Ang Pulong sang Ginharian—Pagkuha sang Kahulugan Sini
1 Sa iya ilustrasyon nahanungod sa manugsab-ug, si Jesus nagsiling nga ang binhi nga nahulog sa “maayo nga duta” naglarawan sa “isa nga nagapamati sa pulong kag ginakuha ang kahulugan sini.” (Mat. 13:23) Sa tapos mabatian ang nahanungod sa Ginharian, nakuha bala naton ang “kahulugan sini”? Gin-una bala naton ang mga interes sang Ginharian, busa ginapakita nga nakuha naton ang kahulugan sang mensahe?
2 Ang husto nga paghangop sa mensahe sang Ginharian nagakinahanglan sing personal nga pagtuon. Dapat kita maghinguyang sing tion agod mapamalandungan ang espirituwal nga pagkaon nga gin-aman. Ang padalidali nga pagbasa sang Ang Lalantawan kaangay sang madasig nga pagtulon sing isa ka manamit kag masustansia nga kalan-on. Agod matigayon ang labing daku nga kapuslanan, may yara dapat pangpapagsik kag maayo nga gana sa espirituwal. Kon wala ang mga ini, mahimo padiutayon sang iban nga mga hilikuton ang mga kapuslanan sang personal nga pagtuon ukon ubuson ang tion nga ginakinahanglan naton para sa sini. Ang pagsunod sa maayo nga iskedyul sa pagtuon indi mahapos, apang ang espirituwal nga mga manggad nga matigayon hamili.—Hulu. 3:13-18; Col. 1:27.
3 Ang Pag-usisa sa Kasulatan nagabulig sa aton kada adlaw nga mahuptan ang positibo kag makapalig-on nga mga panghunahuna nahanungod sa Ginharian. Yadtong “mga mahunahunaon sa ila espirituwal nga kinahanglanon” nagaplano sa paghinguyang sing pila ka minuto kada adlaw agod mabasa ang teksto kag mga komento. (Mat. 5:3) Ginapaathag sang madamong teksto ang lainlain nga mga bahin sang Ginharian. Halimbawa, sadtong Nobiembre 22, 1994, ang teksto nga gingamit amo ang Mateo 13:4. Ginbinagbinag sang komento ang paglaum sa Ginharian kag ginpahanumdom kita nahanungod sa mga katalagman sang di-maayo nga pagpakig-upod sa mga himata kag mga kaingod. Ang katunayan nga sa mga puluy-an Bethel sa palibot sang kalibutan, may yara 15-minutos nga paghinun-anon sa adlaw-adlaw nga teksto sa tagsa ka adlaw sang pagtrabaho nagapadaku sang mga kapuslanan kag sang pagkaimportante sang pagbinagbinag sing tingob sang teksto kada adlaw. Ginalakip bala sang imo pamilya ang kaanggid nga pagbinagbinag sa inyo adlaw-adlaw nga rutina?
4 Samtang nagatubo ang imo apresasyon sa Ginharian, may daku pa nga pangpapagsik agod ipaambit ang mensahe sang Ginharian sa iban. Ang Lalantawan kag ang Magmata! nagabulig sa aton nga mangin alisto gid kon daw ano ka daku ang pagkinahanglan sang kalibutan sa Ginharian sang Dios. Nagabulig ini sa aton nga mangin espirituwal nga mga tawo, nga “may painoino ni Cristo.” (1 Cor. 2:15, 16) Ini tanan makadugang sa aton kakugi nga ipaambit ang paglaum sang Ginharian sa iban.—1 Ped. 3:15.
5 Importante nga makuha naton sing personal ang kahulugan sang mensahe sang Ginharian. Ang Ginharian amo ang panguna nga tema sang Biblia. Amo ini ang paagi nga pagagamiton sang Dios sa pagdula sang kalautan kag sa pagpaluntad sang bag-ong kalibutan. Si Jesus nagsugo sa aton nga unahon ini sa aton kabuhi. (Mat. 6:10, 33) Himusli sing bug-os ang imo kahigayunan nga maagom ang mga pagpakamaayo sini.