Mga Pamatan-on—Himusli ang Inyo Pag-eskwela
1 Kamusta ang imo pamatyag tuhoy sa imo pag-eskwela karon nga yara na ikaw sa ikatlo nga bulan sini nga tuig? Nagapanikasog ka bala sing lakas nga makapanginpulos gikan sa edukasyon? Ginahimuslan mo bala ang mga higayon nga ginahatag sa imo sang eskwelahan agod mapaambit ang kamatuoran sa imo mga kabutho kag mga manunudlo? Nagasalig kami nga luyag mo himuon ang imo bug-os nga masarangan sa eskwelahan.
2 Mangin Maayo nga Estudyante: Kon nakahanda ka sing maayo sa inyo klase kag nagapamati sing maayo, matigayon mo ang mapinadayunon nga mga kapuslanan. Mangin makugi sa paghimo sang imo mga asaynment sa balay, apang indi pagtuguti ang imo hilikuton sa eskwelahan nga magaupang sa teokratikong mga hilikuton.—Filip. 1:10.
3 Kon wala pa nimo ini mahimo, basaha ang brosyur nga Jehovah’s Witnesses and Education. Nian, dapat mo ukon sang imo ginikanan hatagan sing kopya ang kada isa sang imo mga manunudlo. Sugiri sila nga ang ila bisan ano man nga mga pamangkot pagasabton. Magabulig ini sa ila nga mahangpan sing labi ang imo mga prinsipio kag mga pagtuluuhan kag makigkooperar sa imo samtang ginapadapat mo ang imo natun-an. Magapasalig man ini sa imo mga manunudlo nga luyag ninyo sang imo mga ginikanan makigkooperar sa ila samtang ginabuligan nila ikaw sa pagtigayon sing hamili nga edukasyon.
4 Mangin Maayo nga Saksi: Ngaa indi tamdon ang eskwelahan subong imo personal nga teritoryo para sa dipormal nga pagpanaksi? Sa masunod nga tuig sang pag-eskwela, may yara ikaw pinasahi nga mga kahigayunan sa pagpanaksi. Nagapanag-iya ikaw sing makalilipay nga espirituwal nga ihibalo nga kon ipaambit, “maluwas mo ang imo kaugalingon kag ang mga nagapamati sa imo.” (1 Tim. 4:16) Paagi sa paghupot sing huwaran nga Cristianong pagginawi kag paagi sa pagpanaksi kon san-o nagakaigo ini nga himuon, makabenepisyo ikaw kag ang iban man.
5 Isa ka lamharon nga utod nga lalaki ang nagpanaksi sing dipormal sa mga masigkaestudyante sa iya eskwelahan. Lakip sa mga namati amo ang isa ka Katoliko, ang isa ka ateista nga nagayaguta anay sa mga nagatuo sa Dios, kag ang isa ka palasigarilyo kag palainom nga pamatan-on nga lalaki. Sa kabug-usan, 15 ka katubotubo sining lamharon nga utod ang nabuligan niya padulong sa dedikasyon kag bawtismo!
6 Gani mga pamatan-on, manikasog sing daku sa pagtuon kag sa pagpangabudlay sa inyo pinasahi nga teritoryo sa pagpanaksi. Nian maagom ninyo ang pinakadaku nga benepisyo sang pag-eskwela.