Buligi ang Tagbalay nga Mangatarungan
1. Ano ang pinakaepektibo nga paagi sa pagbantala?
1 Ano bala ang mas epektibo nga paagi sa pagbantala—dogmatiko ukon ang pagbulig sa tagbalay nga mangatarungan kag makadangat sa husto nga paghangop? Bangod sa pagpangatarungan ni apostol Pablo sa mga Judiyo sa Tesalonica, “ang pila sa ila nangin mga tumuluo.” (Binu. 17:2-4) Ano ang nadalahig sa pagpangatarungan sa iban?
2. Paano naton mailog ang halimbawa ni Pablo sa pagbantala sang maayong balita?
2 Binagbinaga ang Ila Balatyagon kag Ginhalinan: Kon nahibaluan naton ang mga ginapatihan kag ginabatyag sang mga tawo sa aton teritoryo, makabulig ini sa aton sa pagpangatarungan sa ila. Ginsugdan ni Pablo ang iya pamulongpulong sa di-tumuluo nga mga Griego sa Areopago paagi sa pagsambit sa mga butang nga mahimo nahibaluan na nila kag ginabaton. (Binu. 17:22-31) Gani kon nagahanda ka sang imo presentasyon, binagbinaga ang mga ginapatihan kag wala ginabaton sang mga tawo sa inyo teritoryo. (1 Cor. 9:19-22) Kon ang tagbalay magpautwas sing sayop nga pagpati, mangita sing topiko nga iya ginaugyunan kag amo ini ang inyo hambalan.
3. Paano kita makapangatarungan sing mas epektibo sa iban paagi sa paggamit sing mga pamangkot?
3 Gamita sing Maayo ang mga Pamangkot: Indi naton mahatagan sing husto nga direksion ang isa ka manuglakbay kon wala naton nahibaluan ang iya lokasyon. Sing kaanggid, indi naton mabuligan ang tagbalay nga makadangat sa husto nga paghangop kon wala naton nahibaluan ang iya mga ginapatihan. Antes mangatarungan, masami nga nagapamangkot si Jesus sa iya mga tagpalamati agod mahibaluan ang ila ginahunahuna. Halimbawa, sang may namangkot sa iya, “Ano ang dapat ko himuon agod mapanubli ang kabuhi nga walay katapusan?,” namangkot anay si Jesus kon ano ang pagtamod sang tawo antes sia nagsabat. (Luc. 10:25-28) Isa pa gid ka bes, sang sala ang sabat ni Pedro, naggamit si Jesus sing pamangkot agod tadlungon ang iya panghunahuna. (Mat. 17:24-26) Gani kon ang tagbalay mamangkot ukon magpautwas sing sayop nga pagpati, mahimo kita maggamit sing mga pamangkot agod buligan sia nga mangatarungan.
4. Ngaa dapat naton buligan ang tagbalay nga mangatarungan?
4 Kon buligan naton ang tagbalay sa pagpangatarungan, ginailog naton ang Daku nga Manunudlo nga si Jesus, pati na ang epektibo nga mga ebanghelisador sang unang siglo. Ginapakita man naton nga ginapadunggan naton ang tagbalay kag ginarespeto. (1 Ped. 3:15) Subong resulta, mahimo sia magpasugot nga duawon liwat.