksi ni Jehova, tahuron naton ang iya mga luyag.

Kon nagabantala sa teritoryo, ang isa ka tagbalay mahimo nga maakig kag magainsister nga indi na kita liwat magduaw. Kon magdumili sia sa pagpaathag sini, dapat naton sundon ini nga pangabay. Mahimo isulod ang isa ka napetsahan nga nota sa sobre sang teritoryo agod malikawan sang mga manugbantala nga magabantala sa ulihi sa teritoryo ang pagduaw sa sina nga balay.

Apang, dapat naton dumdumon nga ina nga mga puluy-an indi dapat likawan tubtob san-o. Ang karon nga nagapuyo mahimo nga magsaylo. Mahimo nga masugilanon naton ang iban nga katapo sang pamilya nga magapamati. Posible man nga ang tagbalay nga nasugilanon naton magbag-o kag handa na nga magpaduaw liwat sa aton. Gani pagligad sang pila ka tion dapat naton pamangkuton ang mga nagapuyo agod mahibaluan ang ila karon nga mga balatyagon.

Ang file sang teritoryo dapat repasuhon sing makaisa sa isa ka tuig, nagalista sang mga puluy-an nga wala ginapaduaw sa aton. Sa idalom sang panuytoy sang manugtatap sa pag-alagad, ang pila ka eksperiensiado nga mga manugbantala mahimo itangdo sa pagduaw sa sining mga puluy-an. Mahimo sila magsiling nga nagaduaw kita agod hibaluon kon amo gihapon nga tagbalay ang nagapuyo didto. Kon makatarunganon ang sabat, ang palaabuton nga mga pagduaw sarang mahimo sa kinaandan nga paagi. Kon ang tagbalay padayon nga mangin dimasinapakon, wala sing dugang pa nga mga pagduaw ang dapat himuon tubtob sa masunod nga tuig.