Palambua ang Interes sa Mabuhi sing Dayon nga Libro
1 Kon nagaduaw kita sa ila mga puluy-an, masami naton masapwan ang mga tawo nga masako sa “mga paghimud-os sining sistema sang mga butang.” (Mar. 4:19) Sa primero, ang kalabanan nga mga tawo indi gid interesado sa aton mensahe. Kon makasiling kita sing pila ka butang nga magatandog sang ila kabuhi, mahimo nga mapukaw naton ang ila interes sa mensahe sang Ginharian. Ang sekreto agod makasugod sing mga paghambalanay amo ang pagpili sing makagalanyat nga mga punto gikan sa Mabuhi sing Dayon nga libro. Ano ang mahimo nga isiling mo?
2 Mahimo mo magamit ini nga pagpalapit:
◼ “Kon may yara ikaw sing gahom, ano nga palaligban sa aton adlaw ang imo pagalubaron? [Pasabta sia.] Tubtob sa karon, ang mga lider sang kalibutan wala gid magmadinalag-on sa pagpangita sing mga solusyon sa mga palaligban sa sining mga adlaw. Apang may yara Isa nga magatapos sa tanan nga problema nga nagapaantos sa katawhan. Talupangda ang ginasiling sa Salmo 145:16. [Basaha ang kasulatan, kag patuhuyi ang mga ilustrasyon sa mga pahina 11-13.] Ang parapo 14 sa pahina 14 nagapautwas sing pamangkot nga bag-o lang naton mahambalan kag nagapamangkot: ‘Apang san-o ini mahanabo?’ ” Ipaathag nga pagasabton sang libro ina nga pamangkot, kag dayon itanyag ang libro.
3 Ukon masiling mo ang kaangay sini:
◼ “Ayhan nahangpan mo ang pagbatyag sing pagkanadulaan bangod sang kamatayon sang isa nga hinigugma. Pat-od nga masubuan ka kag magbatyag nga wala sing mahimo. Mahimo nga ginabinagbinag mo ini nga mga pamangkot: [Basaha ang mga pamangkot sa parapo 1 sa pahina 76.] Indi bala nga makalilipay nga matigayon ang mga sabat sa sining mga pamangkot? Ang Biblia nagaaman sing pat-od nga paglaum sa mga napatay. [Basaha ang Juan 5:28, 29.] Ini nga libro nagabulig sa aton nga mahangpan ang kahimtangan sang mga patay kag kon ano ang ila palaabuton nga paglaum.” Itanyag ang libro.
4 Walay duhaduha nga makasumalang ka sing mga kahigayunan nga makapanaksi sing dipormal. Kon amo, mahimo mo isiling ang subong sini:
◼ “Ang kalibutan puno sing mga problema karon, kag walay duhaduha nga may yara ka man kaugalingon nga mga problema. Masubo hambalon, nga ang mga inosente daw amo ang labi nga nagaantos. Nagapati ka bala nga dulaon sang Dios ang pag-antos? [Pasabta sia.] Talupangda kon ano ang ginasaad sang Dios nga himuon para sa mga nagaalagad sa iya. [Basaha ang Salmo 37:40 kag dayon buksi ang Mabuhi sing Dayon nga libro sa pahina 99.] Ginapaathag sini nga libro kon ngaa ginatugutan sang Dios ang kalautan kag kon paano niya pagadulaon ini.”
5 Kon isa ikaw ka bataon nga manugbantala, sarang mo magamit ang presentasyon nga napasad sa mga ilustrasyon sa pahina 156-8. Mahimo ka makasugod paagi sa pagpamangkot:
◼ “Luyag mo bala magpuyo sa kalibutan nga kaangay sini? [Pasabta sia.] Ang tagsa sining matahom nga mga laragway ginpasad sa isa ka saad nga ginsambit sa Pulong sang Dios, ang Biblia. [Patuhuyi ang mga reperensia nga Kasulatan.] Ini nga libro makabulig sa imo nga matun-an sing dugang pa ang tuhoy sa saad sang Dios nga himuon ang bug-os nga duta nga isa ka paraiso. Nagaunod ini sing nagaluwas-kabuhi nga impormasyon kag takus gid sang tion nga mahinguyang sa pagbasa sini.”—Juan 17:3.
6 Gamiton naton tanan ang Mabuhi sing Dayon nga libro sa Septiembre agod palambuon ang interes sa maayong balita sang Ginharian.