Pagpanginpulos Gikan sa Teokratikong Eskwelahan sa Pagministro Para sa 1996—Bahin 2
1 Wala madugay nga ginsugdan ang Teokratikong Eskwelahan sa Pagministro sang 1943, ang isa sang mga sanga sang Sosiedad nagreport: “Ining tuman kaayo nga kahimusan nagmadinalag-on sa malip-ot nga tion sa pagbulig sa madamong kauturan nga naghunahuna nga indi gid sila mahimo mangin mga humalambal sa publiko nga mangin sangkol kaayo sa plataporma kag mas epektibo sa latagon.” Ang eskwelahan padayon nga nagahatag sing labing maayo nga paghanas, nga ginakinahanglan naton tanan.
2 Pagbasa sa Biblia: Indi lamang yadtong ginahatagan sing bahin ang makabenepisyo sa eskwelahan. Ang matuod, kita tanan may asaynment—ang semanal nga pagbasa sa Biblia. Ang madamong Kasulatan nagapahanumdom sa aton nga basahon ang Biblia adlaw-adlaw. (Jos. 1:8; Sal. 1:2; Binu. 17:11) Ang pagbasa sang Biblia kinahanglanon sa maayong espirituwal nga kapagros; ginapatubo sini ang hunahuna kag tagipusuon. Kon basahon naton ang Biblia sa dimagkubos lima ka minuto sa isa ka adlaw, masundan naton ang iskedyul sa pagbasa sa Biblia sang eskwelahan. Pagkatapos sang tuig, kapin sa 150 ka kapitulo sang Pulong sang Dios ang mabasa naton.
3 Pamulongpulong sa Pagtudlo: Ang humalambal nga nagahatag sing pamulongpulong sa pagtudlo dapat maggamit sing maayong metodo sa pagtudlo agod mapalig-on ang apresasyon kay Jehova, sa iya Pulong, kag sa iya organisasyon. Ang mga gulang kag mga ministeryal nga alagad dapat maghanda sing maayo, magpadaku sang tema, kag maghimo nga buhi sang materyal. (Heb. 4:12) Importante nga ang humalambal magpabilin sa iya gintalana nga tion. Ang “All Scripture” nga libro nagahatag sing madamong makalilipay Makasulatanhon nga materyal nga makabulig sa aton sa espirituwal. Ang Proclaimers nga libro nagaunod sing modernong-adlaw nga maragtas sang kitaon nga organisasyon ni Jehova kag nagasaysay sang mga hitabo sa kabuhi sang matuod nga mga tawo nga nagpakita sing pagtuo, kakugi, debosyon, kag gugma.
4 Bible Highlights: Ang mga utod nga ginahatagan sini nga asaynment dapat magpili sing espesipiko nga mga bersikulo nga sarang maaplikar sa praktikal nga paagi. Nagakinahanglan ini sang pagbasa sa mga kapitulo nga gintangdo kag sang pagpanalawsaw agod makita ang kahulugan sang pila ka bersikulo. Sa likod sang Watch Tower Publications Index, yara ang “Scripture Index,” nga makabulig sa pagpangita sing impormasyon nahanungod sa espesipiko nga mga bersikulo sa Biblia. Ang mga utod nga nagauyat sini nga bahin dapat maggamit sing paghantop kag likawan ang pagdugang sing dikinahanglanon nga materyal. Indi sila dapat maghanda sing mas madamo nga materyal sangsa matuptupan nila sing makatarunganon sa anom ka minuto.
5 Kita tanan makapanginpulos gikan sa Teokratikong Eskwelahan sa Pagministro. Ang paghimulos sing bug-os sa sining aman magabulig gid sa aton agod ang aton ‘pag-uswag mapadayag sa tanan nga tawo.’—1 Tim. 4:15.