Bag-ong Programa sa Pinasahi nga Adlaw nga Asambleya
Ang programa sa pinasahi nga adlaw nga asambleya sugod sa Pebrero 2000 may tema: “Pag-usisa sa Madalom nga mga Butang Sang Dios.” (1 Cor. 2:10) Anong bilidhon nga mga butang ang aton matun-an?
Sa ila pagpangita sing ihibalo, madamo nga tawo ang wala mapapagsik sang ila nasapwan. Ang Biblia nagapapagsik sa aton, subong sang ipakita sang manugtatap sang sirkito sa iya bahin nga natig-uluhan sing “Ang Pag-usisa sa Pulong Sang Dios Nagahatag Sing Kapagsik.” Iangot sang dinapit nga humalambal ang pag-usisa sa madalom nga mga butang sang Dios sa pagbantala sing maayong balita samtang ginasabat niya ang pamangkot nga “Paano Ninyo Ginatamod ang Pagbantala Sing Ginharian?”
Paano mabuligan sang mga ginikanan ang ila kabataan sa pag-usisa sing madalom sa Pulong sang Dios? Ang praktikal nga mga panugda ihatag sa bahin nga “Itanom ang Pulong Sang Dios sa Inyo mga Anak.” Ang Cristianong mga pamatan-on maapektuhan sing maayo paagi sa pagpakig-upod sa mga hamtong sa espirituwal sa kongregasyon. Ang mga halimbawa kon paano sila maapektuhan sing maayo ipatalupangod sa bahin nga “Ang mga Pamatan-on nga Nakatuon Gikan sa mga May Edad.”
Ngaa maukod naton nga usisaon ang natago nga espirituwal nga bahandi sa sini nga tion? Si Jehova amo ang Manugpahayag sing mga sekreto. Ipaathag sang dinapit nga humalambal ang ginpahayag ni Jehova sang una kag sa karon sa pamulongpulong nga “Si Jehova Progresibo nga Nagapahayag Sang Madalom nga mga Butang.” Magapabakod ini sang aton determinasyon nga padayon nga ‘usisaon ang madalom nga mga butang sang Dios.’
Magplano na karon sa pagtambong. Ang mga luyag magsimbulo sang ila dedikasyon kay Jehova paagi sa bawtismo dapat magpahibalo sa gilayon sa nagadumala nga manugtatap. Ang aton hanuot nga handum nga usisaon ang Pulong sang Dios pabakuron sang aton mabatian. Gani tambungi ining pinasahi nga adlaw sang espirituwal nga instruksion!