Magkalipay sa Paghatag Sing Maid-id nga Panaksi

¹ Kita tanan nalipay sa paghimo sing mga butang nga sa sini maayo ang hinimuan naton. Ang Marcos 7:​37 nagasiling nga ang kadam-an nagsiling nahanungod kay Jesus: “Nahimo niya sing maayo ang tanan nga butang.” Indi katingalahan nga nalipay si Jesus sa paghimo sang kabubut-on ni Jehova! (Ipaanggid ang Salmo 40:⁠8.) Paagi sa pagbinagbinag sa masunod nga mga panugda, makasapo man kita sing kalipay samtang ginatuman naton ang sugo ni Jesus nga ‘magbantala sa katawhan kag maghatag sing maid-id nga panaksi.’ (Binu. 10:42) Sa Enero itanyag naton ang bisan anong 192-pahina nga libro nga ginbalhag antes sang 1985 nga ayhan may suplay ang kongregasyon ukon ang Mabuhi sing Dayon nga libro. Paano naton gamiton ining mga publikasyon sa paghatag sing maid-id nga panaksi?

² Sanglit ang mga tawo masami nga interesado sa kapagros, mahimo nimo ini masiling:

◼ “Walay sapayan sang tumalagsahon nga mga hinimuan sa patag sang medisina, may daku gihapon nga pag-antos bangod sang balatian. Sa imo opinyon, ngaa amo sini ang kahimtangan? [Pasabta sia.] Si Jesucristo nagsiling nga ang pamiste mangin bahin sang katapusan nga mga adlaw. (Luc. 21:11) Apang ang Biblia nagalaragway man sing isa ka tion nga ang balatian wala na. [Basaha ang Isaias 33:⁠24.] Talupangda kon paano ining libro nagahatag sing paglaum sa sinang sadsaran nga panudlo sa Biblia.” Ipatalupangod ang nagakaigo nga mga komento sa libro nga ginagamit mo kag itanyag ini sa kinaandan nga kontribusyon.

³ Kon nagapanaksi sing dipormal malapit sa mga balaligyaan, mahimo ikaw makapanamyaw kag nian makapamangkot:

◼ “Namahalan ka bala sa mga balaklon karon nga mga adlaw sa bagay nga nabudlayan ka sa pagpaigoigo sang imo kuwarta? [Pasabta sia.] Sa banta mo, magaabot pa ayhan ang tion nga may matuod nga kalig-unan sa pangabuhi?” [Pasabta sia.] Nian ipaathag ang isa ka nagakaigo nga Kasulatan nga ginbalikwat gikan sa libro nga ginatanyag mo. Magpadayon paagi sa pagsiling: “Ginapakita sini nga libro kon paano, paagi sa iya Ginharian, lubaron sang Dios ang mga problema nga nagapabudlay sing labi sang pangabuhi sa karon.” Itanyag ang libro sa kinaandan nga kontribusyon. Ayhan masiling mo nga nalipay gid ikaw sa inyo paghambalanay, kag mamangkot: “Mahimo bala naton mapadayon ini nga paghambalanay sa iban nga tion?” Sa sining paagi mahimo nimo makuha ang iya numero sang telepono ukon direksion sang balay.

⁴ Ayhan may kahigayunan ikaw nga tilawan ini nga presentasyon nahanungod sa bug-os kalibutan nga paghidait, nagagamit sing “Mabuhi sing Dayon” nga libro:

◼ “Ngaa, sa opinyon mo, tuman kabudlay maagom ang bug-os kalibutan nga paghidait? [Pasabta sia, nian ipakita ang ilustrasyon sa pahina 20-1.] Larawan ini sang isa ka hitabo sa Biblia nga ginlaragway sa Bugna. [Basaha ang Bugna 12:​7-9, 12, sing direkta gikan sa parapo 17. Nian basaha ang kapsion sa larawan.] Ang kakulang sing paghidait sa kalibutan amo ang isa sang mga epekto sang pagtagbong sa Yawa sa duta. Ginasabat sini nga libro ang madamong importante nga mga pamangkot, kag nalipay ako nga matigayon mo ini.” [Sambita ang amot.]​—⁠Agod makakita sing iban pa epektibo nga mga paagi sang pagtanyag sing Mabuhi sing Dayon nga libro, tan-awa ang pahina sa likod sang Septiembre 1995, Pebrero 1995, Septiembre 1994, Septiembre 1993, nga mga guwa sang Ang Aton Ministeryo sa Ginharian.

⁵ Kon nagaduaw liwat sa mga nagpakita sing interes, mapanikasugan mo nga makasugod sing pagtuon sa Biblia sa kalalangan sang paggamit sini nga paagi:

◼ “Sang nagligad naton nga paghambalanay, naghatag ka sing tuman ka makawiwili nga komento. [Hinambiti ang iya komento.] Ginpamensar ko ang tuhoy sina, kag luyag ko ipaambit sa imo ang resulta sang akon pagpanalawsaw tuhoy sini. [Ipakita ang nagakaigo nga kasulatan.] Nagatanyag kami sing isa ka walay bayad nga kurso sang pagtuon nga nakabulig sa minilyon ka tawo nga mausisa ang sadsaran nga mga panudlo sang Biblia sa malip-ot nga tion. Ini nga pag-usisa magapabakod sang imo pagsalig sa katumanan sang mga saad sang Dios.” Ipatalupangod ang pila ka pamangkot nga pagasabton. Kon indi sia magbaton sing pagtuon sa Biblia, ipaathag nga may yara man kita isa ka madasig nga pinasahi nga kurso nga nagakinahanglan lamang sing 15 minutos sa isa ka semana sa sulod sang 16 ka semana. Ipakita ang Ginapatuman nga brosyur, buksi ang leksion 1, kag mangabay kon mahimo nimo mapasundayag ang nahaunang leksion.

⁶ Indi Pagkalimti ang Paggamit Sing mga Handbill: Mahimo ini magamit sing epektibo sa imo introduksion agod mapukaw ang interes sa espirituwal nga mga butang, ukon mahimo ini matanyag kon wala sing literatura nga ginkuha. Kon interesado, gamita ang naimprinta nga mensahe sa likod sang hand­bill agod palig-unon sia nga batunon ang isa ka pagtuon sang Biblia sa puluy-an kag tambungan ang aton mga miting.

⁷ Mangin sampaton sa imo hilikuton, kag malipay ka sa sini. Hatagi sing dalayon nga igtalupangod ang maid-id nga pagpanaksi, kag magkalipay sa paghimo sing maayo sang tanan nga bahin sang ministeryo.​—⁠1 Tim. 4:⁠16.