Pamangkot

◼ Ano ang dapat naton dalhon sa mga miting?

Kada semana nagabaton kita sing mapuslanon nga panudlo kag pagpalig-on sa mga miting sang kongregasyon. (Isa. 48:17; Heb. 10:​24, 25) Apang, nasandig sa kon daw ano kaayo naton ginahandaan ang mga miting ang kadakuon sang mabenepisyo naton.

Labing maayo nga ang tagsa ka katapo sang pamilya may kaugalingon nga personal nga mga kagamitan para sa mga miting. Nagalakip ini sa Biblia, songbook, (mga) publikasyon nga ginatun-an, kuwaderno, kag pluma ukon lapis.

Para sa Teokratikong Eskwelahan sa Pagministro, ang Iskedyul sang Eskwelahan kag School Guidebook kinahanglanon. Nagapahinumdom ini sa aton sang tema nga ginahatag sang estudyante kag masundan naton ang manugtatap sang eskwelahan kon nagalaygay sia. Sarang naton maaplikar ,sing personal ang laygay kag mga panugda agod mapauswag naton ang aton kaugalingon nga mga pamulongpulong kag mga presentasyon sa pag-alagad sa latagon. Sugod sang Enero, ang kalabanan sang mga pamulongpulong sa pagpanudlo ginapasad sa Jehovah’s Witnesses—Proclaimers of God’s Kingdom. Ayhan indi praktikal nga dalhon sang tagsa ka katapo sang pamilya ang iya kaugalingon nga kopya; ayhan isa ka tomo lamang ang mahimo dalhon para sa bilog nga pamilya.

Para sa Miting sa Serbisyo, kinahanglan nga dalhon naton ang pinakabag-o nga Ang Aton Ministeryo sa Ginharian kag ang Reasoning nga libro. Dalha ang mga publikasyon nga ginhinambitan sa miting, subong sang mga literatura nga pagagamiton sa mga presentasyon nga igapasundayag. Ang mga gulang dapat magdala sing isa ka kopya sang Organisado sa Pagtuman sang Aton Ministeryo.

Dapat panikasugan sang mga ginikanan nga palingkuron sing mahipos kag papamation sing maayo ang ila kabataan sa mga miting sang kongregasyon. Ang pag-aman sa ila sing personal nga mga kopya sang Ang Lalantawan kag sang iban pa nga mga publikasyon, bisan antes pa sila makahibalo magbasa, nagapalig-on sa ila nga mangin interesado, kag ayhan nagabulig sa pagdihon sing bug-os kabuhi, maayong espirituwal nga mga batasan.

Ang kalipay kag kaayawan nga matigayon naton gikan sa mga miting sang kongregasyon mapasangkad sing daku kon masangkapan kita sing bug-os.—2 Tim. 3:17.