Pat-ura Gid nga Mabalik Ka!
1 “Daw ano katahom nga paghambalanay! Dapat ko gid dumdumon nga magduaw liwat didto.” Nasiling mo na bala ini kag nalipatan sang ulihi kon diin sia nagaistar? Kon amo, nahibaluan mo nga ang lamang nga paagi agod mapat-od mo nga magabalik ka amo ang pagsulat sini.
2 Isulat Tanan: Samtang lab-as pa sa imo hunahuna ang pagpakighambal sa isa ka interesado, magdulog sa makadali kag isulat ang tanan nga importante nga impormasyon tuhoy sa pagduaw. Isulat ang ngalan sang tawo kag kon paano mo sia makilal-an. Isulat ang iya direksion, apang indi ini pagpalagpati—pat-ura nga husto ang imo ginasulat. Isulat ang topiko nga inyo ginhambalan, ang kasulatan nga imo ginbasa, kag ang literatura nga napahamtang.
3 Kon ginbilinan mo sia sing pamangkot nga pagasabton sa masunod nga pagduaw, isulat ini. May nahibaluan ka bala tuhoy sa iya, sa iya pamilya, ukon sa iya relihion? Kon amo, isulat ini. Nian sa imo masunod nga pagduaw, ang pagsambit mo sa sini magapakita sang imo personal nga interes sa indibiduwal. Bilang katapusan, ilakip ang adlaw kag oras sang imo una nga pagduaw kag kon san-o ang ginsiling mo nga magbalik. Paagi sa husto nga pagrekord, matigayon mo ang maathag nga mga pahanumdom kag indi gid mahimo nga malipatan ang imo pangako sa pagbalik.—1 Tim. 1:12.
4 Kon makumpleto mo na ang imo rekord, ilakip ini sa imo iban pa nga gamit sa pag-alagad sa latagon—bag, Biblia, Reasoning nga libro, kag literatura—agod matan-aw mo ini pirme. Labing maayo nga ang ginasulatan mo sang mga wala sa balay sa mga house-to-house record lain sa ginasulatan mo sang imo mga pagduaw liwat. Matuod, ano man ang imo ginahimo agod maghupot sing sibu nga rekord sang mga pagduaw liwat, ang importante nga butang amo ang pagpat-od gid nga mabalik ka!
5 Hunahunaa Sia: Kon nagahanda para sa ministeryo, repasuha ang imo nota sang mga duluawon liwat. Hunahunaa sing maayo ang tagsa ka indibiduwal kag kon ano nga paagi ang labing maayo nga gamiton sa masunod nga pagduaw. Hunahunaa kon paano palambuon ang iya interes nga mangin isa ka pagtuon sa Biblia sa puluy-an. Ini nga pagplano makapauswag sang imo pagkamabungahon subong ministro sing maayong balita kag, gani, sang imo personal nga kalipay.—Hulu. 21:5a.
6 Gani sa masunod nga tion nga makasalapo ka sang isa nga nagapamati, indi mangatarungan nga madali mo madumduman ang pagduaw. Sa baylo, isulat ini, repasuha ang imo mga nota, hunahunaa sia pirme, kag nian pat-ura gid nga mabalik ka!