Pagpauswag sang Aton mga Ikasarang sa Ministeryo—Pagsabat sa Posible nga mga Pagpamatok sa Paghambalanay

Kon Ngaa Importante: Ibutang ta nga nabalitaan mo nga may manug-abot nga kalamidad. Mapatay ang mga tawo kon indi sila makakadto sa lugar nga luwas sa katalagman. Ginkadtuan mo ang imo kaingod para paandaman sia, pero gulpi lang sia nagsaligbat nga masako sia. Mangampo ka bala dayon sa pagbulig sa iya? Madamo sa aton teritoryo ang wala nagasapak sa aton. Wala nila maintiendihan nga ang aton mensahe magaluwas sang ila kabuhi. Sa aton pagduaw, mahimo madamo sila sing ginahimo. (Mat. 24:37-39) Ukon ayhan may nabatian sila nga indi matuod parte sa aton. (Mat. 11:18, 19) Mahimo nagahunahuna sila nga pareho man kita sa iban nga relihion nga nagapatubas sing malain nga bunga. (2 Ped. 2:1, 2) Kon ang tagbalay indi interesado sa umpisa, dapat indi kita dayon mangampo.

Kon Paano Ini Himuon:

Antes magpamalaybalay, hunahunaa sing makadali ang posible nga mga pagpamatok sa paghambalanay nga mahimo mo maatubang kag kon paano mo ini sabton.
Kon mamatok ang tagbalay, mainayuhon nga padayuna ang paghambalanay. Mahimo mo sia hatagan sing komendasyon. Halimbawa, kon magsiling sia nga may kaugalingon na sia nga relihion, mahimo kita magsabat, “Nalipay gid ako nga makaistorya sing kaangay mo nga interesado sa espirituwal nga mga butang.” Kon kaisa, makabulig man kon ugyunan naton ang iya ginabatyag. Halimbawa, kon magsiling sia nga masako sia, mahimo kita magsabat, “Naintiendihan ko ikaw. Pero antes ako maghalin, luyag ko ini ihatag sa imo.” Kon ang tagbalay naman magsiling nga indi sia interesado, mahimo kita magpautwas sing pamangkot, “Diin ka indi interesado, sa Biblia ukon sa relihion?”
Mangin mahinantupon. Dumduma nga wala ginapilit ni Jehova ang mga tawo nga mamati. (Deut. 30:19) Ang kada isa magadala sang iya kaugalingon nga lulan sa espirituwal. (Gal. 6:5) Kon ang tagbalay matig-a nga nagapamatok, mas maayo nga maghalin na lang kita. Kon ginarespeto naton ang iya balatyagon, posible nga mamati sia sa iban nga manugbantala sa ulihi.—1 Ped. 3:15.

Tilawi Ini sa Sini nga Bulan:

Kon makaatubang ka sing pagpamatok sa paghambalanay, pagbiya ninyo sa tagbalay, istoryahi ninyo sang imo kaupod kon ano ang mas maayo nga paagi sa pagsabat sini.