Magpamulong sing Kamatuoran sa Imo Isigkatawo
1 Sanglit ginapalapnag sang Lalantawan kag Magmata! nga mga magasin ang mensahe sang kamatuoran sang Biblia, ang pagpanagtag sining mga balasahon sa bulan sang Mayo amo ang isa ka paagi agod ‘mapamulong naton ang kamatuoran sa aton mga isigkatawo.’ (Efe. 4:25) Yari ang pila ka ideya nga mahimo makabulig sa aton agod makaumpisa:
2 Ang Mayo 8 nga “Magmata!” dapat gamiton tubtob maubos ang inyo suplay. Mahimo nimo sugdan ang imo presentasyon paagi sa pagpamangkot:
◼ “Ano ang imo reaksion sa isa ka kalibutan nga wala sing inaway? [Pasabta sia.] Nakahibalo ka bala nga ginapasanyog gid sang mga relihion sang kalibutan ang mga inaway kag mga pinatyanay? [Pasabta sia.] Sa dakung kabaliskaran, talupangda kon ano ang ginasiling sang Biblia tuhoy sa pagahimuon sang matuod nga mga sumilimba sang Dios.” Basaha ang Isaias 2:2-4 halin sa ibabaw sang pahina 4 sang magasin, kag nian sa pahina 10 basaha ang nahaunang parapo sa ubos sang subtitulo “Pagtawag sa mga Mahigugmaon sang Paghidait.” Nian, mamangkot: “Nakahibalo ka bala kon paano ina pagahimuon sang Dios? Ang sabat masapwan sa sining magasin, kag amo ini ang imo kopya agod mabasa mo.”
3 Kon nagatanyag sing Mayo 15 nga “Lalantawan,” tinguhai nga hinambitan ang ulihi nga mga balita nga nagapabatyag sa mga tawo nga wala sing kalig-unan, kag nian mamangkot:
◼ ”Ano sa banta mo ang kinahanglan agod tunay kita nga magabatyag nga malig-on sa sining kabuhi? [Pasabta sia.] Sing prangka, realistiko bala ang magsalig sa mga tawo sa paglubad sang mga problema nga ginaatubang sang katawhan? [Pasabta sia; nian basaha ang Salmo 146:3.] Ang salmista masunod nga nagahatag sa aton sing rason nga mangin optimistiko nahanungod sa palaabuton. [Basaha ang Salmo 146:5, 6.] Ining artikulo, ‘Matuod nga Kalig-unan, Karon kag sa Walay Katubtuban,’ nagapaathag kon ngaa makasalig kita nga paluntaron ni Jehova nga Dios ang mas maayo nga mga kahimtangan sa duta.” Itanyag ang mga magasin kag maghimo sing kahimusan sa pagbalik.
4 Bangod sang lapnag nga dipagsalig sa tunga sang katawhan karon, ayhan ang artikulo sa “Young People Ask” nga “Why Can’t I Keep Friends?” sa Mayo 22 nga “Awake!” mahimo magamit. Mahimo ka mamangkot:
◼ “Ginapakabahandi naton tanan ang maayong mga abyan. Ano sa banta mo ang sekreto sang dayon nga pag-abyanay? [Pasabta sia.] Talupangda ang ginsilling ni Jesus sa Mateo 7:12. [Basaha, nian kumentuhi, nga ginapakita ang artikulo.] Ginpakita ni Jesus kon ano gid ang matuod nga pag-abyanay sa Juan 15:13. [Basaha.] Nahibaluan ko nga maluyagan mo gid ining artikulo.” Itanyag kag maghimo sing kahimusan sa pagbalik.
5 Kon ginapakamaayo mo ang malip-ot nga presentasyon, mahimo nimo tilawan ini:
◼ “Madamo ang nagapati nga ang kalabanan nga mga magasin karon nagabalhag sang tuman kadamo nga komersialismo, sekso, ukon kasingki. [Ipakita Ang Lalantawan kag Magmata!] Ginapanagtag namon ining kalahamut-an nga mga balasahon nga napasad sa Biblia. Edukasyonal gid ini kag nagatudlo sa aton nga simbahon ang Dios, higugmaon ang aton isigkatawo, kag huptan ang matarong nga pagginawi. Nahibaluan ko nga maluyagan mo ang pagbasa sining mga guwa.”
6 Kon makugi kita sa pagpamulong sang kamatuoran sa aton mga isigkatawo, mahimo naton mapahalipay sing daku ang madamo.—Binu. 8:4, 8.