Ngaa Maghupot sing Rekord sang mga Wala-sa-Balay?
1 Isa ka Saksi nga mag-asawa ang nagguwa sa latagon sang maaga nga bahin sang adlaw. Sang ulihi sina man nga adlaw, ginbalikan nila ang mga wala-sa-balay sa sina nga teritoryo. Ginpasulod sila sang isa ka tawo kag namati sia sing maayo. Nagkuha sia sing Mabuhi sing Dayon nga libro kag namangkot kon magabalik ang mga Saksi. Wala pa gid sia anay makapakigsugilanon sa mga Saksi ni Jehova kag may madamong pamangkot sia nga luyag niya masabat; nasugdan ang isa ka pagtuon sa Biblia. Nalipay gid ining mag-asawa nga masapwan inang katulad-karnero nga indibiduwal. Luyag mo man bala maeksperiensiahan ang subong sina? Ang paghupot sing maayo nga rekord sang mga wala-sa-balay kag ang pagbalik dayon magapaposible nga mahimo nimo ini.
2 Pirme na kita ginlaygayan nga maghupot sing husto nga rekord sang mga wala-sa-balay kag magduaw liwat dayon. Subong sang ginapakita sang eksperiensia sa ibabaw, ang isa pa ka pagduaw sa sina man nga adlaw mahimo nga may labing maayo nga mga resulta. Bisan pa nga luyag gid naton matuptupan ang gintangdo nga teritoryo, ayhan indi kita makugi sa paghupot sing rekord sadtong mga wala-sa-balay. Ang iban nagasiling: ‘Ginapangabudlayan namon ang amon teritoryo kada duha ukon tatlo ka semana; indi na kinahanglan nga maghupot sing amo sina nga rekord bangod sa dili madugay magabalik man kami.’ Apang nagahatag ina sa aton sing dugang pa nga rason nga maghupot, sing rekord. Kon ang teritoryo masunson nga ginatuptupan, ang pagtatap sa mga wala-sa-balay nagabulig sa aton nga mangin mas maid-id sa pagpangita sa mga takus. Paano nga amo sina?
3 Sa iban nga mga lugar, madamo sa mga pumuluyo ang wala sa balay sa adlaw. Gani, sa pagkamatuod, may yara kita madamo pa nga teritoryo paagi sa pagkonsentrar sing labi pa sa aton rekord sang mga wala-sa-balay. Bisan pa kon ang, teritoryo talagsa lang ginapangabudlayan, mapauswag naton ang mga resulta kon ginahimo ang panikasog nga malab-ot ang tagsatagsa antes markahan ang teritoryo subong natapos na.
4 Ang pagduaw sa mga wala-sa-balay masunson ginahimos sa iban nga adlaw, ayhan sa sulod sang isa ka semana. Nasapwan sang madamo nga mas maayo ang magbalik sa adlaw kag oras nga tuhay sa nahaunang pagduaw. Ayhan pilion mo nga gamiton ang pila ka tion sa Sabado ukon Domingo sa pagtatap sa mga wala-sa-balay nga ginlista sa tunga-tunga sang semana. Subong isa pa ka posibilidad, natukiban sang madamong kongregasyon nga ang pagduaw sa kasisidmon mabungahon. Ayhan kapin sa katunga sang mga pumuluyo ang masapwan nila nga yara sa balay.
5 Dapat mo irekord sing tuhay ang mga pagduaw liwat. Kon indi mo mabalikan ang mga balay nga wala sing tawo, ang imo rekord sang mga wala-sa-balay dapat ihatag sa utod nga nagapanguna sa grupo, agod magamit sang masunod nga grupo nga magaduaw sa sina nga teritoryo.
6 Ang paghatag sing maayo pa nga igtalupangod sa sining bahin sang aton ministeryo makapauswag sang aton pagkamapatubason subong man sang aton kalipay. Makahatag ini sa aton sing kaayawan nga resulta sang pagkahibalo nga maid-id naton nga ginapangita kag ginatatap ang mga katulad-karnero.—Ezeq. 34:11-14.