Indi Magpangalag-ag
1. Ano ang nagakinahanglan sing kaisog kag ngaa?
1 Nagapangalag-ag ka bala nga magpanaksi sa eskwelahan bangod nahadlok ka nga yagutaon? Nagakinahanglan gid ini sing kaisog ilabi na kon mahuluy-on ka. Ano ang makabulig sa imo?
2. Paano nadalahig ang pagkamahinantupon sa pagpanaksi sa eskwelahan?
2 Mangin Mahinantupon: Bisan pa nga puede mo himuon nga personal nga teritoryo ang eskwelahan, dumduma nga indi kinahanglan nga istoryahon mo gid ang tanan, kaangay sang ginahimo mo sa pagpamalaybalay. Dapat mangita ka sing nagakaigo nga tion kon san-o magbantala. (Man. 3:1, 7) Ang inyo asaynment ukon mga topiko nga ginahambalan sa eskwelahan mahimo makahatag sa imo sing kahigayunan nga mapabutyag ang imo pagtuo. Ukon ayhan pamangkuton ka sang imo kaeskwela kon ngaa wala ka nagaentra sa pila ka aktibidades. Sa pagsugod pa lang sang klase, ang pila ka Cristiano nagapahibalo na nga daan sa ila mga maestra nga mga Saksi ni Jehova sila kag nagahatag sa ila sing literatura nga nagapaathag sang aton mga ginapatihan. Ang pila naman nagabutang sang literatura sa ila lamesa para magpainteres sa ila mga kaeskwela nga mamangkot.
3. Paano ka makahanda sa pagpanaksi sa eskwelahan?
3 Maghanda: Mas may kompiansa ka kon nakahanda ka. (1 Ped. 3:15) Gani pamensara na nga daan ang mga pamangkot nga mahimo mag-utwas kag kon paano mo ini sabton. (Hulu. 15:28) Kon posible, magdala sa eskwelahan sing pila ka publikasyon pareho sang Reasoning, Young People Ask, kag mga publikasyon parte sa pagpanuga agod magamit mo kon kinahanglanon. Pangabaya man ang imo mga ginikanan nga ilakip ang mga pag-ensayo sa inyo pagpamilya nga pagsimba.
4. Ngaa dapat ka magpadayon sa pagpanaksi sa eskwelahan?
4 Mangin Positibo: Indi pagpamensara nga kada maghambal ka sing kamatuoran sa imo mga kaeskwela yagutaon ka nila. Ang iban mahimo magdayaw sa imo kaisog kag mahimo pa gani mamati. Pero indi ka dapat maluyahan kon wala sing may magbaton. Nahamuot si Jehova sa imo mga pagpaninguha. (Heb. 13:15, 16) Indi mag-untat sa pagpangayo sing bulig sa iya agod ‘padayon mo nga mahambal ang iya pulong nga may bug-os nga kaisog.’ (Binu. 4:29; 2 Tim. 1:7, 8) Handurawa ang imo kalipay kon may isa nga mamati kag mahimo pa gani mangin alagad ni Jehova!